ជីវិតក្រៅឆាករបស់អ្នកស្រី អ៊ុំ សក្ខណា ដែលគ្រងតំណែងតួម្តាយក្នុងភាពយន្តខ្មែរ ២០ឆ្នាំមកហើយ!
NEWS 6 years agoបើនិយាយពីឈ្មោះ អ៊ុំ សក្ខណា នេះ ប្រហែលជាទស្សនិកជនមិនសូវស្គាល់ទេ តែប្រសិនបើបង្ហាញ រូបថតនោះ ពុកម៉ែបងប្អូនច្បាស់ជានឹកដល់តួដែលគាត់ធ្លាប់សម្តែងក្នុងខ្សែភាពយន្តនៅតាមកញ្ចក់ទូរទស្សន៍ ក្នុងស្រុក ឬ តាមផលិតកម្មខ្មែរនានានាពេលកន្លងមកមិនខានឡើយ។ គេតែងតែសង្កេតឃើញអ្នកស្រីនិយម ដើរតួម្តាយ ឬ សេដ្ឋីនីក្នុងរឿងបុរាណខ្មែរជាញឹកញាប់ ជាពិសេសគឺរឿងខ្លីបែបអប់រំតែម្តង។ ទោះបីជា អ្នកស្រីបានគ្រងតំណែងរហូតជាតួសេដ្ឋីនីស្លៀកពាក់តុបតែងខ្លួនជាមួយសំពត់អាវល្អៗខ្សែកចិញ្ចៀនក្រវិល ភ្លឺចិញ្ចែង ប៉ុន្តែជីវិតពិតរបស់អ្នកស្រីយ៉ាងណានោះគឺពុំសូវមានអ្នកណាបានដឹងច្បាស់នោះទេ។ តើតួសេដ្ឋីនី អ៊ុំ សក្ខណា ពិតជាមានបញ្ហាក្នុងជីវិតរស់នៅដូចពាក្យចចាមអារាមលើបណ្តាញហ្វេសប៊ុកមែនឬ?
ជួបជាមួយអ្នកយកព័ត៌មានរបស់គេហទំព័រទស្សនាវដ្តីសូវរីននៅព្រឹកថ្ងៃទី០៣ ខែវិច្ឆិកា នេះ អ្នកស្រី អ៊ុំ សក្ខណា ឬ ដែលអ្នកសិល្បៈក្មេងៗនិយមហៅថា «ម៉ែនឿន» វ័យជាង៥០ឆ្នាំ បានរៀបរាប់ថា សព្វថ្ងៃអ្នកស្រី ពិតជាមានវិបត្តិផ្នែកជីវភាពប្រចាំថ្ងៃពិតមែន ដោយសារកម្រៃដែលបានមកពីការថតខ្សែភាពយន្តតិចតួចពេក មិនអាចទប់ទល់នឹងការចំណាយលើបន្ទុកគ្រួសារបាន ជាពិសេសម្តាយចាស់ជរារបស់អ្នកស្រីដែលមានវ័យ រហូត៩៥ឆ្នាំកំពុងរស់នៅម្តុំពេជ្រនិល ហើយព្រមទាំងមានអាការៈបាត់បង់ស្មារតី (ការចងចាំ) ថែមទៀតផង «ម្តាយខ្ញុំចាស់ គាត់វង្វេង ផង គាត់ដឹងតែទារពិសានេះ ពិសានោះ ទិញថ្នាំនេះ ថ្នាំនោះ។ ថ្ងៃមុនគាត់ឈឺ ធ្ងន់ដែរ សឹងតែថាមិននៅផង! នៅតាមខេត្ត សេរ៉ូមថោកដែរតែ៣ម៉ឺនទេ ប៉ុន្តែធម្មតាយើងរកអត់បានឲ្យ (ថ្លៃ សេរ៉ូម)គេទៀត ពេលគាត់ឈឺម្ដងៗ» តារាជើងចាស់រូបនេះនិយាយទាំងក្តុកក្តួលទឹកភ្នែករលីងរលោង។ «ខ្ញុំត្រូវតែប្រឹងរកដើម្បីគាត់ ទោះបីជាត្រូវជំពាក់គេយ៉ាងណាក៏ដោយ ខ្ញុំមិនឲ្យម្តាយខ្ញុំខ្វះទេ សុខចិត្ត អត់ខ្លួនឯង» នេះជាសម្តីពិតចេញពីបេះដូងរបស់កូនស្រីម្នាក់ដែលមានងារជាតួកុន ប៉ុន្តែពុំមានលទ្ធភាព ធូរធារហ៊ឺហារហឹកហ៊ាក់អាចផ្គត់ផ្គង់ជីវភាពក្រុមគ្រួសារបាន។ ហេតុអ្វីបានជាបែបនេះ? អ្នកស្រីបានពន្យល់ ថា ចំណូលរបស់អ្នកស្រីគឺពឹងផ្អែកទាំងស្រុងតែលើអាជីពសិល្បៈសម្តែងមួយមុខប៉ុណ្ណោះ។ ក្នុងមួយខែ អ្នក ស្រីសម្តែងបានតែពីរបីថ្ងៃ ដែលក្នុងមួយថ្ងៃបានកម្រៃពីការថតត្រឹមតែ៥០-៦០ដុល្លារប៉ុណ្ណោះ។ ជាអកុសល ចាប់តាំងពីមុនភ្ជុំបិណ្ឌរហូតមកដល់សព្វថ្ងៃនេះ អ្នកស្រីពុំទទួលបានការហៅថតពីស្ថានីយ៍ទូរទស្សន៍ឬផលិតកម្មណាមួយទាល់តែសោះ «ខ្ញុំមិនលាក់បាំងទេ តាំងពីបិណ្ឌ១ដល់បិណ្ឌ១៥ ខ្ញុំគ្មានលុយសូម្បីតែទៅវត្តបាន មួយវត្តនឹងគេ។ គេបបួលខ្ញុំដែរ តែខ្ញុំចេះតែប្រកែក ព្រោះធ្វើម៉េចបើយើងគ្មានលុយសោះ»។
Image Courtesy: Um Sakkana
អ្វីដែលធ្វើឲ្យទស្សនិកជនទាំងឡាយនឹកស្មានមិនដល់នោះគឺតារាសម្តែងរូបនេះពុំមានផ្ទះសម្បែងខ្លួនឯងឡើយ ពោលគឺសព្វថ្ងៃអ្នកស្រីកំពុងស្នាក់នៅផ្ទះជួលជាន់ទីបីម្តុំផ្សារឌុយម៉ិច ក្នុងសង្កាត់វាលវង់ ខ័ណ្ឌ ៧មករា អស់រយៈពេលប្រមាណ៥ឆ្នាំមកហើយ។ ពេលខ្លះអ្នកស្រីរកប្រាក់សម្រាប់បង់ថ្លៃផ្ទះជួលសឹងមិន បានផង។ ក្នុងមួយខែ ត្រូវចំណាយលើថ្លៃឈ្នួលផ្ទះ ថ្លៃទឹក ថ្លៃភ្លើង និង ចំណាយសំខាន់ៗអស់២០០ដុល្លារ។ មិនត្រឹមតែប៉ុណ្ណោះ អ្នកស្រីនៅតែមានចិត្តសន្តោសជួយចិញ្ចឹមបងស្រីបង្កើតដែលមានជម្ងឺជាយូរឆ្នាំណាស់ មកហើយ និង ក្មួយៗចំនួន០៤នាក់ទៀតក្នុងបន្ទុកជាមួយគ្នា។ អ្នកស្រីតែងតែឆ្លៀតពេលទំនេរពីថតកុន ទៅមើលម្តាយនៅឯពេជ្រនិលមិនដែលខាន បើទោះបីជាអ្នកស្រីត្រូវចំណាយសោហ៊ុយថ្លៃឡានទាំងដែល ពេលខ្លះអ្នកស្រីរកលុយឲ្យថ្លៃឡានសឹងតែមិនគ្រប់ផង។
ក្រៅពីបញ្ហាបន្ទុកក្រុមគ្រួសារ អ្នកស្រីក៏ជួប ការលំបាកជាច្រើនក្នុងការចេញទៅថតកុនម្តងៗដែរ ព្រោះអ្នកស្រីត្រូវខំតស៊ូជិះឡានក្រុងផង ម៉ូតូឌុបផង ដើម្បីបានបម្រើវិស័យសិល្បៈទី៧នេះដល់សព្វថ្ងៃ។ «បើខ្ញុំជិះទៅដល់ផ្ទះម្ចាស់ផលិតកម្មផ្ទាល់វាថ្លៃ អស់២០០០០ (រៀល) ដូច្នេះខ្ញុំសុខចិត្តទ្រាំជិះឡានក្រុងអស់ តែ១៥០០ (រៀល) ហើយជិះរ៉ឺម៉កបន្តទៅគីឡូលេខ៦ អស់តែ ១០០០ ទេ ហើយជិះម៉ូតូឌុបចេញពីព្រែកព្នៅ ទៅថតដល់វត្តប្រាសាទ អស់៥០០០-៧០០០ទៀតទៅ។» អ្នកស្រីសុខចិត្តយួរធុងដាក់ប្រហុក កន្ទុយហែស ដែលបងស្រីរបស់អ្នកស្រីធ្វើផ្ទាល់ ស្ពាយតាមឡានក្រុងទៅលក់នៅទីតាំងថត។ ដោយសារការអាណិតស្រឡាញ់ តួកុនផ្សេងៗដែលថតរឿងជាមួយគ្នាចេះតែជួយទិញដើម្បីឲ្យអ្នកស្រីបានប្រាក់គ្រាន់នឹងទប់ទល់ជីវភាពខ្លះៗ។
Image Courtesy: Um Sakkana
គួររំឭកផងដែរថា អ្នកស្រី អ៊ុំ សក្ខណា បានចូលប្រឡូកអាជីពសិល្បៈសម្តែងក្នុងឆ្នាំ១៩៨៩ តាមរយៈ ស្នាដៃខ្សែភាពយន្តដំបូងដែលមានចំណងជើងថា «បេះដូងរហែក»។ ក្រោយមក លោកស្រីបានចូលរួម សម្តែងខ្សែភាពយន្តជាបន្តបន្ទាប់ទៀត សរុបប្រហែល២០រឿង ដូចជា រឿងវងអើយស្រីវង រឿងទុកស្នេហ៍ជូន បង រឿងខ្លុយកម្មប្រចាំស្នេហ៍ រឿងកូនក្រកវេទមន្ត រឿងបុប្ផាពស់វែក ជាដើម។ តួល្បីៗជំនាន់នោះដែលអ្នក ស្រីធ្លាប់បានសម្តែងជាមួយរួមមាន លោកទេព រិន្ទដារ៉ូ លោកខៃ ប្រសិទ្ធ លោក ហម ឈរ៉ា លោក ហង្ស ផល្លីមធុរា លោក យុត្ថារ៉ាឆានី លោក ឧត្តម បូទី លោក បេ វណ្ណារ៉ា អ្នកនាង អម្ពរ ទេវី អ្នកនាង សុខ ស្រីមុំ អ្នកនាង ពិសិដ្ឋ ពីលីកា និង អ្នកនាង សួស សុគន្ធា ។ល។
លុះមកដល់ទ.វ.ឆ្នាំ២០០០ អ្នកស្រីបានបន្តសម្តែងខ្សែភាពយន្តជាបន្តបន្ទាប់ក្នុងនោះដូចជា រឿងចាប ស្រុកនៅព្រៃ រឿងកែវណាម៉ា រឿងផ្ទះខ្មោចទិញ រឿងប៉ីស្នេហ៍នាងហង្ស រឿងមុនដំបូងខ្មែរក្រហមសម្លាប់ប៉ាខ្ញុំ រឿងឃុនឆាងឃុនផែន រឿងកំហឹងអ្នកស្រុក រឿងបំណុលស្នេហ៍ រឿងវិញ្ញាណជ្រែកបេះដូង ព្រមទាំងរឿង កំប្លែង និង ស្ប៉តអប់រំ ជាច្រើនផងដែរ។ កាលពីពេលថ្មីៗនេះ រឿងខ្លីដែលមានចំណងជើងថា «ទឹកដោះម្តាយថ្លៃ» ដែលមានតួអង្គអ្នកស្រីសម្តែងសម្រាប់ឱកាសរដូវបុណ្យភ្ជុំបិណ្ឌ ផលិតដោយផលិតកម្ម BN អមដោយបទចម្រៀងរបស់ កញ្ញា ទៀង មុំ សុធាវី ដែលមានការចុចទស្សនាជាង១សែនដង។
ជាចុងក្រោយ អ្នកស្រីសូមអំពាវនាវដល់បណ្តាផលិតករទាំងអស់មេត្តាជួយទាក់ទងហៅអ្នកស្រីថត ភាពយន្តឲ្យបានច្រើនដើម្បីដោះស្រាយបញ្ហាជីវភាព និង លើកទឹកចិត្តសិល្បការិនីជើងចាស់ដូចជាអ្នកស្រី ដែលមានបទពិសោធន៍ក្នុងការសម្តែងជិត៣០ឆ្នាំទៅហើយ។ ប្រសិនបើមានផលិតករឬសប្បុរសជនមានចិត្ត អាណិតអាសូរចង់ទាក់ទងការងារឬឧបត្ថម្ភទោះតិចក្តីច្រើនក្តី លោកអ្នកអាចទាក់ទងតារាសម្តែងរៀមច្បង អ៊ុំ សក្ខណា បានតាមរយៈលេខទូរស័ព្ទ ០១២ ៩៤១ ៩០៨ ដោយក្តីគោរពរាប់អាន៕
Article by SRIN SOKMEAN
Image Courtesy: Um Sakkana
រឿងកូនក្រកវេទមន្ត
រឿងកូនក្រកវេទមន្ត