មុននឹងជ្រើសរើសការប្រើប្រាស់ផលិតផលថែសម្រស់ណាមួយ ប្រាកដណាស់ថាអ្នករាល់គ្នានឹងស្វែងរកព័ត៌មានអំពីផលិតផលនោះយ៉ាងល្អិតល្អន់ថាតើវាពិតជាមានប្រសិទ្ធភាពជាមួយនឹងប្រភេទស្បែករបស់អ្នកដែរឬទេ ប៉ុន្តែមនុស្សមួយផ្សេងទៀតជ្រើសរើសផលិតផលបន្ទាប់ពីពួកគេទស្សនាអ្នកវាយតម្លៃលើផលិតផល (Reviewer) នៅលើបណ្តាញសង្គម ហើយនេះជាកត្តាមួយដែលធ្វើឲ្យពួកគេពុំអាចស្វែងរកផលិតផលដែលស័ក្តិសមសម្រាប់ប្រភេទស្បែករបស់ពួកគេនោះទេ។ នេះជាហេតុដែល សូវរីន នឹងបង្ហាញពីកំហុសសាមញ្ញ៤យ៉ាងដែលអ្នកកំពុងតែបំផ្លាញសម្រស់របស់ខ្លួនដោយមិនដឹងខ្លួនដូចខាងក្រោម៖
១. ការប្រើប្រាស់ផលិតផលខុសពីប្រភេទស្បែក
រាល់ផលិតផលនីមួយៗសុទ្ធសឹងតែមានសារធាតុផ្សំផ្សេងៗពីគ្នាទៅតាមប្រភេទស្បែកមុខរបស់មនុស្សម្នាក់ៗជាដើម។ យ៉ាងណាមិញ បើតាមការសង្កេតរបស់ក្រុមអ្នកជំនាញលើផ្នែកសម្រស់បានឲ្យដឹងថា ស្ទើរតែគ្រប់វ័យទៅហើយដែលកំពុងជ្រើសរើស និងប្រើប្រាស់ផលិតផលខុសពីប្រភេទស្បែករបស់ពួកគេ តួយ៉ាង ភាគច្រើនគេជ្រើសរើសផលិតផលតាមអ្នកវាយតម្លៃ (Reviewer) តែប៉ុណ្ណោះ ប៉ុន្តែអ្នកវាយតម្លៃផលិតផលទាំងនោះពុំដែលបង្ហាញពីផលអវិជ្ជមាននៃផលិតផលទាំងនោះឡើយ។ ហេតុដូចនេះ អ្នកគួរតែស្រាវជ្រាវពីផលិតផលដោយខ្លួនឯងមុននឹងប្រើប្រាស់ចៀសវៀងការប្រើប្រាស់ផលិតផលខុសដែលធ្វើឲ្យខូចសម្រស់។
២. មិនទម្លាប់ធ្វើការជម្រុះកោសិកាចាស់ៗ
ការជម្រុះកោសិកាចាស់ៗ ពិតជាផ្តល់អត្ថប្រយោជន៍សំខាន់ចំពោះសុខភាពស្បែក ជាពិសេស ស្បែកមុខតែម្តងដែលទាមទារតម្រូវឲ្យអ្នកធ្វើការជម្រុះកោសិកាចាស់ៗដែលច្រើនបំផុតនោះគឺ២ដងក្នុងមួយសប្តាហ៍ ដើម្បីកម្ចាត់ស្នាមអុជខ្មៅ ឬស្នាមក្រោយពីធ្វើការញេចមុន។ យ៉ាងណាមិញ តាមរយៈការជម្រុះកោសិកាចាស់ៗនេះនឹងផ្លាស់ប្តូរស្បែកមុខរបស់អ្នកភ្លឺថ្លា និងធ្វើឲ្យស្បែកមុខឆាប់ជ្រាបចូលស្បែកមុខនៅពេលអ្នកប្រើប្រាស់ផលិតផលថែរក្សាសម្រស់។
៣. ការមិនលាងសម្អាតមុខមុនចូលដំណេក
ការមិនលាងសម្អាតមុខមុនចូលដំណេក គឺជាសញ្ញាមួយដែលផ្តល់ផលអវិជ្ជមានចំពោះស្បែកមុខ ជាពិសេស គ្រឿងសម្អាង ឬបាក់តេរីផ្សេងៗនៅលើស្បែកមុខនឹងបំផ្លាញស្រទាប់ស្បែកអាចបណ្តាលឲ្យស្បែកមុខអ្នកមានកន្ទួលក្រហម របកស្បែកមុខ ហើមភ្នែក ឬភ្នែកឡើងក្រហម និងមួយវិញទៀតនោះវាបង្ករស្នាមជ្រួញថែមទៀតផង។ ហេតុដូច្នេះហើយ ប្រសិនបើអ្នកកំពុងមានទម្លាប់មិនលាងសម្អាតមុខមុនចូលដំណេកនោះ អ្នកគួរតែធ្វើការពិចារណា និងផ្លាស់ប្តូរទម្លាប់របស់អ្នកទើបប្រសើរ។
៤. ជម្រុះកោសិកាចាស់ច្រើនពេក
ថ្វីដ្បិតតែអ្នកជំនាញអះអាងថា ការជម្រុះកោសិកាចាស់ៗផ្តល់ផលល្អចំពោះស្បែកក៏ដោយ ប៉ុន្តែប្រសិនបើអ្នកធ្វើការជម្រុះកោសិកាចាស់ច្រើនដងពេកក្នុងមួយសប្តាហ៍វានឹងធ្វើឲ្យស្បែកមុខរបស់អ្នកកាន់តែស្តើងជាបន្តបន្ទាប់ និងបាត់បង់នូវសមាសភាពនៃរនាំងការពារបាក់តេរីដែលមានលើស្បែកមុខរបស់អ្នកជាមិនខាន។ ដូចដែរបានបង្ហាញខាងលើនេះដែរ យល់ល្អ អ្នកគួរតែជម្រុះកោសិកាចាស់ៗយ៉ាងច្រើនបំផុត២ដងក្នុងមួយសប្តាហ៍៕
Article by PAN SIVLY