នរណាៗក៏ស្គាល់ស្រាសំប៉ាញដែលជាប្រភេទស្រាដ៏មានតម្លៃដែលមនុស្សម្នាទទួលស្គាល់ជា សកល ហើយវាមានប្រវត្តិជាយូរយារណាស់មកហើយ។ គេនិយមយកវាមកទទួលទានក្នុងពិធីជប់លៀង ជួបជុំមិត្តភក្តិ គូស្នេហ៍ ឬ ក្រុមគ្រួសារនានាជាពិសេស ពិធីបុណ្យណូអែល និង ពិធីឆ្លងឆ្នាំសកលដែល ទើបតែកន្លងផុតថ្មីៗនេះឯង។ នៅពេលនិយាយដល់ពាក្យថា “ស្រា” ឬ “សុរា” នោះមហាជនភាគច្រើន ច្រើនតែនឹកដល់ផលប៉ះពាល់អវិជ្ជមានចំពោះសុខភាពជាមិនខាន។ ទោះបីជាយ៉ាងនេះក្តី ក៏អ្នកជំនាញ ផ្នែកសុខភាពបរទេសបានបង្ហាញថា ការទទួលទានស្រាសាំប៉ាញមិនមែនជារឿងអាក្រក់ដូចអ្នកធ្លាប់គិត កន្លងមកទាំងស្រុងនោះទេ។ កុំឲ្យមានការសង្ស័យច្រើន ចូរឈ្វេងយល់អំពីស្រានេះទាំងអស់គ្នា÷
១. ជំនួយសុខភាពបេះដូង
ស្រាសំប៉ាញមានប្រយោជន៍ល្អសម្រាប់បេះដូងរបស់លោកអ្នកដូចគ្នានឹងប្រភេទស្រាក្រហម ឬ ស្រា ទំពាំងបាយជូរពណ៌សដែរ។ ដោយសារស្រាសាំប៉ាញផលិតឡើងពីផ្លែទំពាំងបាយជូរពណ៌ក្រហម លាយនឹងទំពាំងបាយជូរស វាមានផ្ទុកសារធាតុអង់ទីអុកស៊ីតកម្មដែលជួយបង្ការការកកស្ទះសរសៃឈាម កាត់បន្ថយជាតិកូឡេស្តួរ៉លអាក្រក់ចំពោះបេះដូង (ខ្លាញ់រុំបេះដូង) និង ការពារកំណកឈាម។ ជាលទ្ធ ផល វាធ្វើឲ្យអត្រានៃជំងឺបេះដូងនិងស្លាប់មួយចំហៀងខ្លួនចុះថយទាប។ ប៉ុន្តែអ្នកក៏មិនត្រូវទទួលទាន វាហួសកំណត់ពេកនោះដែរ។
២. ជួយបង្កើនការចងចាំ
ការស្រាវជ្រាវពីសាកលវិទ្យាល័យកូឡុំប៊ី (University of Colombia) បានបង្ហាញថា ស្រាសាំប៉ាញមាន អត្ថប្រយោជន៍ចំពោះការចងចាំរយៈពេលខ្លី។ របាយកាណ៍មួយទៀតធ្វើឡើងដោយសាកលវិទ្យាល័យ Reading University (2013) ក៏បានលើកឡើងដែរថា ការទទួលទានស្រាសំប៉ាញចំនួនបីកែវជារៀងរាល់ សប្តាហ៍អាចជួយបង្កើនការចងចាំបានមែន។
៣. ធ្វើឲ្យអារម្មណ៍ល្អ
មនុស្សគ្រប់គ្នាតែងតែទទួលបាននូវអារម្មណ៍រីករាយស្រស់ស្រាយខុសប្លែកពីធម្មតានៅពេលបានក្រេបតំណក់ស្រាសំប៉ាញពីកែវ។ នេះគឺបណ្តាលមកពីវាមានផ្ទុកសារធាតុម៉ាញ៉េស្យូម ប៉ូតូស្យម និង ស័ង្កសី។
៤. កម្រិតជាតិកាឡូរីទាប
ស្រាសំប៉ាញមានផ្ទុកជាតិកាឡូរីត្រឹមតែកម្រិត៨០ ទាបជាងជាតិកាឡូរីដែលមានផ្ទុកក្នុងប្រភេទស្រា ក្រហម និង ស្រាទំពាំងបាយជូរស ដែលមានកម្រិតរហូត ១២០។ ជាពិសេស ជាធម្មតា ការទទួលទាន ស្រាសាំប៉ាញតែងតែធ្វើឡើងក្នុងទ្រង់ទ្រាយបរិមាណតិចតួចជាងស្រាផ្សេងៗទៀត។ ដូចនេះ វាធ្វើឲ្យ កម្រិតកាឡូរីដែលចូលមកក្នុងខ្លួនមនុស្សយើងក៏មានកម្រិតទាបតាមនោះដែរ។
៥. ជួយបន្ទាបអត្រាកើតជំងឺទឹកនោមផ្អែម
ការសិក្សាមួយដែលបានធ្វើឡើងនៅក្នុងប្រទេសកាណាដា ឆ្នាំ២០១៩ បានកឃើញថា ស្រាទំពាំង បាយជូរគ្រប់ប្រភេទ រួមទាំងស្រាសាំប៉ាញផងដែរនោះ មានសមត្ថភាពក្នុងការកាត់បន្ថយអត្រានៃការ កើតជំងឺទឹកនោមផ្អែមបានរហូតដល់១៣ភាគរយ។
៦. ជួយបង្ការជំងឺវង្វេងបាត់ការចងចាំ
ស្រាសាំប៉ាញមួយកែវ ឬ ពីរកែវត្រូវបានគេអះអាងថាអាចជួយទប់ស្កាត់ការរីករាលដាលនៃជំងឺបាត់ ការចងចាំ។ ការស្រាវជ្រាវមួយនៃសាកលវិទ្យាល័យ Pittsburgh បានរកឃើញថា អត្រានៃជំងឺនេះបាន ថយចុះស្ទើរតែពាក់កណ្តាលចំពោះអ្នកដែលបានទទួលទានស្រាសំប៉ាញក្នុងបរិមាណមធ្យមសមស្រប។ មនុស្សដែលមានវ័យចាប់ពី៤០ឆ្នាំឡើងទៅគួរតែទទួលទានវា ព្រោះវាជាវ័យដែលការចងចាំចាប់ផ្តើម ធ្លាក់ចុះហើយ។
៧. ជួយបង្កើនចំណង់ផ្លូវភេទ
ភេសជ្ជៈមានជាតិអាល់កុលភាគច្រើនត្រូវបានមហាជនដឹងថាពិតជាជួយផ្តល់ឥទ្ធិពលមួយឆាវនៅពេល លោកអ្នកមានតម្រូវការផ្លូវភេទ ប៉ុន្តែបញ្ហាស្ថិតនៅត្រង់ថាគ្រឿងស្រវឹងទាំងនោះអាចបណ្តាលឲ្យថាមពល របស់អ្នកយូរៗកាន់តែខ្សោយទៅៗ ព្រមមទាំងជួបប្រទះនូវបញ្ហាកង្វះលំហូរឈាមដែលអ្នកត្រូវការដើម្បី បង្កើនចំណង់។ ផ្ទុយទៅវិញ ប្រភេទស្រាសាំប៉ាញនេះនឹងញ៉ាំងឲ្យលោកអ្នកកាន់តែមានអារម្មណ៍ដឹងពី ឥទ្ធិពលដ៏ឆាប់រហ័សរបស់វាដោយមិនធ្វើឲ្យលោកអ្នកថមថយកម្លាំងដូចស្រាដទៃនោះទេ៕
Article by SRIN SOKMEAN