Sovrin
Sovrin
Co & Bloom ហាងកាហ្វេផ្ទះលើជាន់ទី២ ដំបូងបង្អស់ក្នុងប្រវត្តិសាស្រ្តរាជធានីភ្នំពេញ
TRAVEL & LIVING 2 years ago
ហាងកាហ្វេក្នុងរាជធានីភ្នំពេញយើងសព្វថ្ងៃបាននិងកំពុងរីកដុះដាលដូចផ្សិតនារដូវវស្សាក្នុងលក្ខណៈប្រកួតប្រជែងទាំងផ្នែកគំនិតនៃការបង្កើតហាង (business concept) ទាំងផ្នែកតុបតែងលម្អស្ថាបត្យកម្ម (interior design) ដើម្បីឆ្លើយតបទៅនឹងតម្រូវការបែបបទរស់នៅនៃអ្នកទីក្រុងក្នុងយុគសម័យថ្មីដ៏ស៊ីវិល័យ។ មួយក្នុងចំណោមនោះគឺហាងកាហ្វេដែលទើបបង្កើតថ្មីចុងក្រោយឈ្មោះថា «Co & Bloom» ដោយគំនិតច្នៃប្រតិដ្ឋផ្នែកអាជីវកម្មរបស់នារីខ្មែរម្នាក់ដែលហ៊ានប្រថុយសាកល្បងដំណើរការគម្រោងហាងជាន់លើក្នុងអគារសហគមន៍ខុសប្លែកពីហាងកាហ្វេភាគច្រើនដែលផ្តោតលើអគារជាន់ក្រោមផ្ទាល់ដីតាមដងវិថី ឬ ជាផ្នែកនៃផ្សារទំនើបដែលគេរំពឹងទុកថាមានអតិថិជនច្រើន។
ស្ថិតនៅលាក់ខ្លួនលើផ្ទះល្វែងជាន់ទី២ក្នុងអគារសហគមន៍សហគ្រិនជួយសង្គម «ផ្ទះចាស់» (Pteah Chas) តាមបណ្តោយវិថីព្រះអង្គឌួង (ផ្លូវលេខ១១០) ជិតផ្សារចាស់ សង្កាត់ផ្សារចាស់ ខណ្ឌដូនពេញ រាជធានីភ្នំពេញ ហាង កាហ្វេទំនើបមួយកន្លែងឈ្មោះថា «Co & Bloom» ជាហាងកាហ្វេថ្មីចុងក្រោយដែលទើបតែបើកដំណើរការកាលពីដើមឆ្នាំ២០២២នេះក្រោមគំនិតផ្តួចផ្តើមរបស់សហគ្រិនស្រ្តីក្នុងស្រុកមួយរូប គឺ កញ្ញា ឯក ចាន់ណា បរិញ្ញាបត្រជាន់ខ្ពស់ជំនាញសិក្សាអភិវឌ្ឍន៍ មកពីសាកលវិទ្យាល័យភូមិន្ទភ្នំពេញ ។ «Co» សំដៅលើ ភាពរួមគ្នាជាសហគមន៍។ ឯ «Bloom» មានអត្ថន័យទាក់ទងនឹង ភាពស្រស់បំព្រងនៃធម្មជាតិ។ ចំណុចទាំងពីរជាគោលគំនិតចំបងនៃហាងកាហ្វេនេះ។
ស្ថាបនិក និងអ្នកគ្រប់គ្រងហាងផ្ទាល់រូបនេះ បានប្រាប់អំពីមូលហេតុនៃការបើកហាងកាហ្វេនេះឡើងថា កញ្ញាកើតក្នុងត្រកូលគ្រួសារជំនួញហាងកាហ្វេបែបបុរាណមួយនៅជាយក្រុងដែលមានប្រវត្តិអាជីវកម្មយូរឆ្នាំគួរសម ដែលជាហេតុធ្វើឲ្យកញ្ញាស្គាល់ពីប្រភេទកាហ្វេច្រើន ហើយក៏មានចំណង់ចំណូលចិត្តទទួលទានកាហ្វេយ៉ាងខ្លាំងផងដែរ។ ផ្អែកលើគំនិតចង់បន្តវេនអាជីវកម្មហាងកាហ្វេស្នងបន្ថែមលើហាងកាហ្វេលក្ខណៈគ្រួសារនោះ កញ្ញាព្យាយាមស្វែងរកទីតាំងក្នុងក្រុងដែលសមស្របជាមួយនឹងគំនិតខាងលើ។ ទីបំផុត គាត់ក៏បានជួបជាមួយស្ថាបនិកអគារសហគមន៍«ផ្ទះចាស់» នេះ ដែលធ្លាប់ស្គាល់គ្នាពីមុនមក ហើយសម្រេចចិត្តសាកល្បងទទួលយកគំនិតអាជីវកម្មហាងជាន់លើដែលមានបណ្តុំអាជីវកម្មច្រើនរួមគ្នាក្នុងអគារតែមួយ ព្រោះអ្នកនាងសម្លឹងឃើញនូវតម្លៃស្ថាបត្យកម្មអគារបេតិកភណ្ឌមួយនេះ គួបផ្សំនឹងការច្នៃដាក់តាំងលម្អរុក្ខជាតិចម្រុះបន្ថែម ដែលជាគុណសម្បត្តិអាចទាក់ទាញអតិថិជនដែលនិយមស្វែងរកអ្វីដែលប្លែក។
បើនិយាយលម្អិតពីស្ថាបត្យកម្មដែលជាមន្តស្នេហ៍ធំបំផុតរបស់ហាងនេះ លោកអ្នកច្បាស់ជាប្លែកចិត្តតាំងពីខាងក្រៅរហូតដល់ខាងក្នុងជាមិនខាន ព្រោះបើមើលតែពីសំបកក្រៅ ទីនេះគ្រាន់តែជាផ្ទះល្វែងផ្សារដែលមានសភាពចាស់ធម្មតា ហើយមើលទៅរាងតូចចង្អៀត។ តែនៅពេលយើងដើរចូលមកខាងក្នុងកាត់តាមហាងលក់ផ្កាមកខាងក្រោយ យើងនឹងឃើញលំហធំមានពន្លឺចាំងឆ្លុះពីខាងលើគ្រប់ជាន់និងជណ្តើរថ្មពត់ពេននៃសំណង់អគារចាស់ដែលនឹងនាំយើងមកកាន់ជាន់លើដែលមានកន្លែងអង្គុយជុំវិញប្រឡោះខ្យល់ដែលមានបង្កាន់ដៃរចនាបថកាត់ចិនដ៏ពេញនិយមសម្រាប់សំណង់ផ្ទះអាជីវកម្ម (Shophouse) កាលពីអំឡុងទ.វ.ទី៥០-៦០។ បង្កាន់ដៃចាស់នោះត្រូវបានរក្សារចនាបថដើមដដែល គ្រាន់តែយកផើងរុក្ខជាតិមកតម្រៀបរំលេចពណ៌បៃតងត្រជាក់ភ្នែក ស័ក្តិសមសម្រាប់ការអានសៀវភៅ ឬ ធ្វើកិច្ចការផ្សេង ៗដោយស្ងប់ស្ងាត់ឥតសំឡេងរំខាន។ ប្រសិនបើលោកអ្នកចង់អង្គុយគ្នាច្រើន លោកអ្នកត្រូវតែបង្វែរមកអង្គុយខាងក្នុង ព្រោះខាងក្នុងមានកន្លែងទូលាយជាង អាចអង្គុយបានប្រមាណជាង២០នាក់។ ផ្នែកខាងក្នុងមាន បរិយាកាសដែលបង្កើតឲ្យមានអារម្មណ៍ដូចបានអង្គុយលេងជួបជុំគ្នាក្នុងផ្ទះមិត្តភក្តិ ឬ សាច់ញាតិណាម្នាក់ដូច្នោះដែរ ព្រោះ មិនមានការរៀបចំតុបតែងច្រើន ឬ ប្រើពណ៌ចម្រុះសាំញ៉ាំនោះទេ ដែលតាមភាសាស្ថាបត្យកម្មហៅថារចនាបថ Minimalist Architecture ដែលកំពុងពេញនិយមក្នុងទីផ្សារក្នុងស្រុកបច្ចុប្បន្ន។
ហាងនេះបើកដំណើរការជារៀងរាល់ថ្ងៃពីម៉ោង ៧ព្រឹក ដល់ម៉ោង ៨យប់។ លោកអ្នកអាចស្វែងរកជម្រើស ភេសជ្ជៈប្រភេទកាហ្វេ តែ ទឹកផ្លែឈើស្រស់ និងភេសជ្ជៈសម្រន់ជាច្រើនទៀត សរុបប្រមាណ ៤០ មុខ ដូចហាងកាហ្វេទំនើបទូទៅដែរ ក្នុងតម្លៃថោកសមរម្យ ភាគច្រើនត្រឹម ២ ដុល្លារជាង។ ក្រៅពីភេសជ្ជៈ លោកអ្នកអាចទទួលទាននំ និង មានលក់សង្វាក់ដែលលោកអ្នកអាចកុម្ម៉ង់យកទៅទទួលទាននៅជាន់លើដំបូល (Rooftop Kitchen) ដែលមានសួនរុក្ខជាតិស្រស់បំព្រង និងខ្យល់អាកាសស្រឡះគួរជាទីលម្ហែអារម្មណ៍។ នៅទីនោះ ក៏មានរៀបចំជាផ្សារលើដំបូលចុង សប្តាហ៍ (Rooftop Market) ដែលមានលក់ចំណីចំណុក និង ផលិតផលសិល្បៈក្នុងស្រុកថែមទៀតផង!
Article by SRIN SOKMEAN
