Sovrin
Sovrin
ការវិលត្រឡប់មកវិញនៃកម្មវិធីដើរបង្ហាញម៉ូដ Re-Made in Cambodia សម្រាប់ឆ្នាំ២០២៣
FASHION & BEAUTY 12 months ago
កាលពីថ្ងៃទី២២ ខែមេសា ឆ្នាំ២០២៣ កន្លងទៅផុតទៅថ្មីៗនេះ Re-Made in Cambodia បានរៀបចំព្រឹត្តិការណ៍ដើរបង្ហាញម៉ូដប្រចាំឆ្នាំ២០២៣ ដែលបានប្រព្រឹត្តឡើងស្ថិតនៅទីតាំង Factory Phnom Penh។ កម្មវិធីនេះ បានបង្ហាញវត្តមាននៃអ្នកច្នៃម៉ូដដ៏មានទេពកោសល្យរហូតដល់ទៅ៣៣នាក់ ដែល៣២នាក់ជាយុវជនខ្មែរ និង១នាក់ជាជនជាតិបរទេស ហើយការបង្ហាញខូឡិកហ្សិននេះបានបែងចែកជា៨ក្រុម រួមមានខូឡិកហ្សិន RAFFLES INTERNATIONAL COLLAGE, SKOOLER JAMSTER, B-ON, MAPA, MOUY CHORM CAMBODIA, MENGHOUR PAN, REVIVRE និង A.N.D ។ ក្នុងនោះរួមមានទាំងសិស្ស ម្ចាស់អាជីវកម្មខ្នាតតូច និងម្ចាស់អាជីវកម្មខ្នាតធំផងដែរ។ សម្រាប់កម្មវិធីនេះដែរ គឺបង្កើតឡើងក្នុងគោលបំណង បង្ហាញពីការគិតគូរទៅលើបរិស្ថានដោយមានការចាប់ផ្តើមពីមនុស្សជំនាន់ថ្មី ហើយបានប្រើប្រាស់វត្ថុធាតុដើមកែច្នៃឡើងវិញ១០០%។ ជាក់ស្តែង សម្លៀកបំពាក់ចំនួន៨០% គឺកែច្នៃឡើងពីសំណល់ក្នុងទន្លេ និង២០%ផ្សេងទៀតត្រូវបានច្នៃពីរបស់ដែលប្រើប្រាស់រួចហើយមានដូចជា ខោអាវចាស់ៗ ភួយ ខ្សែក្រវាត់ និងគីម៉ូណូ(ឈុតប្រពៃណីជប៉ុន) ដែលគេទុកចោលជាដើម។
ជាការពិត សម្លៀកបំពាក់ច្នៃឡើងវិញកំពុងមានការពេញនិយមពីសំណាក់យុវវ័យ ហើយវាក៏បានឆ្លុះបញ្ចាំងពីហ្វេហ្សិនដែលពោរពេញដោយគំនិតច្នៃប្រតិដ្ឋ និងជួយទៅដល់បរិស្ថាន។ ទន្ទឹមនឹងនេះ ការច្នៃសម្លៀកបំពាក់ឡើងវិញអាចចាប់ផ្តើមពីអ្នក ដោយយកខោអាវជជុះ ឬខោអាវដែលឈប់ប្រើហើយ មកបង្កើតជាម៉ូដថ្មីៗកំពុងពេញនិយម ឬបង្កើតជាស្ទាយ៍ថ្មីតាមគំនិតផ្ទាល់ខ្លួនផងដែរ៕
Article by SOUNG SOKSAN
