ជីវិតសម័យទំនើបអាចមានភាពមមាញឹក និងពោរពេញដោយភាពតានតឹង។ តើអ្នកក្រងងុយគេងណាស់មែនទេ? សម្រាប់អ្នកដែលមានអាការៈពិបាកគេងលក់ ការបន្ធូរអារម្មណ៍ដោយសម្រួលផ្លូវចិត្ត និងកាយឲ្យគេងបានលក់ស្រួលវាពិតជាមិនងាយស្រួលនោះទេ។ ទម្លាប់នៃការចូលគេងលឿនទៀងទាត់វាពិតជាជួយដល់សុខភាពផ្លូវចិត្ត និងរាងកាយរបស់អ្នកឲ្យប្រសើរឡើងយ៉ាងខ្លាំង។ ដូច្នេះប្រសិនបើប្រិយមិត្តកំពុងតែជួបនូវបញ្ហាទាំងនេះ សូវរីនសូមណែនាំវិធីសាស្រ្ដនៃការបន្ធូរអារម្មណ៍ដែលមានប្រយោជន៍សម្រាប់អ្នកបំផុត។
1. បិទឧបករណ៍បច្ចេកវិទ្យា
ការស្រាវជ្រាវរបស់អ្នកវិទ្យាសាស្ត្រនៅស្ថាប័ន American Institutions of the National Sleep Foundation(NSF) បានរកឃើញថា ការប្រើប្រាស់ទូរស័ព្ទដៃ ឬមើលទូរទស្សន៍ និងកុំព្យូទ័រមុនពេលចូលគេងអាចប៉ះពាល់ដល់ប្រព័ន្ធសរសៃប្រសាទ និងរាងកាយយ៉ាងខ្លាំង ដែលជាមូលហេតុមួយក្នុងការធ្វើឲ្យអ្នកគេងមិនលក់។ ដោយហេតុនេះ អ្នកគួរតែជៀសវាងក្នុងការប្រើប្រាស់ឧបករណ៍ទាំងនោះយ៉ាងហោចណាស់មួយម៉ោងមុនពេលចូលគេង ដើម្បីឲ្យសរីរាង្គរបស់អ្នកដំណើរការល្អដែលងាយស្រួលក្នុងការគេងលក់បានយ៉ាងឆាប់រហ័សទៀតផង។
2. ហាត់យូហ្គា
លំហាត់ប្រាណបែបយូហ្គាជួយបន្ធូរអារម្មណ៍របស់អ្នកដោយកាត់បន្ថយភាពតានតឹង បន្ទាប់ពីអ្នកមកពីធ្វើការ ឬសិក្សារួច។ អ្នកស្រាវជ្រាវបានរកឃើញថាសកម្មភាពសមាធិដូចជាយូហ្គាមានអត្ថប្រយោជន៍យ៉ាងខ្លាំងសម្រាប់សុខភាពដំណេកហើយប្រសិនជាមានអារម្មណ៍ថាធ្លាក់ទឹកចិត្តវានឹងជួយឲ្យអារម្មណ៍របស់អ្នកប្រសើរឡើងវិញផងដែរ។
3. ងូតទឹកក្តៅឧណ្ហៗ
ការងូតទឹកក្តៅឧណ្ហៗ ១៥ទៅ៣០នាទីមុនពេលចូលគេងគឺជាវិធីដ៏ល្អមួយដែលអាចជួយកាត់បន្ថយអារម្មណ៍តប់ប្រមល់ ឬមួម៉ៅ។ ការងូតទឹកក្តៅឧណ្ហៗអាចជួយឱ្យរាងកាយរបស់អ្នកទទួលនូវអារម្មណ៍ស្រស់ស្រាយ។ វានឹងកាន់តែប្រសើរជាងនេះ ប្រសិនជាអ្នកបន្ថែមសូរតន្ត្រី ឬប្រេងក្រអូបនៅក្នុងបន្ទប់ទឹក។
4. ដកដង្ហើមវែងៗតាមសម្រួល
អ្នកអាចទប់ទល់នឹងប្រព័ន្ធសរសៃប្រសាទរបស់អ្នកដែលមិនងងុយគេងដោយប្រើវិធីសាស្រ្ដដកដង្ហើមចេញ និងចូលឲ្យវែងៗ។ បិទភ្នែករបស់អ្នក ហើយដកដង្ហើមចេញ និងចូលវែងៗតាមច្រមុះ ដោយរាប់ដល់ប្រាំ។ បន្ទាប់មកដកដង្ហើមយឺតៗតាមមាត់របស់អ្នក ដោយរាប់ត្រឹមប្រាំវិញម្តង។ វាអាចធ្វើឲ្យចង្វាក់បេះដូងរបស់អ្នកលោតលឿនបន្ដិច ដូច្នេះសូមបន្តបន្ថែមនាទី រហូតដល់អ្នកមានអារម្មណ៍ថាចង្វាក់បេះដូងរបស់អ្នកថយចុះមកធម្មតាវិញ។ សូមផ្ដោតលើការដកដង្ហើមរបស់អ្នកតែមួយប៉ុណ្ណោះ ហើយព្យាយាមគិតតែរឿងល្អៗ ដោយតាំងចិត្តកុំគិតពីអ្វីដែលអ្នកសោកស្ដាយ ឬមិនសប្បាយចិត្តក្នុងអំឡុងពេលនោះឲ្យសោះ។
5. គេងក្នុងបន្ទប់ងងឹត
ការគេងនៅក្នុងបន្ទប់ដែលងងឹតគឺមានសារៈសំខាន់ខ្លាំងណាស់សម្រាប់ការសម្រាកខួរក្បាល ដែលជួយឲ្យអ្នកងាយនឹងងងុយគេងផងដែរ។ មេឡាតូនីន(melatonin)គឺជាអ័រម៉ូនជួយជំរុញដល់ការគេង ដែលងាយនឹងរងការប៉ះពាល់ពីពន្លឺ។ ដូច្នេះអ្នកគួរតែពិនិត្យមើលថាតើបន្ទប់របស់អ្នកមានពន្លឺខ្លាំងដែររឺទេ? ប្រសិនបើអ្នកនៅក្នុងទីក្រុងដែលមានភ្លើងបំភ្លឺផ្លូវច្រើននៅខាងក្រៅបង្អួច អ្នកគប្បីទិញវាំងនន ឬម៉ាសសម្រាប់បិទភ្នែកក៏ជាការល្អ។ ប្រិយមិត្តទាំងឡាយអាចសាកល្បងយុទ្ធសាស្ត្រខាងលើនេះវាអាចជាផ្នែកមួយនៃទម្លាប់ដ៏ល្អនាពេលយប់សម្រាប់អ្នក៕
Article by NI CHANNIKA