Sovrin
Sovrin
គ្រាន់តែធ្វើដំណើររយៈពេលត្រឹមតែ៣ម៉ោងតែប៉ុណ្ណោះពីរាជធានីភ្នំពេញឆ្ពោះទៅកាន់ក្រុងព្រះសីហនុ ដែលជាបេះដូងនៃតំបន់ឆ្នេរដ៏ស្រស់ស្អាតរបស់កម្ពុជា កំពុងស្វាគមន៍វត្តមានភ្ញៀវជាតិ និងអន្តរជាតិមកកម្សាន្ត។ ដោយឡែក រមណីយដ្ឋានលំដាប់ផ្កាយប្រាំដ៏អស្ចារ្យមួយ ដែលត្រូវបានគេស្គាល់ “Arjuna Resort & Spa” ជា រីស៊តបានបើកសម្ពោធជាផ្លូវការកាលពីថ្ងៃទី២៨ ខែឧសភា ឆ្នាំ២០២៥ កន្លងមកនេះ។
Arjuna Resort & Spa មានទីតាំងស្ថិតនៅក្នុងគម្រោងអភិវឌ្ឍន៍ដ៏ធំស្ថិតនៅ Kampong Dewa Resorts ដែលមានចម្ងាយប្រមាណ ៣០នាទីពីអាកាសយានដ្ឋានអន្តរជាតិខេត្តព្រះសីហនុ និងប្រហែល ១០នាទីពីឆ្នេរអូរត្រេះដ៏ល្បីល្បាញ។ ការរចនារបស់សណ្ឋាគារនេះពិតជាមានភាពប្លែកពីគេ ដោយបានបំផុសគំនិតពីវីរបុរសរឿងព្រេងឥណ្ឌា Arjuna និងសិល្បៈស្ថាបត្យកម្មរាជវង្សខ្មែរ។ សណ្ឋាគារនេះត្រូវបានសាងសង់ជាអគារកម្ពស់ ២៣ជាន់ និងផ្នែកខាងក្នុងត្រូវបានតុបតែងយ៉ាងប្រណិត ដោយរួមបញ្ចូលគ្នាយ៉ាងប្រណិតភាពទៅតាមទម្រង់ប្រពៃណីខ្មែរ និងភាពទាន់សម័យតាមបែបទំនើប។
សម្រាប់បន្ទប់ស្នាក់នៅ និងគ្រឿងបរិក្ខារលំដាប់ខ្ពស់ត្រូវបានរចនា និងកែច្នៃយ៉ាងមានការយកចិត្តទុកដាក់បំផុត។ Arjuna Resort & Spa ផ្តល់ជូននូវបន្ទប់ស្នាក់នៅជាច្រើនប្រភេទដែលមានចំនួនសរុបដល់ទៅ ២០០បន្ទប់ រួមមាន៖ បន្ទប់ Deluxe ដែលមានទំហំធំទូលាយ និងមានការតុបតែងយ៉ាងល្អិតល្អន់, បន្ទប់ Suites ដែលមានទីធ្លាសម្រាប់ស្នាក់នៅដាច់ដោយឡែកពីបន្ទប់គេង, បន្ទប់ Penthouses ដែលជាបន្ទប់ប្រណិតបំផុត ស្ថិតនៅជាន់ខ្ពស់ៗ អាចមើលទេសភាពសមុទ្រ និងទីក្រុងយ៉ាងស្រស់ស្អាត។
រីឯអាងហែលទឹកធំទូលាយ រួមទាំង Sky Pool & Bar ដែលស្ថិតនៅលើដំបូលសណ្ឋាគារជាន់ទី២៣ បានទាក់ទាញចិត្តឲ្យភ្ញៀវអាចរីករាយជាមួយការហែលទឹក និងទស្សនាទេសភាពសមុទ្រ និងព្រះអាទិត្យលិចដ៏ស្រស់ត្រកាល។ ក្រោយពីទទួលបាននូវបទពិសោធន៍ និងការស្នាក់នៅដ៏ស្រស់ស្រាយនៅទីនេះភ្ញៀវជាតិ និងអន្តរជាតិដែលស្នាក់នៅទីនេះក៏មានឳកាសសាកល្បងទទួលទានអាហារឈ្ងុយឆ្ងាញ់ពីភោជនីយដ្ឋានចំនួន ៧កន្លែង រួមមានភោជនីយដ្ឋាន Angkasa Restaurant & Bar នៅលើដំបូលឯកទេសម្ហូបអឺរ៉ុប ភោជនីយដ្ឋាន Wang Long និងភោជនីយដ្ឋានអន្តរជាតិផ្សេងៗទៀត។
Arjuna Resort & Spa មិនត្រឹមតែជាកន្លែងស្នាក់នៅប៉ុណ្ណោះទេ ប៉ុន្តែក៏ជាគោលដៅទេសចរណ៍មួយដែលផ្តល់ជូននូវភាពប្រណិត ផាសុកភាព និងបទពិសោធន៍ដ៏គួរឲ្យចងចាំដល់ភ្ញៀវទេសចរគ្រប់រូប៕
Image Courtesy: Arjuna Resort & Spa
