SOVRIN Magazine

សុរាជីន ក្រោមថ្វីដៃស្ត្រីខ្មែរសម្រាំងពីរុក្ខជាតិដាំដុះផ្ទាល់ដៃនាឯជើងភ្នំគូលែន

NEWS 2 weeks ago

នាឯជើងភ្នំគូលែន លាតសន្ធឹងលើផ្ទៃដីប្រមាណជាង ៣០ហិកតា រុក្ខជាតិខៀវខ្ចីជារុក្ខជាតិឱសថ ខ្លះដាំដុះយកស្លឹក ខ្លះបេះបោចយកផ្កា ខ្លះបេះយកតែផ្លែ ឯខ្លះទៀតប្រើយកទាំងដើម។ ដំណាំអាស្រ័យធម្មជាតិសុទ្ធសាធទាំងនេះ ត្រូវបានស្ត្រីខ្មែរម្នាក់ប្រមូលផលជាគ្រឿងផ្សំ ប្រើផលិតជាស្រាជីន (Gin) ដ៏មានគុណភាព ហើយក៏កំពុងមានតម្រូវការនៅទីបដិសណ្ឋារកិច្ចនានាក្នុងក្រុងសៀមរាប។

អ្នកស្រី អ៊ុន សុផារី ជាអ្នកដាំដុះគ្រឿងផ្សំដោយផ្ទាល់ដៃ និងជាអ្នកផលិតស្រាជីន ដែលមានម៉ាកសញ្ញាលើដបស្រារបស់ខ្លួន «សុរា ជីន គូលែន»។ សុរា ជីន គូលែន គឺជាផលិតផលមួយទៀតរបស់ ហឺបល គូលែន (Herbal Kulen) ដែលជាកន្លែងធ្វើផលិតផលទាក់ទងនឹងសុខុមាលភាព ដូចជា ប្រេងម៉ាស្សា ថ្នាំបាញ់មូស និងតែជាដើម។ អ្នកស្រី អ៊ុន សុផារី បានផលិតស្រាជីនជាច្រើនឆ្នាំមកហើយ តែទើបតែបានចែកចាយនៅលើទីផ្សារប្រមាណពីរឆ្នាំចុងក្រោយនេះប៉ុណ្ណោះ។

តាមរយៈជំនួបជាមួយក្រុមការងារ សូវរីន ស្ថាបនិកា អ៊ុន សុផារី បានឱ្យដឹងថា អ្នកស្រីបានបង្កើត ហឺបល គូលែន តាំងពីឆ្នាំ ២០១៤។ មុនពេលចាប់ផ្តើមច្នៃជាស្រាជីន អ្នកស្រីបានដាំរុក្ខជាតិគ្រឿងទេសនៅចម្ការនាឯជើងភ្នំគូលែន ដើម្បីផលិតតែសុខភាព និងប្រេងសម្រាប់រឹត ប្រេងម៉ាស្សា ថ្នាំបាញ់មូស និងទឹកស្លឹកគ្រៃបាញ់មុខ (Face Mist) ជាដើម។ ក្រោយមកអ្នកស្រីបានសិក្សាអំពីការប្រើប្រាស់គ្រឿងទេស ដែលខ្មែរយើងប្រើសម្រាប់ធ្វើម្ហូប និងថ្នាំខ្មែរ។ ទន្ទឹមគ្នានេះ អ្នកស្រីក៏បានសិក្សាស្វែងយល់អំពីស្រាថ្នាំខ្មែរដែលមានប្រយោជន៍ចំពោះសុខភាពផងដែរ។

ជំហានដំបូងនៃការចាប់ផ្តើមស្រា អ្នកស្រី អ៊ុន សុផារី បានសាកល្បងប្រើគ្រឿងទេសយកមកត្រាំធ្វើជាស្រា រួចប្រើស្រានេះជាគ្រឿងផ្សំបង្កើតស្រាក្រឡុក ដាក់លក់នៅបាររបស់ខ្លួនមួយកន្លែងឈ្មោះ អាសាណា ដែលមានទីតាំងនៅជិតផ្សារចាស់ក្នុងក្រុងសៀមរាប។ ខណៈដែលស្រាក្រឡុកទទួលបានសម្ទុះគាំទ្រ អ្នកស្រីក៏កើតគំនិតថា បើសិនជាយើងផលិតស្រាដែលប្រើគ្រឿងផ្សំក្នុងស្រុក ហើយទុកបានយូរទៀតនោះ វាពិតណាស់ច្បាស់ជាល្អ។

មិនបង្អង់យូរ អ្នកស្រី អ៊ុន សុផារី បានចាប់ផ្តើមសាកល្បងត្រាំស្រាជាមួយគ្រឿងផ្សំផ្សេងៗដែលមាននៅជុំវិញខ្លួន រួចចម្រាញ់ចេញជាស្រាជីន ដោយអញ្ជើញមិត្តភក្តិ និងក្រុមគ្រួសារមកជួយភ្លក់ផ្តល់ជាមតិយោបល់ទាំងអស់គ្នា។ ជាលទ្ធផល គ្រប់គ្នាពិតជាលាន់មាត់ និងមានការពេញចិត្តយ៉ាងខ្លាំង ដោយសារស្រាជីនរបស់អ្នកស្រីពិតជាមានឱជារស ក្លិនឈ្ងុយប្រហើរដិតជាប់មាត់ទៅដោយគ្រឿងទេស។ ដោយមានការលើកទឹកចិត្តច្រើន ជាពិសេសការគាំទ្រពីអតិថិជន អ្នកស្រីក៏ចាប់ផ្តើមផលិតស្រាជីនបង្កើតជាម៉ាកសញ្ញា «សុរា ជីន គូលែន» និងដាក់លក់ចែកចាយតាំងពីពេលនោះមក។

ពីជើងភ្នំមកដល់ក្នុងដប សុរា ជីន គូលែន ត្រូវបានលាយគ្រឿងផ្សំដូចជា៖ ម្រះព្រៅ ក្រវាញ ស្លឹកគ្រៃ (មានពីរប្រភេទ) ជីរស្លឹកក្រាស់ (អ្នកខ្លះហៅជីរត្រចៀកជ្រូក) ខ្ញី គ្រាប់វ៉ាន់ស៊ុយ សម្បកក្រូច រមៀត ផ្កាអមតៈ និងផ្លែជូននីភ័រ(នាំចូលពីក្រៅប្រទេស)។ គ្រឿងផ្សំភាគច្រើនដាំដុះនៅចម្ការផ្ទាល់ខ្លួន ដែលលាតសន្ធឹងលើផ្ទៃដីប្រមាណជាង ៣០ហិកតា ស្ថិតនៅចន្លោះភ្នំគូលែន និងប្រាសាទបេងមាលា។ ការដាំដុះទាំងប៉ុន្មានមិនមានការប្រើថ្នាំស្លាប់សត្វល្អិតឬសារធាតុគីមីឡើយ ពោលស្រោចស្រពបែបធម្មជាតិ អមដោយដីមានជីជាតិស្រាប់។ ចំពោះការប្រមូលផលវិញ គឺធ្វើឡើងដោយដៃ និងសម្រិតសម្រាំងបំផុត។ រៀងរាល់ឆ្នាំរុក្ខជាតិឱសថអាចប្រមូលផលបានទាំងរដូវប្រាំង និងរដូវវស្សា គ្រាន់តែរដូវវស្សាភ្លៀងបង្អុរគ្រប់គ្រាន់អាចប្រមូលផលបានច្រើនជាង។

ក្រឡេកមកដំណាក់កាលនៃការផលិតស្រា អ្នកស្រី អ៊ុន សុផារី ដែលជាអ្នកផលិតផ្ទាល់ដៃបានរៀបរាប់ថា ជំហានដំបូងយើងត្រូវយកគ្រឿងទេសមកដាក់ត្រាំជាមួយស្រាក្នុងពាងនីមួយៗផ្សេងៗគ្នា បន្ទាប់មកយកស្រាដែលបានត្រាំមកប្រើភ្លើងចម្រាញ់ដែលខ្មែរយើងហៅថាបិតស្រា។ ក្រោយចម្រាញ់រួចរាល់ គ្រាន់តែយកស្រាទាំងប៉ុន្មានមកលាយចូលគ្នាជាការស្រេច។

ក្នុងដំណើរការផលិតស្រា អ្នកស្រី អ៊ុន សុផារី យកចិត្តទុកដាក់ជាងគេនៅពេលចម្រាញ់ ជាក់ស្តែងនៅពេលចម្រាញ់ ត្រូវប្រាកដថារក្សាកម្តៅឱ្យនៅឋិតថេរ។ ចំណែកគ្រឿងទេសក៏ជាផ្នែកដ៏សំខាន់មួយទៀត តួយ៉ាងចាប់តាំងពីការដាំដុះដល់ប្រមូលផល ត្រូវប្រាកដថាគ្រឿងទេសចាស់ល្មមអាចប្រើការបាន បន្ទាប់មកដាក់សម្ងួតឱ្យបានល្អ ហើយរក្សាទុកឱ្យបានត្រឹមត្រូវ។

អ្នកស្រី អ៊ុន សុផារី

ផលិតស្រាបានពី ៣០ ទៅ ៥០លីត្រ ក្នុងមួយសប្តាហ៍ ក្រៅពីអ្នកស្រី អ៊ុន សុផារី ជាអ្នកផលិតផ្ទាល់ ក្នុងនោះក៏មានប្អូនស្រីម្នាក់ទៀតជាជំនួយការនៅក្នុងការផលិត និងវេចខ្ចប់ផងដែរ។ អ្នកស្រីតាមដានដិតដល់ទៅលើការផលិត រាប់តាំងពីគុណភាពគ្រឿងទេស ការត្រាំ រហូតដល់លាយក្លាយជាលទ្ធផលសម្រេច។ ស្វាមីអ្នកស្រីក៏ជាអ្នកជួយមើលការខុសត្រូវលើការរក្សាគុណភាព រសជាតិ និងការផ្សព្វផ្សាយផងដែរ។ អ្នកស្រីថា ស្វាមី កូនៗ ក្រុមគ្រួសារ និងមិត្តភក្តិ សុទ្ធតែជាចំណែកលើកទឹកចិត្តដ៏សំខាន់នៅក្នុងការផលិតនេះ។

ចំពោះឧបសគ្គនៃការបង្កើតផលិតផល សុរា ជីន គូលែន អ្នកស្រីថាដំបូងឡើយជួបផលលំបាកតែម្យ៉ាងប៉ុណ្ណោះ គឺទំនុកចិត្ត និងការទទួលស្គាល់ ដោយហេតុអ្នកផលិតជាស្ត្រីភេទមិនសូវត្រូវបានគេឱ្យតម្លៃ។

បច្ចុប្បន្ន សុរា ជីន គូលែន ទទួលបានការគាំទ្រពីបណ្តាកន្លែងបដិសណ្ឋារកិច្ចជាច្រើននៅក្នុងក្រុងសៀមរាប ដូចជា បារ ឡោញ ភោជនីយដ្ឋាន និងសណ្ឋាគារជាដើម។ ភាគច្រើនកន្លែងទាំងនេះ តែងជ្រើសរើសស្រាជីនជាគ្រឿងផ្សំបង្កើតជាស្រាក្រឡុករសជាតិផ្ទាល់ខ្លួន (Signature Cocktail) ហើយរសជាតិក៏ហាក់ប្លែកទទួលបានការចាប់អារម្មណ៍ខ្លាំងពីសំណាក់ភ្ញៀវជាតិ និងអន្តរជាតិ។

សម្លឹងទៅខាងមុខ ស្ថាបនិក ហឺបល គូលែន អ្នកស្រី អ៊ុន សុផារី អ្នកផលិតស្រាជីនលើដែនដីសុវណ្ណភូមិបានមានមតិយល់ឃើញយ៉ាងដូច្នេះ៖ «នៅថ្ងៃអនាគត ខ្ញុំចង់ឃើញផលិតផលខ្មែរយើងមានការគាំទ្រពីអតិថិជនទាំងក្នុង និងក្រៅស្រុកកាន់តែច្រើនឡើង ជាពិសេសមានការគាំទ្រពីប្រជាជនខ្មែរទៅលើផលិតផលខ្មែរយើងកាន់តែច្រើន»៕

Article by HEM SOKKHIM

Image Courtesy: អ៊ុន សុផារី (Herbal Kulen)

SUGGESTIONS