Sovrin
Sovrin
« FASANA NEW BEGINING » កម្មវិធីដើរបង្ហាញម៉ូដដ៏ទាក់ទាញពីអ្នកច្នៃម៉ូដជំនាន់ថ្មី
FASHION & BEAUTY one year ago
កាលពីរាត្រីថ្ងៃទី១៨ ខែមីនា កន្លងទៅថ្មីៗនេះ មានការរៀបចំកម្មវិធីដើរបង្ហាញម៉ូដហ្វេហ្សិនមួយ ដែលបានប្រារព្ធឡើងនៅ Olympia Medical Hub។ ការបង្ហាញម៉ូដសម្លៀកបំពាក់ហ្វេហ្សិននេះដែរ គឺជាស្នាដៃរបស់និស្សិតដែលបានសិក្សាផ្នែកហ្វេហ្សិនឌីហ្សាញនៅសាលាបណ្តុះបណ្តាលច្នៃម៉ូដសម្លៀកបំពាក់ម៉ាប៉ា (Mapa Fashion Design Academy) ក្រោមប្រធានបទ « FASANA NEW BEGINING »។ រួមជាមួយគ្នានេះ ស្នាដៃនៃការបង្ហាញម៉ូដបានបែងចែកជាបីគឺ ស្នាដៃរបស់និស្សិតដែលបានបញ្ចប់ការសិក្សា ស្នាដៃនិស្សិតដែលកំពុងសិក្សា និងស្នាដៃនិស្សិតដែលទើបតែបានបញ្ចប់ការសិក្សាផងដែរ។
អ្នកស្រី សៀង រ៉ាណែត ហៅ Bobo Sieng ជានាយិកានៃសាលាបណ្តុះបណ្តាលច្នៃម៉ូដសម្លៀកបំពាក់ម៉ាប៉ា (Mapa Fashion Design Academy) បានមានប្រសាសន៍ថា “កម្មវិធីនេះបានប្រព្រឹត្តទៅដោយរលូន ហើយនាងខ្ញុំសូមថ្លែងអំណរគុណដល់សិស្សនិសិ្សតទាំងអស់ អ្នកស្ម័គ្រចិត្ត ភ្ញៀវកិត្តិយស រួមទាំងអ្នករៀបចំកម្មវិធីទាំងអស់។ កម្មវិធីនេះដែរ ជាលើកទី៣ហើយដែលបានរៀបចំឡើង ហើយពីមួយឆ្នាំទៅមួយឆ្នាំកម្មវិធីនេះកាន់តែល្អឡើងទ្វេដង ដែលធ្វើឲ្យនាងខ្ញុំពិតជាសប្បាយចិត្តមែនទែន”៕
Article by SOUNG SOKSAN
