ខោខូវប៊ូយ គឺជាសម្លៀកបំពាក់ដែលពេញនិយម មិនងាយសាបសូន្យ។ ជឿជាក់ថា មនុស្សសម័យថ្មីគ្រប់រូបយ៉ាងហោចណាស់ក៏មានខោខូវប៊ូយមួយក្នុងទូខោអាវរបស់អ្នកដែរ ព្រោះតែវាទាន់សម័យ ពេញនិយម ស្រួលស្លៀក និងប្រើបានយូរ។ អ្នកធ្វើការនិយមប្រើជាសម្លៀកបំពាក់ដើរលេងម្ដងម្កាល ឯអ្នកខ្លះទៀតក៏និយមប្រើសឹងតែរាល់ថ្ងៃ។ ទោះបីជាវាមិនងាយខូចខាតក៏ពិតមែន ប៉ុន្តែមនុស្សជាច្រើននៅតែបោះវាចោលដោយសារតែឆាប់យារសាច់ក្រណាត់ ឬស្លក់ពណ៌។ មិនមែនដោយសារតែគុណភាពខោខូវប៊ូយមួយផ្នែកទេ ប៉ុន្តែការបោកសម្អាតរបស់គ្រប់គ្នា គឺមិនសូវត្រឹមត្រូវនោះទេ។ ជាក់ស្តែង សាច់ខូវប៊ូយ គឺជាប្រភេទសាច់ក្រណាត់ដែលក្រាស់ ធន់នឹងការប្រើប្រាស់ខ្លាំងណាស់ ព្រោះការបង្កើតក្រណាត់ខូវប៊ូយឡើងដំបូងក្នុងឆ្នាំ ១៨៧៣ គឺសម្រាប់ធ្វើជាឯកសណ្ឋានឲ្យកម្មករជីករ៉ែប្រើប្រាស់ជាប្រចាំថ្ងៃ។ ខាងក្រោមគឺជាគន្លឹះក្នុងការថែទាំសម្អាតខោខូវប៊ូយ ដែលគ្រប់គ្នាមិនសូវបានប្រតិបត្តិត្រឹមត្រូវ។
•ចៀសវាងការបោកគក់ញឹកញាប់៖ ខោខូវប៊ូយ គឺមិនចាំបាច់បោកគក់ញឹកញាប់ឡើយ យើងអាចប្រើប្រាស់ប្រមាណ១០ដង សឹមបោកម្ដងបានហើយ ទើបមិនងាយធ្វើឲ្យខោខូចសាច់ក្រណាត់ រួមទាំងសារជាតិក្នុងសាប៊ូក៏ធ្វើឲ្យស្លក់ពណ៌លឿនផងដែរ។ បើមានស្នាមប្រឡាក់ល្មមៗ គប្បីយកក្រណាត់សើមជូតសម្អាតទើបប្រសើរ ប្រសិនបើក្នុងករណីណាមួយវាមានស្នាមប្រឡាក់ខ្លាំងឯណេះវិញ គួរជ្រើសរើសការប្រើប្រាស់ច្រាស់លាយសាប៊ូមកដុសសម្អាតត្រង់ចំណុចដែលប្រឡាក់ជាការស្រេច។ ជាធម្មតា ប្រើរួច ព្យួរសំដិលវានៅកន្លែងមានខ្យល់ចេញចូលល្អជាការស្រេច។
•បោកទឹកត្រជាក់៖ នៅពេលដែលត្រូវបោកគក់ គប្បីបោកនឹងទឹកត្រជាក់ធម្មតា (ចៀសវាងប្រើទឹកក្ដៅ) ហើយត្រូវពន្លាត់ខាងក្នុងមកក្រៅមុននឹងបោក ទើបមិនឆាប់ហើរពណ៌ដោយសារការដដុស។ បោកខោខូវប៊ូយជាមួយនឹងសម្លៀកបំពាក់ដែលមានពណ៌ប្រហែលគ្នា។ យ៉ាងណាមិញ ប្រសិនបើអាចបោកដោយដៃបាន យល់ល្អកុំប្រើប្រាស់ម៉ាស៊ីន ព្រោះវានឹងពូតរមួរឲ្យស្ងួតទឹក ដែលបណ្ដាលឲ្យងាយខូចរាងខោ ឬបាក់ផ្នត់ ងាយនឹងបំផ្លាញសរសៃក្រណាត់របស់ខោជាដើម។ សំដិលហាលក្នុងម្លប់ បន្ទាប់ពីបោកទឹករួចរាល់ ត្រូវហាលសំដិលខ្យល់នៅក្នុងម្លប់ កុំឲ្យត្រូវនឹងពន្លឺថ្ងៃ ហើយត្រូវព្យួរជាមួយនឹងស្មាអាវឲ្យសំយុងចុះបានត្រឹមត្រូវ។ ធ្វើដូចនេះ ទើបអាចហាលខោស្ងួតល្អ និងមិនបាក់ផ្នត់ខោ ឬខូចក្រណាត់ខោជាដើមផងដែរ។
•ស្លៀកឲ្យបានត្រឹមត្រូវ៖ គួរជ្រើសខោខូវប៊ូយដែលល្មមនឹងចង្កេះរបស់អ្នក ចៀសវាងប្រើខ្សែក្រវាត់មករឹតចង្កេះខោខូវប៊ូយ ព្រោះវាមិនត្រឹមត្រូវទេ។ ហើយគួរជ្រើសយកសំយុងជើងខោដែលវែងល្មមនឹងជើង ស្ទីលកែងជាន់ជើងខោខូវប៊ូយ វាហួសសម័យហើយ ម្យ៉ាងទៀត វាក៏មិនត្រូវក្បួនខ្នាតនោះដែរ។
គន្លឹះខាងលើនឹងជួយរក្សាខោខូវប៊ូយរបស់អ្នកឲ្យគង់នៅយូរអង្វែង។ ជាពិសេស សម្រាប់ខោខូវប៊ូយប្រេនៗដែលមានតម្លៃថ្លៃ គ្រប់គ្នាប្រាកដជាមិនចង់ឲ្យខោខូវប៊ូយជាទីស្រឡាញ់របស់អ្នកខូចនោះឡើយ។ បើថែបានល្អ វានឹងនៅកំដអ្នកបានរាប់សិបឆ្នាំឯណោះ។ បើតាមទំនោរហ្វេហ្សិននោះ គឺថាវាមិនងាយសាបរលាបឡើយ ដូច្នេះគួរថែទាំវាឲ្យបានល្អ ទុកប្រើបានយូរឆ្នាំ ហើយជួយរក្សាបរិស្ថានផែនដីយើងទៀតផង៕
Article by LENG CHANREASEY