តម្លៃនៃសមត្ថភាពការងាររបស់ស្រ្តីត្រូវបានទទួលស្គាល់កាន់តែទូលំទូលាយទ្វេដងនៅតាមបណ្តាប្រទេសនានាដែលក្នុងនោះរួមមានប្រទេសកម្ពុជាយើងផងដែរ។សមត្ថភាពការងាររបស់ស្រ្តីសព្វថ្ងៃត្រូវបានឆ្លុះបញ្ចាំងតាមវិស័យផ្សេងៗ តួយ៉ាង វិស័យនយោបាយ វិស័យអប់រំ វិស័យរដ្ឋបាល វិស័យសេដ្ឋកិច្ច វិស័យសង្គមកិច្ច វិស័យវប្បធម៌ វិស័យសារព័ត៌មាន វិស័យទូរគមនាគមន៍ វិស័យទេសចរណ៍ វិស័យអាកាសចរណ៍ និង វិស័យកីឡា ។ល។ តើស្រ្តីណាខ្លះដែលជាវីរនារីផ្នែកកីឡាបានបង្ហាញភាពខ្លាំងរបស់ខ្លួន និង មានកិត្តិស័ព្ទល្បីល្បាញក្នុងវិស័យនេះទូទាំងប្រទេសនៅពេលបច្ចុប្បន្ននេះ?
វិស័យកីឡាប៉េតង់ជាតិនេះដែរ វីរកីឡាការិនីជម្រើសជាតិកម្ពុជាពីររូប គឺ អ្នកស្រី កែ ឡេង និង អ៊ុក ស្រីមុំ ទើបតែដណ្តើមបាននូវមេដាយមាស នៅក្នុងវិញ្ញាសាប្រភេទកីឡាប៉េតង់ជាគូក្នុងព្រឹត្តិការណ៍ប្រកួតកីឡាស៊ីហ្គេម (SEA Games) លើកទី២៩ ដែលបានប្រារព្ធធ្វើឡើងយ៉ាងមហោឡារឹកក្នុងឆ្នាំ២០១៧ នៅទីក្រុងគូឡាឡាំពួរ ប្រទេសម៉ាឡេស៊ី គួរជាទីមោនភាពក្រៃលែង។ លោកស្រី កែ ឡេង វ័យ៥៥ឆ្នាំ ជាម្ចាស់មេដាយមាសកីឡាស៊ីហ្គេម លើកទី២៩ និង ជាម្ចាស់មេដាយផ្សេងៗជិត៤០ទៀត។ កីឡាការិនីទាំងពីរនេះបានឈ្នះរាល់ការប្រកួតក្នុងអំឡុងពេលព្រឹត្តិការណ៍ស៊ីហ្គេមលើកទី២៩ នៅប្រទេសម៉ាឡេស៊ី។ ក្រុមកីឡាករ កីឡាការិនីជាតិកម្ពុជាបានទទួលមេដាយសរុបចំនួន ០៦ ក្នុងនោះមេដាយមាសចំនួន០១ និង មេដាយសំរឹទ្ធចំនួន ០៥។ លុះដល់ចប់ការប្រកួតខាងលើ ជាលទ្ធផល ព្រះរាជាណាចក្រកម្ពុជាទទួលបានមេដាយសរុបចំនួន១៧ (មេដាយមាស ០៣ មេដាយប្រាក់ ០២ និងមេដាយសំរឹទ្ធិ១២)។
នៅក្នុងប្រវត្តិសាស្រ្តកីឡាប៉េតង់កម្ពុជា កីឡាការិនីទាំងពីររូបត្រូវបានចាត់ទុកជា វីរកីឡាការិនីឈ្នះបានមេដាយជាបន្តបន្ទាប់លើឆាកអន្តរជាតិរហូតឈ្នះបានមេដាយមាសពិភពលោកដែលពុំមានស្រីខ្មែរណាម្នាក់ធ្លាប់ធ្វើបានដូចនោះឡើយ។ ជាក់ស្តែង កីឡាការិនី កែ ឡេង ធ្លាប់បានឈ្នះមេដាយមាសកីឡាប៉េតង់នារី ពិភពលោកក្នុងការប្រកួតកីឡាប៉េតង់នារីពិភពលោកលើកទី១៤ នៅម៉ុងតូបង់ (Montauban) ប្រទេសបារាំង កាលពីឆ្នាំ២០១៣ ។ ម្ចាស់មេដាយមាសពិភពលោករូបនេះបានចូលរួមប្រកួតនៅក្រៅប្រទេសជាលើកដំបូងដើម្បីដណ្តើមពានរង្វាន់ជើងឯកអាស៊ីនៅប្រទេសសិង្ហបុរីកាលពីឆ្នាំ១៩៩៩ ហើយជាលទ្ធផលអ្នកស្រីដណ្តើមបានមេដាយមាសជូនកម្ពុជា។ ក្រោយមកទៀត កីឡាការិនីរូបនេះធ្លាប់បានទៅចូលរួមប្រកួតជាបន្តបន្ទាប់នៅតាមបណ្តាប្រទេសជាច្រើន រួមមាន ម៉ាឡេស៊ី ឥណ្ឌូនេស៊ី ភីលីពីន ជប៉ុន ថៃ វៀតណាម ឡាវ និង បារាំង។ គិតមកទល់ពេលបច្ចុប្បន្ននេះ វីរនារី កែ ឡេង បានដណ្តើមបានមេដាយសរុបចំនួន ៤០ ក្នុងនោះមានមេដាយមាសចំនួន ១៧ មេដាយប្រាក់ចំនួន ១២ និង មេដាយសំរឹទ្ធិចំនួន ១១ ព្រមទាំងប័ណ្ណសរសើរពីក្រសួងការពារជាតិ និង សហព័ន្ធកីឡាកម្ពុជា ថែមទៀតផង។
ដោយឡែក កីឡាការិនី អ៊ុក ស្រីមុំ ក៏មានប្រវត្តិកសាងស្នាដៃផ្នែកកីឡាជូនជាតិមាតុភូមិមិនធម្មតាដែរ។ កីឡាការិនីជម្រើសជាតិរូបនេះបានក្លាយជាជើងឯកមេដាយមាសពិភពលោកក្នុងព្រឹត្តិការណ៍ប្រកួតកីឡាជើងឯកប៉េតង់ពិភពលោកប្រចាំឆ្នាំ២០១៧ (World Championship Petanque 2017) ដែលបានប្រព្រឹត្ត ទៅពីថ្ងៃទី១៣ ដល់ថ្ងៃទី១៦ ខែមេសា នៅទីក្រុង Ghent ប្រទេសប៊ែលហ្ស៊ិក តាមរយៈវិញ្ញាសាវាយប៉េតង់ឯកត្តជន ដែលមានការចូលរួមពីកីឡាការិនីជាង៤០នាក់មកពីទូទាំងពិភពលោក។ ដើម្បីតបស្នងនឹងគុណបំណាច់របស់កីឡាការិនី អ៊ុក ស្រីមុំ ដែលខិតខំដណ្តើមបានមេដាយមាសពិភពលោក ក្នុងឱកាសនោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃកម្ពុជាបានអនុញ្ញាតឲ្យកីឡាការិនីរូបនេះចូលជួបសំណេះសំណាលនិងលើកទឹកចិត្ត ព្រមទាំងផ្តល់ប្រាក់ឧបត្ថម្ភ ផ្ទាល់ចំនួន ១ម៉ឺនដុល្លារសហរដ្ឋអាមេរិក (បន្ថែមលើថវិការដ្ឋចំនួន១២០លានរៀល) រួមនឹងទទួលបានការដំឡើងឋានន្តរសក្តិពីអនុសេនីយ៍ឯកទៅជាវរសេនីយ៍ត្រីថ្នាក់មហាសិរីវឌ្ឍន៍ពីក្រសួងការពារជាតិថែមទៀតផង។
កម្ពុជាក៏មានវីរនារីមួយរូបទៀតដែលនាំឲ្យពិភពលោកស្គាល់ប្រទេសកម្ពុជាតាមរយៈកីឡាស្នូកឃ័រ ឬ បុកប៊ីយ៉ាផងដែរនោះគឺ កីឡាការិនី ស្រួង ភាវី មកពីខេត្តត្បូងឃ្មុំ ដែលសព្វថ្ងៃកំពុងរស់នៅប្រទេសកូរ៉េ។ ចាប់ពីឆ្នាំ២០១៣មក ភាវីបានចូលរួមប្រកួតក្នុងព្រឹត្តិការណ៍កីឡាប្រភេទនេះ រហូតទទួលបានពានរង្វាន់ស្ទើរគ្រប់ប្រភេទទាំងនៅប្រទេសកូរ៉េ សហរដ្ឋអាមេរិក និង តំបន់អឺរ៉ុបមួយចំនួនថែមទៀតផង។ ក្នុងមួយឆ្នាំ នៅប្រទេសកូរ៉េមានរៀបចំការប្រកួតកីឡាស្នូកឃ័រចំនួនប្រមាណ៧-៨ដង ហើយរាល់ព្រឹត្តិការណ៍នេះម្តងៗ ភាវីតែងតែទទួលបានចំណាត់ថ្នាក់លេខ១ ឬ លេខ២ជានិច្ច។ ពានរង្វាន់ទាំងនោះបានធ្វើឲ្យភាវីនិយាយដោយជឿជាក់ថាមិនមែនសម្រាប់តែខ្លួនភាវីផ្ទាល់ទេតែក៏ដើម្បីឲ្យពិភពលោកបានស្គាល់ពីប្រទេសកម្ពុជាតែម្តង។
កើតក្នុងគ្រួសារដែលមានខ្សែស្រឡាយជាកីឡាករហែលទឹកដ៏ល្បីល្បាញប្រចាំប្រទេសកាលពីទ.វ៦០ កញ្ញា ហែមថុន វិទិនី ត្រូវបានក្រុមគ្រួសារជំរុញឱ្យរៀនហែលទឹកនៅពហុកីឡដ្ឋានជាតិអូឡាំពិកតាំងពីអាយុ ៤ ឆ្នាំមកម្ល៉េះ។ កាលនៅវ័យទើបតែ ៦-៧ឆ្នាំ នាងបានចូលរួមប្រឡងកីឡាហែលទឹកដំបូងក្នុងវិញ្ញាសាចម្ងាយ២៥ម៉ែត្រដោយទទួលបានជ័យលាភីចំណាត់ថ្នាក់លេខ២។ លុះមកដល់ឆ្នាំ ២០០៣ នាងបានជាប់ឈ្មោះក្លាយជាកីឡាការិនីហែលទឹកជម្រើសជាតិដែលមានវ័យក្មេងជាងគេបំផុត។ កញ្ញាបានចូលរួមប្រឡងហែលទឹកជម្រើសជាតិដំបូង ក្នុងឆ្នាំ២០០៦ ហើយពេលនោះដែរ កញ្ញាដណ្តើមបានជ័យលាភីលេខ១តែម្ដងសម្រាប់វិញ្ញាសាហែលកង្កែបចម្ងាយ១០០ម៉ែត្រ និង២០០ម៉ែត្រ ។ ចាប់តាំងពីពេលនោះមក កញ្ញា ហែមថុន វិទិនី បានចូលរួមប្រកួតកម្មវិធីប្រឡងប្រជែងថ្នាក់ជាតិជារៀងរាល់ឆ្នាំហើយតែងតែទទួលបានមេដាយមាសជានិច្ច។ រីឯការចូលរួមប្រកួតនៅលើឆាកអន្តរជាតិវិញ កញ្ញាធ្លាប់បានចាកចេញទៅប្រកួតតំណាងកម្ពុជានៅប្រទេសជាច្រើនដូចជា ប្រទេសថៃ ឥណ្ឌូនេស៊ី សឹង្ហបុរី ចិន ជប៉ុន កូរ៉េ អារ៉ាប់ អ៊ីតាលី អេស្ប៉ាញ រុស្ស៊ី ទួរគី និង អង់គ្លេស-ល-។
ដោយឡែក កញ្ញា អ៊ុំ ថារ័ត្ន កីឡាការិនីល្បុក្កតោវ័យ ២៦ឆ្នាំ បានចូលហាត់ក្បាច់គុណល្បុក្កតោនេះតាំងពីអាយុ១៧ឆ្នាំ កាលពីចុងឆ្នាំ២០០៧ ហើយថារ័ត្នបានឈានជើងចេញទៅប្រកួតនៅប្រទេសកូរ៉េខាងត្បូងកាលពីចុងឆ្នាំ២០១០ ចេញទៅប្រកួតជាក្រុមក្នុងកម្មវិធី “ ប្រកួតក្បាច់គុនយុទ្ធសិល្ប៍ប្រចាំប្រទេសនីមួយៗ” សម្រាប់តំណាងឲ្យប្រទេសរបស់ខ្លួន ហើយក្នុងនោះផងដែរ វាជាលើកទី១សម្រាប់ប្រទេសកម្ពុជាក្នុងការចូលរួមប្រកួត ប៉ុន្តែជាលទ្ធផលយើងទទួលបានចំណាត់ថ្នាក់លេខ២។ បន្ទាប់ពីនោះមក ដោយសារតែសមត្ថភាពប្រកបដោយទេពកោសល្យខ្ពស់ ថារ័ត្នបានទទួលការប្រកួតជាបន្តបន្ទាប់នៅក្រៅប្រទេសជាញឹកញាប់មានដូចជា ប្រទេសកូរ៉េខាងត្បូងបានចំនួនបីឆ្នាំជាប់គ្នា ប្រកួតនៅប្រទេសវៀតណាមបានចំនួន២ដង ហើយបានទទួលការអញ្ជើញជាកិត្តិយសពីសាធារណរដ្ឋឆែក និង ប្រទេសជប៉ុន ដើម្បីបង្ហាញពីក្បាច់គុនល្បុក្កតោលើឆាកអន្តរជាតិឲ្យគេបានស្គាល់ផងដែរ៕
Article by SRINSOKMEAN