ទៅឈ្វេងយល់ពីសក្តានុពលវប្បធម៌ក្នុងពិធីកាន់បិណ្ឌនៅលើកោះដាច់
TRAVEL & LIVING 4 years agoកាលពីដើម កោះដាច់ហាក់ដូចជានៅឆ្ងាយបន្តិចពីរាជធានីភ្នំពេញ ព្រោះកោះនេះស្ថិតនៅជាផ្នែកមួយនៃស្រុកមុខកំពូល ខេត្តកណ្តាល ប៉ុន្តែចាប់តាំងពីឆ្នាំ២០១០មក កោះដាច់បានក្លាយជាភូមិសាស្រ្តជិតបង្កើយមួយក្រោមការគ្រប់គ្រងរបស់ខណ្ឌប្ញស្សីកែវ រាជធានីភ្នំពេញ ហើយក្រោយមកទៀតក្លាយជាសង្កាត់កោះដាច់ នៃខណ្ឌជ្រោយចង្វារដែលទើបបំបែកបង្កើតថ្មីក្នុងឆ្នាំ២០១៣។ ចាប់តាំងពីពេលនោះមក កោះដាច់ត្រូវបានអភិវឌ្ឍហេដ្ឋារចនាសម្ព័ន្ធជាបន្តបន្ទាប់ ហើយមានកំណើនភ្ញៀវទេសចរជាតិនិងអន្តរជាតិទៅទស្សនាកម្សាន្តមិនចេះដាច់។ក្រៅពីឆ្នេរខ្សាច់លាតសន្ធឹងល្វឹងល្វើយនៃទន្លេមេគង្គដ៏មានប្រជាប្រិយភាពប្រមាណកន្លះសតវត្សរ៍មកហើយនោះ កោះដាច់ជាទីតាំងដ៏ពិសិដ្ឋមួយដែលបង្កប់នូវធនធានវប្បធម៌រូបី និង អរូបីយ៉ាងសម្បូរបែបស័ក្តិសមបំផុតសម្រាប់អ្នកស្រាវជ្រាវ ព្រមទាំងមហាជនទូទៅមកពីគ្រប់ទិសទីទៅសិក្សាឈ្វេងយល់ម្តងហើយម្តងទៀតមិនចេះរីងស្ងួត ជាពិសេសគឺក្នុងរដូវបុណ្យទានឈប់សម្រាក តួយ៉ាង ពិធីបុណ្យកាន់បិណ្ឌ និង ភ្ជុំបិណ្ឌនេះតែម្តង។
នៅលើកោះដាច់មានវត្តចំនួនប្រាំពីរដែលលោកអ្នកអាចជ្រើសរើសទៅប្រារព្ធពិធីបុណ្យកាន់បិណ្ឌ និង ភ្ជុំបិណ្ឌបានយ៉ាងងាយស្រួល ក្នុងនោះរួមមាននៅប៉ែកខាងលិចកោះ មានវត្តបទុមពិសី ហៅវត្តល្វាលើ សង្កាត់កោះដាច់ ដែលមានចៅអធិការព្រះនាម មុត សាម៉ុន, វត្តពោធិព្រះឥន្ទ ដែលមានចៅអធិការព្រះនាម ប៉ិច សុន, វត្តឥន្ទពិសី ដែលមានចៅអធិការព្រះនាម ណម ស៊ីណាត និង វត្តឧទុម្ពរ ហៅវត្តល្វាក្រោម ដែលមានចៅអធិការព្រះនាម ហាស់ សារិន និង វត្តអម្ពរផល ហៅវត្តចុងកោះ ដែលមានចៅអធិការ យ៉ន ឆេងហាក់។ ដោយឡែក នៅប៉ែកខាងកើតកោះវិញ ទល់មុខនឹងកោះឧកញ៉ាតីវិញមានវត្តចំនួនពីរទៀតគឺ វត្តសាមគ្គីក្បាលកោះ ហៅវត្តយក្ស ដែលមានចៅអធិការព្រះនាម ផន សុខហៀង និង វត្តក្រពុំពេជ្រ ហៅវត្តកោះដាច់ ដែលមានចៅអធិការព្រះនាម ឡាក់ ឡូ ។ ដោយសារតែចំនួនវត្តច្រើនបែបនេះ វាមានលក្ខណៈអំណោយផលល្អសម្រាប់ពុទ្ធបរិស័ទដែលចង់ធ្វើដំណើរទៅដាក់បិណ្ឌលើសពីមួយវត្តក្នុងថ្ងៃចុងសប្តាហ៍ សៅរ៍-អាទិត្យ ព្រោះវត្តទាំងនោះស្ថិតនៅមិនឆ្ងាយពីគ្នាប៉ុន្មាននោះទេ។
ចំពោះអ្នកដែលស្រឡាញ់រចនាបថព្រះវិហារបែបបុរាណ លោកអ្នកអាចទៅទស្សនាព្រះវិហារវត្តសាមគ្គីក្បាលកោះ ហៅ វត្តយក្ស ដែលជាព្រះវិហារជហ្វា៦ យ៉ាងស្រស់ស្អាតបន្សល់ទុកតាំងពីសម័យអាណានិគមបារាំងប្រចាំភូមិក្បាលកោះ សង្កាត់កោះដាច់ ក្បែរសាលាសង្កាត់កោះដាច់តែម្តង។ លើសពីព្រះវិហារបុរាណ វត្តយក្សក៏មានអគារអតីតសាលាបាលី ក្នុងរចនាបថស្ថាបត្យកម្មខ្មែរ-បារាំង ដែលមានចារឹកនៅលើហោជាងនូវ ព.ស. ២៤៧៣ ត្រូវនឹងគ.ស. ១៩៣០ ពោលគឺឆ្នាំកសាងតាំងពីសម័យហ្លួងស៊ីសុវត្ថិមុនីវង្សមកម្ល៉េះ។ ទន្ទឹមនឹងនេះ នៅជិតខ្លោងទ្វារចូល ក្រោមម្លប់ពោធិ៍បែកមែកសាខាត្រសុំត្រសាយ មានអគារសាលាឆាន់ចាស់ ដែលនៅសល់តែគ្រោងជាតឹកតាងប្រវត្តិសាស្រ្តស្ថាបត្យកម្មបែបសាសនា។ ធ្វើដំណើរហួសវត្តយក្សទៅត្រង់ យើងនឹងប្រទះឃើញព្រះវិហារបុរាណនៃវត្តក្រពុំពេជ្រ ដែលបានកសាងឡើងក្នុងគ.ស. ១៩២៤ ក្នុងរជ្ជកាលព្រះរាជានុកោដ្ឋ ព្រះបាទសម្តេចស៊ីសុវត្ថិ (១៩០៤-១៩២៧) មានអាយុកាល៩៦ឆ្នាំហើយ គិតមកដល់ឆ្នាំ២០២០នេះ។ ព្រះវិហារកាលពីមុនមានសភាពទ្រុឌទ្រោមខូចខាតយ៉ាងខ្លាំង មានតែសសរ និងជញ្ជាំងប៉ុណ្ណោះ មិនមានសេសល់ដំបូលបិទជិតនោះទេហើយថែមទាំងមានរុក្ខជាតិស្មៅតូចធំដុះស៊ុបទ្រុបស្ទើរក្លាយជារហោស្ថាន ប៉ុន្តែទោះជាយ៉ាងណា វាជាទីចាប់អារម្មណ៍របស់ជនជាតិបរទេសជិតឆ្ងាយដែលមកទស្សនាកោះដាច់។ ដោយសារតែមើលឃើញនូវគុណតម្លៃនៃព្រះវិហារបុរាណនេះ គណៈកម្មការវត្តបានរៀបចំជួសជុលប្រក់ដំបូលថ្មីកាលពីប៉ុន្មានឆ្នាំមុនទេ ធ្វើឲ្យព្រះវិហារនេះមានសោភណភាពស្រស់ស្អាតឡើងវិញ ល្អប្រសើរសម្រាប់ពុទ្ធសាសនិកជនទាំងឡាយឲ្យឆៀងចូលមកគោរពបូជា។
ក្នុងរដូវភ្ជុំបិណ្ឌ ព.ស.២៥៦៤ នេះ យើងឃើញប្រជាជនក្មេងចាស់ប្រុសស្រីដែលរស់នៅក្នុងសង្កាត់កោះដាច់មានទឹកមុខសប្បាយរីករាយចំពោះការធ្វើដំណើរទៅធ្វើបុណ្យទាននៅតាមទីអារាមនានានៅលើកោះ។ ម្នាក់ៗស្លៀកពាក់ស្អាតបាតសមសួនឆ្លុះបញ្ចាំងពីការប្រណិប័តពុទ្ធសាសនាពីដូនតាតរៀងមកយ៉ាងខ្ជាប់ខ្ជួនមិនទាន់សាបរលាប សក្តិស័មនឹងកិត្តិស័ព្ទជាតំបន់ប្រពៃណីតម្បាញសូត្រដ៏ល្បីប្រចាំប្រទេស។ស្នូរកីតម្បាញតាមផ្ទះអ្នកស្រុកជាច្រើននៅតែលាន់ឮរណ្តំទាក់បេះដូងអ្នកទេសចរមិនឲ្យមើលរំលងតំបន់នេះ។ វាជាឱកាសល្អសម្រាប់អ្នកដំណើរឈប់ទិញផលិតផលតម្បាញហូលផាមួង ឬ ក្រមាសូត្ររបស់សហគមន៍តម្បាញកោះដាច់ទុកផ្ញើជូនអ្នកមានគុណឲ្យទាន់រដូវបុណ្យទានស្របតាមពំនោលខ្មែរ “ធ្វើបុណ្យទាន់ខែភ្លឺ”។ អ្វីដែលរឹតតែពិសេសនោះគឺ ផ្លូវលំស្ថាបនាថ្មីមួយខ្សែឆ្លងកាត់ស្ពានប្រវត្តិសាស្រ្ត “ស្ពានអូរតានង” តភ្ជាប់ចំណុចវត្តអម្ពរផល ភូមិចុងកោះ មកទល់នឹងទួលតានង ភូមិកោះដាច់ មានទទឹងប្រវែង ១០ម៉ែត្រ បណ្តោយ ប្រវែង៨00ម៉ែត្របានក្លាយជាចំណងដៃប្រវត្តិសាស្រ្តថ្មីស្វាគមន៍អ្នកដំណើរក្នុងឆ្នាំនេះនិងតរៀងទៅអនាគត៕
Article by SRINSOKMEAN