SOVRIN Magazine

តិកនិកសម្រិតសម្រាំងប្រេងដែលមានគុណភាពល្អសម្រាប់ប្រើប្រាស់នៅផ្ទះ

TRAVEL & LIVING 4 years ago

យោងតាមគេហទំព័ររបស់អង្គការវេជ្ជសាស្រ្តផ្នែកបេះដូងមួយរបស់ប្រទេសញូវហ្សេលែនដែលមានឈ្មោះថា www.heartfoundation.org.nz ប្រេងដែលមានគុណភាពល្អដែលលោកអ្នកគួរជ្រើសរើសប្រើគឺអា ស្រ័យលើកំរិតខ្លាញ់នៅក្នុងប្រភេទប្រេងនីមួយៗ វិធីសាស្រ្តចម្រាញ់យកប្រេង និង ការថែទាំទុកដាក់ប្រេងឲ្យបានត្រឹមត្រូវតាមស្តង់ដារបច្ចេកទេស។ ប្រេងដែលមានគុណភាពល្អត្រូវតែជាប្រភេទប្រេងដែលផ្ទុកជាតិខ្លាញ់មិនឆ្អែតចំនួនពីរប្រភេទ គឺ ខ្លាញ់មិនឆ្អែតប្រភេទប៉ូលី (poly-saturated) និងខ្លាញ់មិនឆ្អែតប្រភេទម៉ូណូ (mono-saturated) ។ ប្រភេទរុក្ខជាតិដែលសម្បូរខ្លាញ់ទាំងពីរប្រភេទនេះគឺគ្រាប់រុក្ខជាតិ (ឧទា: ផ្កាឈូករ័ត្ន, ទំពាំងបាយជូរ, សណ្តែកដី) គ្រាប់ធញ្ញជាតិ (ឧទា: ស្រូវសាលី, ល្ង, សណ្តែក) ផ្លែអាវ៉ូកាដូ ឬ ផ្លែប៊័រ, ផ្លែអូលីវ និង ពពួកបន្លែដែលអាចកាត់បន្ថយអត្រាសារធាតុកូឡេស្តឺរ៉ល (Cholesterol) នៅក្នុងឈាម។ ផ្ទុយទៅវិញ ប្រេងដូងដែលជាប្រភេទប្រេងដែលប្រជាជនពេញនិយមជាទូទៅនោះសម្បូរខ្លាញ់ឆ្អែត (saturated) កម្រិតខ្ពស់ដែលបង្កើនកូឡេស្តឺរ៉លប្រភេទ LDL (Low Density Lipoprotein) ដែលអាចបង្កហានិភ័យនៃជំងឺបេះដូង។ ដូចនេះ លោកអ្នកគួរជ្រើសរើសប្រេងធញ្ញជាតិជំនួសប្រេងដូង ឬ ប្រេងត្នោត។

ទន្ទឹមនឹងនេះ ចំណុចមួយទៀតដែលលោកអ្នកត្រូវពិចារណាមុននឹងសម្រេចចិត្តទិញផលិតផលប្រេងណាមួយយកមកផ្ទះនោះគឺ ថាតើប្រេងនោះត្រូវបានចម្រាញ់តាមវិធីណា។ ជាធម្មតា ប្រេងត្រូវបានចម្រាញ់តាមវិធីសាស្រ្តចំនួនបីយ៉ាងសំខាន់ៗ គឺ វិធីចម្រាញ់តាមបែបត្រជាក់ វិធីចម្រាញ់តាមបែបក្តៅ និង វិធីចម្រាញ់ដោយអង្គធាតុរំលាយ។ ប្រភពដដែលបានបង្ហាញឲ្យឃើញថា ប្រេងដែលមានគុណភាពល្អគឺប្រេងដែលត្រូវបានចម្រាញ់ដោយវិធីទី១ និង វិធីទី២ ព្រោះវិធីទាំងពីរនេះធ្វើឲ្យយើងទទួលបាននូវគុណភាពប្រេងបរិសុទ្ធបែបធម្មជាតិ ដូចជា ប្រេងអូលីវ និង ប្រេងថ្លែប៊័រ ដែលសម្បូរផ្ទុកសារធាតុអង់ទីអុកស៊ីតករ (Antioxidant) ដែលជួយថែរក្សារសជាតិដើម និង ពណ៌ប្រេងដើមបានយ៉ាងល្អប្រសើរ។ ផ្ទុយទៅវិញ ប្រេងដែលត្រូវបានចម្រាញ់ដោយវិធីទី៣ ត្រូវបានឆ្លងកាត់ការកែច្នៃជាច្រើនដំណាក់កាល រួមមាន ការចំហៀវប្រេង ការធ្វើឲ្យ ប្រេងសថ្លា និង ការបំបាត់ក្លិនពីធម្មជាតិនៃប្រេង ជាដើម ដែលសុទ្ធសឹងតែធ្វើឲ្យរសជាតិ ក្លិន និង ពណ៌ប្រេងដើមបាត់បង់ជាច្រើនព្រមទាំងកាត់បន្ថយកម្រិតអង់ទីអុកស៊ីតករមួយចំនួនថែមទៀតផង។ ប្រេងប្រភេទ ចុងក្រោយនេះជាធម្មតាមានដាក់លក់យ៉ាងទូលំទូលាយនៅតាមទីផ្សារនានា ហើយតម្លៃធូរថ្លៃជាងប្រេងទាំងពីរប្រភេទខាងលើព្រមទាំងធន់នឹងសីតុណ្ហភាពក្តៅខ្លាំងទៀតផង ក្នុងនោះរួមមាន ប្រេងសណ្តែក ប្រេងកន្ទក់ និង ប្រេងទំពាំងបាយជូរ។

ក្រៅពីកត្តាវិធីសាស្រ្តនៃការចម្រាញ់ប្រេងដែលលោកអ្នកគួរយល់ដឹង លោកអ្នកក៏ត្រូវឈ្វេងយល់ឲ្យបានច្បាស់អំពីការសម្រិតសម្រាំងគុណភាពប្រេងនៅមុនពេលនិងក្រោយពេលទិញប្រេងណាមួយមកផ្ទះ។ ប្រេងគ្រប់ប្រភេទនឹងខូចគុណភាពនៅពេលដែលយើងទុកវាមិនបានត្រឹមត្រូវ បណ្តោយវាឲ្យប៉ះនឹងកម្តៅក្តៅពេក ឬត្រូវពន្លឺ និង ខ្យល់ខ្លាំងពេក។ ដូចនេះនៅពេលទៅទិញផលិតផលប្រេងណាមួយពីទីផ្សារ លោកអ្នកត្រូវពិនិត្យមើលនូវកាលបរិច្ឆេទផលិត និង កាលបរិច្ឆេទផុតសុពលភាពឲ្យបានច្បាស់លាស់មុននឹងទិញយកមកប្រើប្រាស់។ ផលិតផលប្រេងដែលល្អគឺផលិតផលដែលមានសុពលភាពក្នុងការប្រើប្រាស់ក្នុងរយៈត្រឹមតែ១២ ខែ ប៉ុណ្ណោះ។ កាលណាប្រេងទុកយូរពេក វានឹងប៉ះពាល់ដល់គុណភាពដើមនៃប្រេងនោះពុំខានឡើយ។ ចៀសវាងទិញផលិតប្រេងទាំងឡាយណាដែលមានស្តុកក្នុងឃ្លាំងក្នុងរយៈពេលយូរពេក។ ម្យ៉ាងវិញទៀត គួរទិញប្រេងដែលត្រូវបានរក្សាទុកក្នុងសីតុណ្ហភាពត្រជាក់ ច្រកក្នុងដបពណ៌ស្រអាប់ មិនស្ថិតក្រោមកម្តៅថ្ងៃ។

លើសពីនេះទៅទៀត លោកអ្នកគប្បីចៀសវាងប្រើភ្លើងខ្លាំងនៅពេលចម្អិនជាមួយប្រេង ដោយសារតែនៅពេលដែលប្រេងត្រូវបានកម្តៅក្នុងសីតុណ្ហភាពខ្ពស់ពេក ប្រេងនឹងបញ្ចេញសារធាតុគីមីមិនល្អ។ ទន្ទឹមនឹងនេះ លោកអ្នកគួរចៀសវាងការប្រើប្រាស់ប្រេងដែលត្រូវបានចម្អិនរួចម្តងមកហើយ ឬ ច្រើនដងហើយ ព្រោះនៅពេលដែលប្រេងកាន់តែមានពណ៌ខ្មៅ មានន័យថា វាកាន់តែបាត់បង់រសជាតិដើម និងបណ្តាលឲ្យមានរសជាតិ និង ក្លិនខារ មិនគួរឲ្យចង់ទទួលទានឡើយ៕

Article by SRIN SOKMEAN

SUGGESTIONS