ទៀន គឺជាគ្រឿងអុជបំភ្លឺពន្លឺសិប្បនិម្មិតធ្វើឡើងពីក្រមួនឬខ្លាញ់មានអំបោះជាប្រឆេះ ដែលជាទូទៅគេតែងប្រើសម្រាប់អុជយកពន្លឺជាសក្ការបូជាឬប្រើបំភ្លឺអុជតាមធម្មតានៅពេលព្រះសុរិយាចាប់ផ្តើមអស្តង្គត ខណៈបច្ចុប្បន្នមនុស្សក្នុងសម័យទំនើបបានកែខៃច្នៃទៀនឲ្យកាន់តែមានលក្ខណៈពិសេសតាមរយៈការបន្ថែមពណ៌ បន្ថែមក្លិន ចម្អិនចាក់រំលេចចេញជារូបរាងប្លែកៗយកទៅប្រើប្រាស់អុជបំភ្លឺលម្អមិនថានៅក្នុងបន្ទប់គេង បន្ទប់ទឹក ការិយាល័យ សណ្ឋាគារ ឬកន្លែងស្ប៉ាជាដើម ដើម្បីបង្កើនបរិយាកាសឲ្យកាន់តែរ៉ូមែនទិច និងទទួលបាននូវអារម្មណ៍ស្ងប់សុខស្រាកស្រាន្តមួយគ្រា។ ថែមលើសពីវិសេសភាពទាំងនេះ សិប្បកម្មផលិតទៀនក្រអូបមួយកន្លែងក្នុងរាជធានីភ្នំពេញក្រោមស្លាកយីហោ ទៀនក្រអូប ដន សិន (Dawn Scent Candle) បានបង្កើតទៀនក្រអូបមួយប្រភេទធ្វើឡើងពីធម្មជាតិសុទ្ធសាធទាំងក្លិន ទាំងទៀនសុទ្ធសឹងគ្មានសារធាតុគីមី ពោលគឺចម្រាញ់ចេញពីក្រមួនសណ្តែកសៀងឬយើងហៅថាក្រមួនបន្លែ។
Dawn Scent Candle មានអត្ថន័យផ្តោតទៅលើពិដោរទៀននាព្រឹកព្រហាម គឺជាកន្លែងលក់ និងកន្លែងផលិតទៀនក្រអូបមួយដែលទើបនឹងបង្កើតឡើងនៅកំឡុងពាក់កណ្តាលឆ្នាំ ២០១៥ ក្រោមសង្វាក់ផលិតកម្មផលិតរបស់សហគ្រិនជាស្ត្រីវ័យក្មេងមួយរូបគឺ អ្នកនាង វ៉ា ចាចែង ។ មានទីតាំងអាជីវកម្មសិប្បកម្មខ្នាតតូចស្ថិតនៅក្នុងបុរីសម្បូរមាសនៅមិនឆ្ងាយប៉ុន្មានពីរាជធានីភ្នំពេញ ហាងទៀនក្រអូប ដន សិន បានផ្តោតការផលិត និងលក់ទៀនក្រអូបធ្វើឡើងពីធម្មជាតិសុទ្ធសាធដែលរាល់ទានទាំងអស់ចម្រាញ់ចេញពីក្រមួនសណ្តែកសៀង១០០% (មួយរយភាគរយ)។ ចុះតើអ្វីទៅជាទៀនក្រមួនសណ្តែកសៀង? ហើយតើវាមានលក្ខណៈពិសេសខុសគ្នាយ៉ាងដូចម្តេចពីទៀនទូទៅ?។ ធ្វើដំណើរមកជំនួបស្ថាបនិកផ្ទាល់នៅសិប្បកម្មផ្ទាល់ គ្រាន់តែបើកទ្វារបោះជំហានចូលទៅខាងក្នុងភ្លាម ពិដោរទៀនក្រអូបស្រាលស្រទន់ឈ្ងុយដូចជាក្លិនបុប្ផាព្រៃម្យ៉ាងបានលួងលោមអារម្មណ៍យើងឲ្យទោរទន់បន្ធូរបន្ថយភាពហត់នឿយពីការធ្វើដំណើរមួយរំពេច។ ស្វាគមន៍ដោយស្ថាបនិការូបស្រស់ ជាមួយនឹងការលើកបង្ហាញទៀនពីកែវមួយទៅកែវមួយអមនឹងក្លិនក្រអូបប្លែកៗពីគ្នា អ្នកនាង វ៉ា ចាចែង បានរៀបរាប់ដូច្នេះ «ទីនេះបានបង្កើតឡើងជាង៤ឆ្នាំ មកហើយ វាជាហាងលក់ផង និងជាកន្លែងផលិតផងដែរ។ ផលិតផលទៀនរបស់ ដន សិន គឺជាទៀនចម្រាញ់ចេញពីសណ្តែកសៀងសុទ្ធឬយើងហៅថាក្រមួនបន្លែ វាមានគុណភាពខ្ពស់គ្មានផ្សែង មិនប្រឡាក់ពិតាន អុជបានយូរជាងទៀនធម្មតា ដែលសំខាន់ទោះប្រើយ៉ាងណាក៏មិនប៉ះពាល់សុខភាពដូចទៀនក្រអូបដទៃនៅលើទីផ្សារឡើយ»។ អ្នកនាងបានបង្ហើបអំពីដំណើរដើមទងនៃការបង្កើតទៀននេះឡើងទៀតដែរថា ដោយសារមានទំនោរចិត្តស្រឡាញ់ទៀនតាំងតែពីក្មេងវ័យ គោលបំណងក៏ដូចជាក្តីស្រមៃនៃការបង្កើតទានត្រូវបានលេចជារូបរាងឡើងនៅខណៈពេលដែលសហគ្រិនរូបនេះរៀបចប់ថ្នាក់បរិញ្ញាបត្រផ្នែកទំនាក់ទំនងអន្តរជាតិបានរយៈពេលពីរឆ្នាំ។
ដោយឃើញថាទាំងទៀនធម្មតា និងទានក្រអូបនៅលើទីផ្សារស្រុកខ្មែរភាគច្រើនជាទៀនឥន្ធនៈឬទៀនចម្រាញ់ចេញពីប្រេងសេសសល់ ហើយទៀនខ្លះមានដាក់លាយសារធាតុគីមីក្រអូបអាចបណ្តាលឲ្យប៉ះពាល់ដល់សុខភាពទៀតនោះ អ្នកនាង ចាចែង បានងាកមកសិក្សាស្វែងយល់ពីទៀនក្រមួនធម្មជាតិ ហើយក៏សម្រេចចិត្តនាំចូលគ្រឿងផ្សំធ្វើទៀនក្រមួនសណ្តែកសៀងពីសហរដ្ឋអាមេរិកមកផលិតបង្កើតជាម៉ាករបស់ខ្លួនតែម្តង។ រយៈពេលតេស្តធ្វើទៀនដំបូង អ្នកនាងបានជួបនូវផលវិបាកច្រើន ដូចជាការប្រើសីតុណ្ហភាពកម្តៅដាំខុសអង្សាដែលធ្វើឲ្យសាច់ទៀន និងក្លិនមិនល្អ ជួនកាលធ្វើខុសច្រើនដងត្រូវកុម្មង់វត្ថុធាតុដើមច្រើនលើកច្រើនសារពីសហរដ្ឋអាមេរិករហូតអូសបន្លាយបានរយៈពេល៦ខែទើបទទួលបានសមិទ្ធផលជោគជ័យទាំងស្រុង។ ការធ្វើទៀនត្រូវចំណាយពេលយ៉ាងហោចណាស់កន្លះថ្ងៃដោយត្រូវឆ្លងកាត់ដំណាក់កាលដូចជា ស្លក្រមួនរយៈពេលពីរម៉ោងក្នុងសីតុណ្ហភាព ៩០អង្សា បន្ទាប់មកដាក់ប្រេងក្រអូបយកក្លិន រួចចាក់ចូលកែវ។ វិធីធ្វើយើងអាចគិតថាស្រួល ប៉ុន្តែកម្តៅបានដើរតួយ៉ាងសំខាន់ក្នុងការផលិតទៀន ដូចអ្នកជំនាញបានជម្រាបជូនខាងលើប្រសិនបើប្រើកម្តៅខុស សូម្បីតែក្លិន សាច់ទៀន និងការយកទៅអុជក៏មិនអំណោយផលល្អផងដែរ។ ក្រឡេកមួយភ្លែតទៀនក្រមួនសណ្តែកសៀង និងទៀនឥន្ធនៈអាចមានលក្ខណៈស្ទើរតែដូចគ្នាទាំងស្រុង ទោះយ៉ាងណាយើងនៅតែអាចសម្គាល់ជាក់លាក់តាមរយៈការសង្កេតសាច់ទៀនសណ្តែកសៀងដែលមានពណ៌ដើមគឺពណ៌សទឹកដោះគោ សាច់ទៀនខាប់ហាប់ល្មួតល្អ រីឯទៀនឥន្ធនៈបើទោះដាក់ក្លិនឬពណ៌យ៉ាងណាក៏យើងអាចសម្គាល់តាមរយៈសាច់ទៀនមើលទៅរាងផុសៗថ្លាៗ និងរលោង។ ទាំងនេះជាហេតុដែល សហគ្រិនវ័យ៣០ឆ្នាំសម្រេចចិត្តជ្រើសរើសផលិតទៀនមានគុណភាពខ្ពស់មិនប៉ះពាល់សុខភាព ដោយសុខចិត្តជ្រើសរើសប្រើគ្រឿងផ្សំពីក្រៅប្រទេសដ្បិតត្រូវចាយទុនលើការនាំចូលច្រើនយ៉ាងណាក្តី។
បច្ចុប្បន្ន ដន សិន បានផលិតទៀនក្រមួនសណ្តែកសៀងមានរហូតដល់ទៅ ២៩ ក្លិន ចំណែកក្លិនកំពុងពេញនិយមជាងគេពីសំណាក់អតិថិជនមានដូចជា ក្លិនស្លឹកគ្រៃ ក្លិនលំអងទឹកឃ្មុំ ក្លិនម្លិះ ក្លិនផ្កាសាគូរ៉ា ក្លិន Red wine និងក្លិនឡាវែនដ័រជាដើម។ ច្រកក្នុងកែវ៤ទំហំ ដូចជាទំហំ ៤៥ក្រាម ដុតបានរយៈពេលពី ៨ទៅ១០ម៉ោង ទំហំ ២០០ក្រាម ដុតបានពី ៤០ទៅ ៤៥ម៉ោង ទំហំ ៤០០ក្រាម ដុតបានពី ៨០ ទៅ៩០ ម៉ោង និងទំហំ ៥០០ក្រាម ដុតបានពី ១១០ទៅ១២០ម៉ោង អ្វីដែលពិសេស ទៀនក្រមួនសណ្តែកសៀងអាចអុជបានយូរជាងទៀនធម្មតារហូតដល់ទៅបីឬបួនម៉ោងឯណោះ។ ជាការពិត គ្រាន់តែចាប់កាន់បើកគម្របកែវទៀនមិនទាន់បានអុជបំភ្លឺផង ក្លិនទៀនហាក់ឈ្ងុយប្រហើរចម្រុះណាស់ទៅហើយ អ្វីដែលគួរឲ្យចាប់ចិត្តចាប់អារម្មណ៍ពេលស្រង់ក្លិនពីទៀនមួយទៅទៀនមួយមិនថាក្លិនបែបស្រាលឬក្លិនខ្លាំងកម្រិតណាក៏វានៅតែបង្កប់ក្លិនបែបស្រទន់ទន់ភ្លន់គួរឲ្យចង់នែបនិត្យបំផុត។ ក្លិនមានដល់ទៅជិត៣០ក្លិន ជាមួយគ្នានេះសូវរីន ក៏ឆ្លៀតឲ្យអ្នកជំនាញណែនាំអំពីក្លិនដែលសក្តិសមប្រើប្រាស់ទៅតាមទីកន្លែងក៏ដូចជាបរិយាកាសផងដែរ ជាក់ស្តែងដូចជាក្លិនស្លឹកគ្រៃ និងឡាវែនដ័រ មានក្លិនបែបប្រហើរៗជួយបន្ធូរបន្ថយអារម្មណ៍តានតឹង និងភាពហត់នឿយ វាសក្តិសមបំផុតសម្រាប់ប្រើអុជនៅកន្លែងស្ប៉ា ចំណែកក្លិនម្លិះក្លិនសាគូរ៉ា ក្រអូបបែបស្រាលជួយសម្រួលដល់ប្រព័ន្ធប្រសាទធ្វើឲ្យខួរក្បាលស្ងប់គេងលក់ស្រួល សក្តិសមចំពោះការអុជក្នុងបន្ទប់គេងឬក្នុងផ្ទះ រីឯងាកមកក្លិន Red Wine វិញ ក្រអូបបែបផ្អែមល្ហែមត្រូវនឹងបរិយាកាសបែបរ៉ូមែនទិចបំផុត ជាពិសេសត្រូវចិត្តសម្រាប់យុវវ័យ។
យ៉ាងណាមិញ ដនសិន ក៏បានគាំទ្រទៅលើគម្រោងប្រើប្រាស់ផលិតផលប្រើឡើងវិញផងដែរ ក្នុងនោះទៀតសោតសំបកដបស្រាចម្រុះពណ៌ត្រូវបានយកមកកាត់ច្នៃតុបតែងរំលេចចេញជាកែវទៀនយ៉ាងប្រណីតឥតខ្ចោះ ដែលក្រៅពីអុជបំភ្លឺបង្ហើរក្លិនក្រអូបសាយជាមួយគ្នានេះវាក្លាយជាវត្ថុស្រស់ស្អាតមួយអាចដាក់តាំងលម្អបង្កើនភាពទាន់សម័យដល់គេហដ្ឋានផងដែរ។ ទៀនក្រអូបមានតម្លៃចាប់ពី ២.៥០ដុល្លារ រហូតដល់ ២៤.៥០ដុល្លារ អាស្រ័យទៅតាមទំហំក៏ដូចជាក្លិនផ្សេងៗពីគ្នា។ អាចនិយាយបានថា ដនសិន គឺជាកន្លែងផលិតទៀនក្រមួនសណ្តែកសៀងដ៏កម្រមួយនៅរាជធានីភ្នំពេញ ហើយនាពេលខាងមុខ ស្ថាបនិកទានក្រអូប ដនសិន ក៏បានបង្ហើបដែរថានឹងនាំយកនូវទៀនក្រអូបប្រភេទថ្មីមួយទៀតដែលមានក្លិនក្រអូបពិសេសខ្លាំង ជាមួយតម្លៃ និងគុណភាពខ្ពស់ សំខាន់មិនធ្លាប់មាននៅលើទីផ្សារកម្ពុជាពីមុនមកឡើយ៕
Article by HEM SOKKHIM