Sovrin
Sovrin
គន្លឹះងាយៗ ការពារសម្រស់ Makeup ទោះស្ថិតក្នុងអាកាសធាតុក្តៅ
TRAVEL & LIVING 2 weeks ago
គ្រឿងតុបតែងក្រែមម្សៅរមែងផ្តល់ទំនុកចិត្តដល់ស្ត្រីគ្រប់ពេលវេលា តែទន្ទឹមគ្នានេះ គ្រឿងក្រែមម្សៅក៏អាចធ្វើឱ្យស្ត្រីបាត់បង់ទំនុកចិត្តនៅពេលសម្រស់ Makeup ចាប់ផ្តើមធ្លាក់ចុះ ដូចជាឡើងប្រេងឬរលាយជាដើម។ បច្ចុប្បន្ន អាកាសធាតុកើនឡើងកម្តៅច្រើនអង្សា ការបែកញើសបានក្លាយជាអាវុធដ៏មុតស្រួចដែលអាចបំផ្លាញសម្រស់ Makeup ត្រឹមតែមួយប៉ប្រិចភ្នែក។ ហេតុដូច្នេះ វាពិតជាចាំបាច់ដែលសុភាពនារី គួរគិតគូរឡើងវិញនូវរបៀបផាត់មុខដែលអាចទប់ទល់ ក៏ដូចជាបត់បែនទៅតាមកាលៈទេសៈ។ ខាងក្រោមនេះ សូវរីន នឹងបង្ហាញសុភាពនារីអំពីគន្លឹះតូចតាច តែអាចទប់ជាប់សម្រស់ផាត់ទោះស្ថិតក្នុងអាកាសធាតុក្តៅ ឬក្តៅលាយឡំសំណើមយ៉ាងណាក៏ដោយ។
ហេតុអ្វី Primer ពិតជាចាំបាច់? ការប្រើ Primer ត្រូវបានគេចាត់ទុកជាទ្រនាប់ដ៏សំខាន់មុនពេលផាត់មុខ វាជួយរក្សាសម្រស់ផាត់ជាប់បានយូរ ហើយថែមទាំងធ្វើឱ្យការផាត់ម្សៅជាន់បន្តបន្ទាប់ចូលបានល្អផងដែរ។ មិនថាបែកញើសប៉ុនណា Primer នៅតែការពារម្សៅ និងរក្សាសម្រស់ Makeup មិនឱ្យរលាយ។ បន្ទាប់ពីលាប BB ឬ CC Cream ឬឡេការពារកម្តៅថ្ងៃ សុភាពនារីអាចប្រើ Primer ពីលើ រួចទើបចាប់ផ្តើមផាត់ម្សៅតាមក្រោយ។
មើលសាច់ម្សៅឡើងវិញ! រដូវកាលផ្លាស់ប្តូរ ការប្រើប្រាស់គ្រឿងតុបតែងមុខក៏តម្រូវប្រែប្រួលទៅតាមនោះដែរ។ សម្រាប់អាកាសធាតុក្តៅ ការប្រើគ្រឿងផាត់ដែលមានសាច់ក្រាស់ សាច់ធ្ងន់ មានជាតិប្រេង ឬប្រភេទគ្រីម វាមិនសមស្របឡើយ ពោលវានឹងធ្វើឱ្យម្សៅកាន់តែឆាប់រលាយ ឡើងប្រតាក ហើយអាចកកទៀតផង។ ជំនួសឱ្យគ្រឿងតុបតែងទាំងនេះ សុភាពនារីអាចបង្វែរមកប្រើគ្រឿងផាត់មុខដែលមានសាច់ស្រាល និងធ្វើការផាត់បែបស្តើងៗរាប់តាំងពី ម្សៅទ្រនាប់ ម្សៅផាត់ ហាយឡាយ ម៉ាស្ការ៉ា រហូតដល់ពណ៌ថ្ពាល់។ ការប្រើម្សៅផាត់ប្រភេទហុយជាជម្រើសល្អបំផុត។ ជាពិសេសកុំភ្លេចប្រើក្រែមរលោងលាបបបូរមាត់ ដើម្បីការពារពីពន្លឺព្រះអាទិត្យ។
ច្បាស់អត់ថារបស់ប្រើធន់នឹងទឹក? ការប្រើផលិតផលមកជាមួយរូបមន្តធន់នឹងទឹក ឬ waterproof វាពិតជាស័ក្តិសមបំផុតសម្រាប់ការពារសម្រស់ Makeup មិនឱ្យរលាយនៅក្នុងអាកាសធាតុក្តៅ។ ផលិតផលរូបមន្ត waterproof វាក៏សមស្របនឹងការប្រើប្រាស់នៅរដូវភ្លៀង ដែលជួយទប់ទល់នឹងសំណើមផងដែរ។ ដូច្នេះសាកមើលឡើងវិញមើល! ថាតើផលិតផលដែលអ្នកកំពុងប្រើប្រាស់មានមកជាមួយរូបមន្ត waterproof ដែរឬអត់? បើអត់គួរតែបញ្ជាទិញឥឡូវនេះ។
កុំភ្លេច! Spray ជាអាថ៌កំបាំងដ៏សំខាន់ យើងច្រើនតែហៅថា Spray បាញ់ទប់ Makeup ដែលជាទូទៅវាជា Setting Spray ដែលរក្សាសម្រស់ផាត់មុខឱ្យនៅជាប់បានយូរ។ ការបាញ់ Spray ធ្វើឡើងនៅពេលការផាត់មុខបានរួចរាល់ទាំងស្រុង។ បើចំពោះអ្នកជំនាញផាត់មុខ ពេលផាត់ឱ្យតារាម៉ូឌែលឬតារាសម្តែង គេច្រើនប្រើ Spray បាញ់ទៅលើគ្រប់ស្រទាប់ Makeup បានន័យថា បន្ទាប់ពីលាបម្សៅទ្រនាប់ គេបាញ់ម្តង បន្ទាប់ពីផាត់ម្សៅ គេបាញ់ម្តង និងបន្ទាប់ពីផាត់ពណ៌ គេបាញ់ម្តងដូច្នោះឯង។ ការធ្វើដូចនេះ ដោយសារតែតារាម៉ូឌែលឬសម្តែង ត្រូវប្រើពេលច្រើនម៉ោងនៅក្នុងការថត ដែលសំខាន់វាធ្វើឱ្យមើលទៅមានលក្ខណៈឥតខ្ចោះនៅក្នុងកាមេរ៉ា។ ដោយឡែកចំពោះសុភាពនារីផាត់មុខប្រចាំថ្ងៃវិញ អ្នកមិនចាំបាច់ប្រើច្រើនតង់ អាចត្រឹមបាញ់ពេលផាត់មុខរួចរាល់ក៏ជាការស្រេច។
ដាក់គ្រឿងប៉ះប៉ូវតាមខ្លួន... ទោះទប់ទល់សម្រស់ផាត់ជាប់ ប៉ុន្តែពេលខ្លះញើស និងប្រេងនៅតែកើតមានឡើងនៅលើស្បែក។ មិនជាថ្វី! សុភាពនារីគ្រាន់តែត្រៀមរបស់តាមខ្លួនតែប៉ុន្មានមុខជាការស្រេច។ ក្នុងនោះមានដូចជា៖ ផលិតផលក្រដាសផ្តិតប្រេង ទុកផ្តិតថ្នមៗនៅត្រង់ថ្ងាស ក្រោមភ្នែក និងតំបន់ T-zone (ពីថ្ងាសចុះមកច្រមុះ ដល់ចង្កា), មានក្រែមលាបបបូរមាត់ប្រភេទទឹករលោង អាចជាពណ៌ផ្កាឈូកបែបធម្មជាតិ ឬពណ៌ស្រាលបែប nude សម្រាប់លាបឡើងវិញក្រោយពេលផឹកភេសជ្ជៈឬញុំាអាហារ និងមួយទៀតម្សៅផាត់ ត្រូវប្រើជក់ផាត់ស្រាលៗសម្រាប់ជាការបន្ថែមភាពភ្លឺរលោងឡើងវិញនៃស្បែក៕
Article by HEM SOKKHIM (ZM)
