Sovrin
Sovrin
នាយកសាលាបឋមសិក្សាវត្តបូព៌៖ “ការដឹកនាំដោយមានការព្រមព្រៀងគឺជារូបរាងនៃការអភិវឌ្ឍ!”
NEWS 6 years ago
បើនិយាយពីសាលាវត្តបូព៌ភាគច្រើនអ្នកទាំងអស់គ្នានឹងនឹកភ្នកទៅដល់សាលារៀនដ៏គំរូមួយដែលមានទីតាំងស្ថិតក្នុងទឹកដីអង្គរដ៏បវរនៃយើង ដែលទទួលបានភាពល្បាញល្បីលើវិស័យអប់រំក្នុងកម្រិតបឋមសិក្សាភ្ជាប់ជាមួយការអប់រំយ៉ាងខ្ជាប់ខ្ចួនតាមក្បួនខ្នាត។
សាលាបឋមសិក្សាវត្តបូព៌ ត្រូវបានបង្កើតឡើងនៅក្នុងឆ្នាំ១៩៨៧ ដែលមានផ្ទៃដីសរុប ១៣,៧០២.៦០ម៉ែត្រការ៉េ។ សាលានេះមានទីតាំងស្ថិតនៅក្នុងភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប។ ស្ថិតក្រោមការដឹកនាំរបស់លោកនាយកសាលា ពឹង គិមឆេនសាលាបឋមសិក្សាវត្តបូព៌ត្រូវបានវាយតម្លៃក្នុងកម្រិតជាសាលាបឋមសិក្សាគំរូបំផុតក្នុងប្រទេសកម្ពុជា។ ដោយឈរលើទស្សនវិស័យចំនួន០៣គឺ ១.គុណភាពសិក្សាខ្ពស់ (បញ្ចប់បឋមសិក្សា១០០% រៀន ICT និង០២ភាសា) ២.សុខភាព និងបរិស្ថានល្អ និង ៣.ឥរិយាបថថ្លៃថ្នូរ (សុជីវធម៌ សីលធម៌ គុណធម៌) លោកនាយក ពឹង គិមឆេន ត្រូវបានរាជរដ្ឋាភិបាលកម្ពុជាផ្តល់កិត្តិយសជានាយកសាលាឆ្នើមបំផុតប្រចាំឆ្នាំ២០១៥។ មានសារពត៌មានជាតិ អន្តរជាតិ ជាពិសេសឥស្សរជនជាន់ខ្ពស់របស់រាជរដ្ឋាភិបាល និងបណ្តាអង្គការផ្សេងៗតែងតែចុះទៅបំពេញទស្សនកិច្ចសិក្សាដើម្បីសម្តែងការលើកទឹកចិត្តដល់កិច្ចប្រឹងប្រែងរបស់សាលាទាំងមូលផងដែរ។
“អ្នកមិនទទួលស្គាល់កំហុសពិត ធ្វើឲ្យជីវិតជួបបរាជ័យ!”
ស្ថិតក្នុងឯកសណ្ឋានដែលបានបង្ហាញពីវិន័យនឹងសេចក្តីថ្លៃថ្នូរ លោកនាយកបានអត្ថាធិប្បាយថា “សាលាបឋមសិក្សាវត្តបូព៌ មានទិសដៅអភិវឌ្ឍន៍សមត្ថភាពគ្រូបង្រៀនគ្រប់រូបឲ្យមានចំណេះដឹងទាបបំផុតក៏កម្រិតបរិញ្ញាបត្រដែរ (ចេះ ដឹង ធ្វើ) និងចេះប្រើប្រាស់ប្រព័ន្ធបច្ចេកវិទ្យា (ICT) ព្រមទាំងអាចនិយាយបានពីរភាសានៅចុងឆ្នាំ២០១៨។ លើសពីនេះទៀត គ្រូបង្រៀនត្រូវមានឥរិយាបថល្អប្រកបដោយសមធម៌ មានស្មារតីចែករំលែកទូលំទូលាយនឹងរួមរស់ជាមួយគ្នាប្រកបដោយសុខដុមភាព ដើម្បីបណ្តុះបណ្តាលសិស្សានុសិស្សឲ្យទទួលបានគុណភាពនិងភាពជោគជ័យ។ ពួកយើងប្រឹងប្រែងដើម្បីឲ្យសិស្សថ្នាក់ទី៦ទាំងអស់បានឆ្លងភូមិសិក្សាជោគជ័យ១០០%។” ជាការពិតណាស់កេរ្តិ៍ឈ្មោះនៅសាលាបឋមសិក្សាវត្តបូព៌បានមកដោយសារវិន័យ និងគុណភាពនៃការអប់រំប្រកបដោយសុជីវធម៌ សីលធម៌ និងគុណធម៌។ លោកនាយកបានបន្ថែមបន្តទៀតថា “យើងលុបបំបាត់រូបភាពដែលនាំឲ្យមានការរើសអើងក្នុងថ្នាក់រៀន។ សិស្សទាំងអស់ប្រើប្រាស់ឯកសណ្ឋានដូចគ្នា។ សេវានៅក្នុងសាលាគឺសម្រាប់បម្រើឲ្យការសិក្សារបស់សិស្ស។ យើងមិនបង្រៀនក្មេងឲ្យរាប់អានគ្នាដោយសារសម្ភារ ឬវណ្ណៈគ្រួសារឡើយ។ ដូច្នោះដើម្បីធានាស្មារតីតម្លាភាពនិងសមធម៌នេះ ខ្ញុំត្រូវតែធ្វើខ្លួនជាគំរូនិងលះបង់ក្នុងនាមជាថ្នាក់ដឹកនាំ។”
“មនុស្សសកល ស្អាត របៀប សុភាព ទៀងពេល និងសមាធិ!”
បន្ថែមលើការរៀបរាប់ខាងដើម លោកនាយក បានលើកឡើងពីគោលការណ៍ពិសេសចុងក្រោយមួយដែលជាគោលការណ៍មិនអាចខ្វះបានក្នុងការគ្រប់គ្រងសិស្សានុសិស្សទាំងអស់នៅទីនេះ។ គោលការណ៍នោះគឺសិស្សានុសិស្សទាំងអស់ត្រូវបានទទួលនូវការអប់រំសុជីវធម៌មួយដើម្បីក្លាយទៅជាមនុស្សសកល ដែលមានលក្ខណៈសម្បត្តិ៥យ៉ាងគឺ ស្អាត របៀប សុភាព ទៀងពេល និងសមាធិ។ លក្ខណៈសម្បត្តិទាំងនេះអាចបង្ហាញជាឧទាហរណ៍តាមរយៈសកម្មភាពឈរជាជួរយ៉ាងមានរបៀបរៀបរយក្នុងរយៈពេលដ៏ខ្លីនាពេលគោរពទង់ជាតិរបស់សិស្សានុសិស្សទាំងអស់ដែលមានចំនួនប្រហាក់ប្រហែល៦៤០០នាក់។ ថ្វីត្បិតតែវាមិនមែនជាការងាយស្រួលក្នុងការគ្រប់គ្រង ប៉ុន្តែសាលាបឋមសិក្សាវត្តបូព៌ បានធ្វើឲ្យប្រជាពលរដ្ឋកម្ពុជាទូទាំងប្រទេសបានឃើញតាមរយៈវីដេអូដែលសាលា និងស្ថាប័នព័ត៌មានមួយចំនួនបានផ្សព្វផ្សាយ។ ក្រោយពេលមើលវីដេអូនោះ មានប្រជាពលរដ្ឋខ្លះប្រាថា្នថានឹងនាំកូនៗរបស់ខ្លួនទៅរៀននៅទីនោះ ឬអ្នកខ្លះទៀតក៏រំភើបចិត្តរហូតស្រក់ទឹកភ្នែកនៅពេលឃើញទំពាំងរបស់កម្ពុជាកំពុងតែលូតលាស់នៅក្នុងមាគ៌ាត្រឹមត្រូវមួយរបស់ពួកគេ។ ក្រៅពីប្រព័ន្ធគ្រប់គ្រងសុជីវធម៌សម្រាប់សិស្សកម្រិតថា្នក់ទី១ដល់ទី៦ លោកនាយក ក៏មិនភ្លេចលើកឡើងពីរបៀបគ្រប់គ្រងនៅកម្រិតមត្តេយ្យសិក្សាផងដែរ។ លោកនាយកវាចារដោយទឹកមុខញញឹមបន្តិចថា “យើងបានធ្វើកម្មវិធីប្រគល់សញ្ញាប័ត្រដល់ក្មេងៗដែលបានបញ្ចប់មត្តេយ្យសិក្សាដូចជាពិធីមនុស្សធំអ៊ីចឹង។ ទង្វើនេះ យើងចង់ធ្វើឲ្យកុមារមានអនុស្សាវរីយ៍ជាមួយការសិក្សាឲ្យកាន់តែខ្លាំង ជាពិសេសបង្ហាញដល់ម្តាយឪពុក ឬអាណាព្យាបាលថាចំណេះវិជ្ជាគឺជាទ្រព្យជាប់ខ្លួនដែលចោរមិនអាចលួចបានឡើយ ហើយចំណេះវិជ្ជានេះទៀតសោតគឺជាកេរ្តិ៍ដែលឪពុកម្តាយគួរតែបន្សល់ទុកឲ្យកូនៗរបស់ពួកគេ។”
“សាលារៀនល្អកុំទាន់ថាស្អាត បើមិនសង្វាតបានជាប្រចាំ!”
ដោយឆ្លងកាត់ការងារនៅទីនេះតាំងពីសាលាបឋមសិក្សាវត្តបូព៌មានសិស្សត្រឹមតែ៤២៧នាក់ (នាឆ្នាំ១៩៩៣) រហូតកើនដល់ជិត៦៤០០នាក់ (នាឆ្នាំ២០១៦) លោកនាយកបាននិយាយបន្តដោយស្នាមញញឹមថា “កេរ្តិ៍ឈ្មោះនិងការរីកចម្រើនរបស់សាលាសព្វថ្ងៃនេះកើតចេញពីការចូលរួមនិងបរិច្ចាគទាំងកម្លាំងកាយនិងចិត្តរបស់គ្រូបង្រៀនគ្រប់ជំនាន់។ ពួកគាត់យល់ច្បាស់អំពីក្រមសីលធម៌វិជ្ជាជីវៈគ្រូបង្រៀន។ លើសពីនោះទៀត គឺការចូលរួមរបស់អាណាព្យាបាលសិស្សានុសិស្សដែលពួកគាត់បានឲ្យតម្លៃ និងយល់ពីអត្ថន័យនៃការអប់រំកម្រិតមូលដ្ឋាននេះ តើវាមានសារសំខាន់អ្វីខ្លះសម្រាប់អនាគតកូនៗរបស់ពួកគាត់។ មួយវិញទៀត វាក៏កើតចេញពីការគាំ្រទ្រដៃគូអភិវឌ្ឃន៍នានាដែលមានឆន្ទៈពិតប្រាកដក្នុងការជំរុញគុណភាពវិស័យអប់រំកម្ពុជាឲ្យកាន់តែមានប្រសិទ្ធភាពឆាប់រហ័ស និងជាពិសេសបំផុតពីការអភិបាលរបស់រាជរដ្ឋាភិបាលកម្ពុជាតែម្តង។
ទន្ទឹមនឹងកេរ្តិ៍ឈ្មោះដែលសាលាបឋមសិក្សាវត្តបូព៌ និងលោកនាយកទទួលបានសព្វថ្ងៃលោកនាយកក៏មិនភ្លេចលើកឡើងពីឧបសគ្គជាច្រើនដែលបានកើតឡើងនៅលើកិច្ចការដ៏លំបាកទាំងនេះផងដែរ។ លោកមានប្រសាសន៍ថា “ឧបសគ្គទី១គឺខ្លួនឯង តើខ្ញុំមានឆន្ទៈនឹងធ្វើកិច្ចការទាំងនេះទេ? ទី២គឺក្រុមគ្រួសាររបស់ខ្ញុំ តើប្រពន្ធកូនរបស់ខ្ញុំនឹងមានជីវភាពបែបណា? ទី៣គឺមជ្ឈដ្ឋានជុំវិញខ្លួន តើកិច្ចការដែលខ្ញុំធ្វើនឹងប៉ះទង្គិចទៅក្រុមបុគ្គលណាខ្លះ? ទី៤គឺ សហការីរបស់ខ្ញុំនឹងសហការជាមួយខ្ញុំដែរឬទេ?” ជាក់ស្តែងណាស់ប្រសាសន៍របស់លោកនាយកបានឆ្លុះបញ្ចាំងឲ្យឃើញពីន័យរបស់ពាក្យស្លោកមួយគឺ ការអប់រំមានរសជាតិល្វីង តែផ្តល់ផលផ្អែមណាស់។ ដូច្នេះការសិក្សាគឺជាវិធីសាស្ត្រតែមួយគត់ដែលនាំឲ្យសង្គមជាតិមានការរីកចម្រើនយ៉ាងឆាប់រហ័សបាន។
“ការអប់រំគឺជាកាតព្វកិច្ចរបស់យើងគ្រប់គ្នាដើម្បីភាពរីកចម្រើនឥតឈប់ឈររបស់សង្គម!”
ជាចុងក្រោយ ដើម្បីបន្តនិរន្តរភាពនៃការរីកចម្រើននេះ លោកនាយក និងថ្នាក់ដឹកនាំសាលាទាំងមូលបានរៀបចំគោលការណ៍០៤ដែលវាស្របទៅតាមគោលនយោបាយរបស់ក្រសួងអប់រំយុវជននិងកីឡា គឺ ១.សាលារៀនមានសុវត្ថិភាព និងសណ្ដាប់ធ្នាប់ធ្វើឲ្យមាតាបិតាសិស្ស មានភាពកក់ក្ដៅ និងទំនុកចិត្ត។ ២.ការធ្វើឲ្យប្រសើរឡើងនូវសុខុមាលភាពរបស់សិស្សានុសិស្ស និងគ្រូបង្រៀន។ ៣.គុណភាពបង្រៀនដោយផ្ដោតលើសមាសភាគទាំង៥ ដែលមានការអប់រំបញ្ញា កាយ សិល្បៈ ពលកម្ម សោភ័ណ ដើម្បីមានបំណិនជីវិត និងប្រកបដោយចតុស្ដម្ភ។ ៤. ជួយធ្វើឲ្យសមត្ថភាព គុណភាព និងជីវភាពរបស់គ្រូបង្រៀនកាន់តែប្រសើរឡើងតាមរយៈការលើកទឹកចិត្តពីសប្បុរសជនជាតិ អន្តរជាតិ និងសហគមន៍។
លោកនាយក ពឹង គិមឆេន នឹងចូលនិវត្តន៍ក្នុងពេលខាងមុខនេះ។ លោកនាយកគិតបែបសុទិដ្ឋិនិយមថា កុមារទូទាំងប្រទេសនឹងទទួលបានការអប់រំប្រកបដោយគុណភាព តម្លាភាព និងសមធម៌នាពេលនោះ ពួកគេនឹងមានឱកាសពេញលេញ និងស្មើភាពគ្នាដើម្បីក្លាយជាបញ្ញាជនកម្ពុជាដ៏មានសក្តានុពលក្នុងការរួមចំណែកអភិវឌ្ឍន៍ប្រទេសជាតិលើគ្រប់វិស័យ។ សព្វថ្ងៃនេះ លោកនាយក កំពុងចំណាយពេលដ៏មមាញឹករបស់លោកចូលរួមក្នុងវេទិកាថ្នាក់ជាតិ និងអន្តរជាតិនានាដែលមានខ្លឹមសារទាក់ទងទៅនឹងការដឹកនាំស្ថាប័នអប់រំ។ កេរ្តិ៍ឈ្មោះរបស់លោកនាយកកំពុងសាយភាយពេញស្ថាប័នអប់រំថ្នាក់ជាតិរបស់ព្រះរាជាណាចក្រថៃ។ ពួកគេមានចម្ងល់ថា ហេតុអ្វីលោកនាយក ពឹង គិមឆេន អាចសម្រេចកិច្ចការដ៏លំបាកនេះបានយ៉ាងជោគជ័យដូច្នោះ ទាំងដែលពួកគេខិតខំមកជាយូរ តែមិនសូវទទួលបានផលដូចជាសាលាបឋមសិក្សាវត្តបូព៌ទាល់តែសោះ?
Article by SVAY LEEMENG
