ប្រភេទបន្លែមួយចំនួនច្រើនផ្តល់អំណោយផលតាមរដូវកាលនីមួយៗ រីឯប្រភេទបន្លែខ្លះទៀតក៏បានផ្តល់អំណោយផលយ៉ាងល្អឥតខ្ចោះស្ទើរតែគ្រប់រដូវកាលជាដើម។ ថ្វីដ្បិតតែប្រភេទបន្លែមួយចំនួនតែងផ្តល់នូវអំណោយផលដ៏ល្អពិតមែន ប៉ុន្តែក្នុងចំណោមប្រភេទបន្លែទាំងនោះត្រូវបានគេសង្កេតឃើញថាពុំសូវជាមានអ្នកទទួលទានច្រើននោះទេនៅក្នុងរដូវវស្សានេះ ក៏ព្រោះតែប្រភេទបន្លែខ្លះអាចធ្វើឲ្យពុល ឬមានការប៉ះពាល់ដល់សុខភាពផ្សេងៗ។ ហេតុដូចនេះហើយ សូវរីន នឹងបង្ហាញអ្នកពីប្រភេទបន្លែបង្ការមួយចំនួនដែលសម្បូរនៅក្នុងអំឡុងរដូវវស្សានេះ។
១. ប្រភេទបន្លែដើម
ត្រកួន ព្រលិត ធាងត្រាវ ទំពាំង ផ្សិត (ចំបើង ភ្លៅក្ងោក កញ្ចូរ) ប្រភេទបន្លែស្រុកស្រែទាំងនេះសុទ្ធសឹងតែផ្តល់ផលយ៉ាងល្អឥតខ្ចោះនារដូវវស្សានេះ។ ថ្វីដ្បិតតែបន្លែទាំងអស់នេះ ពុំមានការដាំដុះពីកសិករ ក៏ដោយ ប៉ុន្តែទន្ទឹមនឹងរដូវនេះប្រភេទបន្លែដែលបានលើកឡើងនឹងផ្តល់ផលយ៉ាងល្អឥតខ្ចោះពីធម្មជាតិ ជាពិសេស វាបានផ្តល់នូវសារធាតុសំខាន់ៗដែលរាងកាយត្រូវការ តួយ៉ាង វីតាមីន ជាតិដែកជាដើម។
២. ប្រភេទបន្លែផ្កា
កាលណាដែលនិយាយពីប្រភេទបន្លែផ្កា ប្រិយមិត្តប្រាកដជានឹកឃើញដល់បន្លែផ្កាខាត់ណាមុនគេហើយមែនទេ ប៉ុន្តែប្រភេទបន្លែផ្កាដែលខុសពីផ្កាខាត់ណាយើងក៏មានដូចជា ផ្កាល្ពៅ ផ្កាល្ហុង ផ្កាស្នោរ ផ្កាកំប្លោក ផ្កាអង្គារ៍ដីជាដើម។ ប្រភេទបន្លែទាំងនេះ ប្រជាជនរស់នៅទីក្រុង ជនបទ ស្រុកស្រែចំការច្រើននិយមយកទៅចម្អិនជាមួយនឹងទឹកប្រេងខ្យង ធ្វើជាអន្លក់ រីឯប្រភេទបន្លែទាំងអស់នេះមានភាពងាយស្រួលក្នុងការដាំដុះ ហើយអាចសន្សំពេលវេលាក្នុងការថែទាំ។ ដោយឡែក សម្រាប់ផ្កាខាត់ណាវិញប្រិយមិត្តត្រូវចំណាយយូរ ការថែទាំច្រើន ទើបទទួលបានទិន្នផលល្អជាទីគាប់ចិត្ត។
៣. ប្រភេទបន្លែស្លឹក
ប្រភេទបន្លែស្លឹកដូចជា៖ ស្លឹកផ្ទី ស្លឹកបាស ស្លឹកម្រះព្រៅ ស្លឹកល្ងៀង ស្លឹកដំឡូងជ្វា ស្លឹកខ្ទឹម ច្រើនជាបន្លែដែលមានការដុះដោយឯកឯងនៅតាមរបងផ្ទះ ឬបរិវេណដីដែលមានជីវជាតិ។ ជាក់ស្តែង នៅក្នុងអំឡុង រដូវវស្សានេះ ស្ទើរតែគ្រប់គេហដ្ឋាននៃទីជនបទ ស្រុកស្រែចំការទៅហើយដែលហុំព័ទ្ធដោយបន្លែស្លឹកនេះ។ ប្រភេទបន្លែស្លឹកខាងលើសុទ្ធតែជាប្រភេទបន្លែដែលផ្តល់នូវជីវជាតិខ្ពស់ជួយដល់ឆ្អឹងឲ្យមានភាពរឹងមាំ និងបំបាត់ភាពស្លេកស្លាំង។
៤. ប្រភេទបន្លែផ្លែ
នារដូវវស្សានេះ ប្រជាជនខ្មែរមិនដែលបំភ្លេចឡើយនៅប្រភេទបន្លែផ្លែដូចជា៖ ននោង ល្ពៅ ត្រប់ ប៉េងប៉ោះ ឃ្លោក ម្រះ ដែលអាចចម្អិនម្ហូបបានជាច្រើនមុខ ឬអាចនិយាយបានថាបន្លែទាំងអស់នេះជាបន្លែគោលដែលប្រជាជនខ្មែរច្រើននិយមបរិភោគជាងគេប្រសិនបើប្រៀបទៅនឹងប្រភេទបន្លែដទៃទៀត។ ទន្ទឹមនឹងនេះ យើងអាចនិយាយបានថាដំណាំប្រភេទបន្លែផ្លែដើរតួនាទីយ៉ាងសំខាន់ក្នុងការបំពេញតម្រូវការចំណីអាហារក្នុងស្រុក ក៏ព្រោះតែមុខម្ហូបមួយភាគធំត្រូវការបន្លែទាំងអស់នេះសម្រាប់ចម្អិនជាអាហារប្រចាំថ្ងៃផងដែរ៕
Article by PAN SIVLY