Sovrin
Sovrin
គំនូរ គឺជាផ្នែកមួយនៃសិល្បៈ ដែលកើតចេញពីការស្រមើស្រមៃរួមបញ្ចូលនូវសេចក្តីស្រឡាញ់ ការគូសវាសយ៉ាងយកចិត្តទុកដាក់ និងផ្ចិតផ្ចង់បំផុតក្រោមថ្វីដៃវិចិត្រករ ដើម្បីធ្វើយ៉ាងណារំលេចបានជាសមិទ្ធផលរូបភាពមួយដែលស្រស់ស្អាត និង ប្លែក ឬមានតែមួយគ្មានពីរ។ ដោយសារតែការសម្រិតសម្រាំងបែបនេះ ទើបបច្ចុប្បន្ន សិល្បៈគំនូរ ត្រូវបានគេឲ្យតម្លៃសម្បើមជាជាងរូបភាពថតដោយម៉ាស៊ីនកាមេរ៉ា ពិសេសរូបគំនូរហាក់មានទីផ្សារខ្ពស់អាចដាក់លក់បានក្នុងតម្លៃចាប់ពីខ្ទង់រយដុល្លាររហូតដល់ពាន់ដុល្លារឬអាចដល់ម៉ឺនដុល្លារអាស្រ័យទៅតាមទំហំផ្ទាំងក៏ដូចជាប្រភេទគំនូរ។ ទន្ទឹមនឹងការលើកស្ទួយស្នាដៃវិចិត្រករនៅក្នុងប្រទេសយើង និងដើម្បីលាតត្រដាងទៅដល់ឆាកអន្តរជាតិផងដែរនោះ សូវរីន សូមនាំអារម្មណ៍ប្រិយមិត្តអ្នកអានទាំងអស់ មកស្គាល់ពីស្នាដៃគំនូរដ៏រស់រវើក ពីវិចិត្រករចំណានម្នាក់ ដែលកំពុងតែទទួលភាពល្បីល្បាញនៅលើទឹកដីអង្គរនៃយើង។
ព្រហ្ម ពន្លឺ ស្ថិតក្នុងវ័យ ២៥ឆ្នាំ និងជាវិចិត្រករដៃឯកម្នាក់ដែលកំពុងតែទទួលបានការគាំទ្រស្នាដៃគំនូររបស់លោក ពីសំណាក់ភ្ញៀវជាតិ និងអន្តរជាតិជាច្រើន ហើយមកដល់សព្វថ្ងៃនេះ លោកក៏កំពុងតែដំណើរការ អាជីវកម្មហាងលក់គំនូរ និងវត្ថុអនុស្សាវរីយ ក្រោមស្លាកយីហោ LyLy Art Gallery និង LyLy Shop ស្ថិតនៅក្នុងផ្សាររាត្រីលើទឹកដីអច្ឆរិយៈអង្គរនេះផងដែរ។ យើងធ្លាប់តែបានដឹងនិងបានឃើញនូវការព្រីនរូបនៅលើអាវយឺតដោយម៉ាស៊ីន ក៏ប៉ុន្តែវិចិត្រករ ព្រហ្ម ពន្លឺ បានបង្កើតស្នាដៃថ្មីខុសសព្វមួយដងមួយទៀតដោយងាកមកគូរគំនូរនៅលើអាវយឺតម្តង ដោយរំលេចនូវសិល្បៈទាក់ទាញប្លែកមួយបែប។ ខណៈពេលកំពុងកាន់ជក់គូសវាសចេញជារូបរាងនៅលើអាវបណ្តើរៗ វិចិត្រករដៃឯកមួយរូបនេះ បានរៀបរាប់បន្ថែមទៀតថា អាវយឺតនេះ គឺបង្កើតឡើងដោយស្នាដៃរបស់លោកផ្ទាល់ ហើយក្នុងនោះ លោកក៏សម្គាល់ឃើញថា ក្នុងយុគសម័យដ៏សំបូរបែបនេះ យុវជនភាគច្រើននិយមចូលចិត្តពាក់អាវយឺតជាជាងអាវសាច់ក្រណាត់ ដែលប្រៀបបាននឹងសិល្បៈមួយនៃការតុបតែងខ្លួន ឲ្យទទួលបានភាពទាក់ទាញទៀតផង។ តួយ៉ាង អ្នកខ្លះ ចូលចិត្តសិល្បៈសាក់រូបនៅលើដងខ្លួនជាដើម។ ជាមួយគ្នានេះដែរ លោកបានបញ្ជាក់យ៉ាងច្បាស់ ទៅលើរបៀបនៃ គំនូរនេះឡើង គឺវាមិនមែនជាភាពងាយស្រួលប៉ុន្មាននោះទេ ព្រោះគំនូរគូសវាសប្រើទឹកថ្នាំនៅលើអាវយឺតត្រូវប្រាកដ និងធានានូវគុណភាពខ្ពស់ ពោលបើទោះបោកគក់ដោយដៃ ឬម៉ាស៊ីន ក៏មិនមានការព្រួយបារម្ភរលុបរូបភាពឡើយ។ «សម្រាប់អាវយឺតមួយគឺមានតែមួយរូបប៉ុណ្ណោះ ពីព្រោះខ្ញុំចង់ធ្វើអ្វីមួយដែល Unique ឬមានតែមួយគ្មានពីរ និងជារបស់ផ្ទាល់ខ្លួន»។
Image Courtesy: LyLy Art Gallery
ងាកមកដំណើរជីវិតមុនក្លាយជាវិចិត្រករគំនូរដ៏ចំណាន លោក ព្រហ្ម ពន្លឺ បានចាប់ផ្តើមក្រេបជញ្ជក់ចំណេះដឹងគូររូបតាំងពីនៅវ័យ ១៥ ឆ្នាំ ដោយសុំចូលសិក្សាតាមរយៈសាលាអង្គការមួយនៅក្នុងក្រុងសៀមរាប។ ហេតុតែឧបនិស្ស័យចូលចិត្តផ្នែកគំនូរគួបផ្សំនឹងទេព្យកោសល្យពីកំណើតស្រាប់ ការចាប់ជំនាញគំនូរមួយនេះ គឺផ្តើមចេញពីភាពអត់ធ្មត់ខ្ពស់ និងការតស៊ូព្យាយាម ហើយចំណុចទាំងអស់នេះទៀតសោត ក៏មិនមែនជាផលវិបាកសម្រាប់លោកឡើយ ផ្ទុយមកវិញលោកថែមទាំងរៀនឆាប់ចាប់បានក្នុងរយៈពេលដ៏ខ្លី និងក្លាយជាគ្រូបង្រៀនគំនូរដ៏ជំនាញម្នាក់ ។ ជាក់ស្តែងក្រោយសិក្សាបានប្រមាណប្រាំឆ្នាំ លោកបានក្លាយជាគ្រូបង្រៀននៅសាលាអង្គការដដែល និងចាប់ផ្តើមបង្រៀនសិស្សនៅតាមបណ្តាសាលារដ្ឋនានា ដើម្បីចែករំលែកនូវចំណេះដឹងដល់សិស្សានុសិស្សដែលស្រឡាញ់សិល្បៈគំនូរនេះ ។ ក្នុងនាមជាស្ថាបនិក និងជាគ្រូបង្រៀនគំនូរផ្នែកសិល្បៈ វិចិត្រករ ព្រហ្ម ពន្លឺ បានលើកឡើងថា «ការចែករំលែកបទពិសោធន៍ គឺជារឿងមួយដ៏ល្អចំពោះសង្គម ពីព្រោះខ្ញុំចង់បណ្តុះបណ្តាលក្មេងៗជំនាន់ក្រោយឲ្យយល់ដឹង និងស្គាល់អំពីតម្លៃនៃសិល្បៈខ្មែរថាសិល្បៈគំនូរខ្មែរយើងគឺមិនចាញ់បរទេសឡើយ»។ លើសពីនេះលោករមែងជំរុញទឹកចិត្តឲ្យពួកគេ បង្កើតនូវអ្វីដែលថ្មីហើយប្លែក និងជាគំនិតផ្ទាល់ខ្លួនដើម្បីកសាងស្នាដៃក៏ដូចជាកេរ្តិ៍ឈ្មោះសិល្បៈខ្មែរឲ្យរីកចម្រើនល្បីល្បាញទៅកាន់ទីផ្សារពិភពលោក។
ក្រៅពីបង្កើតគំនូរលើអាយឺតដែលជាសមិទ្ធផលថ្មីសម្រាប់អាជីវកម្មរបស់ខ្លួនហើយ ស្ថាបនិកគំនូរវ័យក្មេង លោក ព្រហ្ម ពន្លឺ ក៏បានបង្កើតសិល្បៈគំនូរគូរទៅលើវត្ថុប្រើប្រាស់ផ្សេងៗដូចជា កែវទឹកតូចៗ កែវកាហ្វេ នៅលើចាន ពិសេសគូរនៅលើបាវក្រចៅជាដើម។ មួយវិញទៀត មូលហេតុដែលបង្កើតស្នាដៃគំនូរទាំងនេះឡើង គឺរាប់បញ្ចូលទាំងការគូរគំនូរនៅលើអាវយឺត ដោយសារការគូរផ្ទាល់ដៃគឺមានលក្ខណៈទាក់ទាញគួរឲ្យចាប់អារម្មណ៍ជាងការប្រើម៉ាស៊ីនបោះពុម្ព។ នៅហាងរបស់លោកក្រៅពីមានលក់វត្ថុអនុស្សាវរីយ៍ ក្នុងនោះក៏មានបង្រៀនគូរគំនូរទៅកាន់ភ្ញៀវទេសចរផងដែរ «ខ្ញុំចង់ឲ្យភ្ញៀវមកកម្សាន្តទីនេះទទួលបានភាពសប្បាយរីករាយ និងបង្ហាញពីសិល្បៈជីវិតដែលពួកគាត់បានធ្វើនៅទីនេះ»។ ដើម្បីលើកកម្ពស់ស្នាដៃវិចិត្រករខ្មែរ រៀងរាល់មួយខែឬពីរខែម្តង លោកតែងបង្កើតការតាំងពិព័រណ៍នៅហាងរបស់លោកផ្ទាល់ដោយវិចិត្រករគ្រប់រូបអាចយករូបភាពឬស្នាដៃសិល្បៈប្លែកៗរបស់ខ្លួនចូលរួមតាំងបង្ហាញដើម្បីបង្អួតភ្នែកភ្ញៀវទេសចរ។
Image Courtesy: LyLy Art Gallery
ចុងក្រោយ ក្នុងនាមលោកជាវិចិត្រករ និងជាធនធានមនុស្សម្នាក់ដែលបានចូលរួមចំណែកអភិវឌ្ឍន៍ដល់វិស័យសិល្បៈបែបគំនូរដៃនេះ លោក ក៏បានបង្ហើបពីមតិផ្តាំផ្ញើរខ្លះៗដល់ប្រជាជនខ្មែរគ្រប់រូប សូមជួយលើកតម្កើងសិល្បៈខ្មែរឲ្យបានច្រើន និងគាំទ្រអ្វីដែលជាផលិតផលរបស់ខ្មែរពិតៗ រួមផ្សំនឹងការចែករំលែកទៅតាម រយៈបណ្តាញឬប្រព័ន្ធផ្សព្វផ្សាយណាមួយឲ្យកាន់តែច្រើន ឲ្យដូចពាក្យបីម៉ាត់ថា«ខ្មែរតែមួយ» ។ នេះហើយ ដែលជាកម្លាំងចលករមួយជ្រុងតូច ដែលអាចរុញច្រានឲ្យសិល្បៈខ្មែររបស់យើង អាចមានឱកាសបង្ហាញខ្លួនទៅក្នុងឆាកអន្តរជាតិបានយ៉ាងល្អប្រសើរ ដែលក្នុងនោះ វិចិត្រករគ្រប់រូប ក៏គួរតែចែករំលែកបទពិសោធន៍ទៅកាន់យុវជនជំនាន់ក្រោយៗបន្ត។ ជាក់ស្តែង ដូចជារូបលោក ផ្ទាល់ លោកបើកទូលាយក្នុងការបង្រៀនសិស្សផ្នែកសិល្បៈគំនូរដោយឥតគិតថ្លៃ និងបង្រៀនគ្រប់គ្រឹះគ្រប់គន្លឹះដោយមិនលាក់លៀម ព្រោះលោកជឿជាក់ថាស្នាដៃក៏ដូចជាបទពិសោធន៍ទាំងនេះ គឺជាស្នូលដ៏សំខាន់សម្រាប់ផ្តល់ជាពុទ្ធិដល់ខ្មែរជំនាន់ក្រោយយកទៅអភិវឌ្ឍសិល្បៈខ្មែរមានភាពរីកចម្រើនទាំងពេលបច្ចុប្បន្ន និងអនាគត៕
Article by HEM SOKKHIM
