Sovrin
Sovrin
អត្ថប្រយោជន៍នៃការម៉ាស្សាបាតជើងដែលនឹងផ្លាស់ប្តូរជីវិតស្ទើរនឹកស្មានមិនដល់
TRAVEL & LIVING a month ago
ប្រិយមិត្តប្រាកដជាធ្លាប់បានទទួលបទពិសោធរួចមកហើយនៃការម៉ាស្សាបាតជើង ដោយហេតុបច្ចុប្បន្នការម៉ាស្សានេះមានការពេញនិយម និងមានតម្លៃសមរម្យបំផុត ម្យ៉ាងវាក៏ជាវិធីម៉ាស្សាដែលយើងអាចអនុវត្តបានដោយខ្លួនឯងផងដែរ។ ការម៉ាស្សាបាតជើងមានអាយុកាលច្រើនរយឆ្នាំ និងបានសុសសាយទៅកាន់វប្បធម៌តាមប្រទេសនានា ជុំវិញពិភពលោក។ វាគឺជាវិធីដែលគេប្រើញឹកញាប់ដើម្បីជំរុញដល់សុខភាព និងធ្វើឱ្យរាងកាយទទួលបានអារម្មណ៍សម្រាក។ បច្ចុប្បន្ន ក្បួននៃការម៉ាស្សាបាតជើងត្រូវបានដកស្រង់ចេញពីក្បួនសម្រួលសរសៃរាងកាយរបស់ប្រពៃណីជប៉ុនមួយហៅថា Shiatsu និងក្បួនម៉ាស្សាបាតជើងវេជ្ជសាស្ត្រមួយហៅថា reflexology។ ការម៉ាស្សាប្រើកម្លាំងសង្កត់ទៅលើបាតជើងនេះត្រូវបានគេជឿថា វាជួយបញ្ចេញការស្ទះថាមពលពីរាងកាយ សម្រួលការចុកចាប់ សម្រាលភាពតានតឹង និងជួយឱ្យរបួសឆាប់ធូរស្បើយផងដែរ។ ការម៉ាស្សាបាតជើងបែបប្រពៃណីនេះជាទូទៅគេប្រើដៃ ពេលខ្លះប្រើឈើឬឧបករណ៍ឈ្លីដើម្បីរំញោចទៅចំណុចសំខាន់ៗនៃជើងឱ្យកាន់តែទទួលបានប្រសិទ្ធភាព។ មិនថាទទួលយកសេវាកម្មម៉ាស្សា ឬធ្វើការម៉ាស្សាដោយខ្លួងឯង ការម៉ាស្សាបាតជើងជាប្រចាំនឹងទទួលបានអត្ថប្រយោជន៍ចំពោះសុខភាព និងផ្លាស់ប្តូរជីវិតស្ទើរនឹកស្មានមិនដល់។
ជំរុញចលនាឈាម
យើងអាចសម្គាល់បាននៅពេលយកម្រាមដៃមកលញ់ឬឈ្លីនៅលើថ្ងាស ដែលនឹងឃើញថាកន្លែងនោះប្រែទៅជាពណ៌ក្រហម។ ការពិតណាស់ ការម៉ាស្សាជាលិការាងកាយអាចជួយរំញោចលំហូរឈាមដែលជាផ្នែកមួយនៃរាងកាយ។ នេះជាហេតុផលដែល ការម៉ាស្សាជើងញឹកញាប់មានអត្ថប្រយោជន៍ចំពោះអ្នកជំងឺដែលមានកំណត់លំហូរឈាមនៅត្រឹមចុងជើង ដូចជាជំងឺទឹកនោមផ្អែម ឬជំងឺរៃណូ (Raynaud’s diseases) ដែលជាការរួមត្បៀតសរសៃឈាមនៅផ្នែកណាមួយនៃសរីរាង្គ។ ការជំរុញចលនាឈាមទៅចុងជើង វាក៏អាចជួយបង្កើនអាយុកាលអវយវៈ និងពង្រឹងឱ្យអារម្មណ៍នៃញ្ញាណទូទៅប្រសើរឡើង។ ចំពោះអ្នកឧស្សាហ៍ត្រជាក់ចុងជើង ការម៉ាស្សាបាតជើងជាវិធីមួយអាចជួយកម្តៅឡើងវិញដោយមិនចាំបាច់ប្រើទឹកក្តៅស្អំឬពាក់ស្រោមជើងទៀតឡើយ។
ទាក់ទងនឹងសរីរាង្គ
តាមក្បួនម៉ាស្សាបាតជើងវេជ្ជសាស្ត្រដែលហៅថា reflexology បានរៀបរាប់ថា ចំណុចតាមតំបន់ផ្សេងៗនៃបាតជើងមានទំនាក់ទំនងគ្នាយ៉ាងជិតស្និទ្ធជាមួយសរីរាង្គ និងជាលិកាផ្សេងៗនៅទូទាំងរាងកាយ។ ជាក់ស្តែង ពេលយើងធ្វើការម៉ាស្សាទៅលើចំណុចជាក់លាក់ណាមួយ វានឹងជួយជំរុញជាតិពុល និងបង្កើនសុខភាពលំហូរឈាមពេញរាងកាយបានល្អ។ បើតាមអត្ថបទស្រាវជ្រាវមួយនៃសាកលវិទ្យាល័យ Minnesota បានកត់ត្រាថា ក្បួនម៉ាស្សាជើងបែបវេជ្ជសាស្ត្រ reflexology មានសារៈសំខាន់ក្នុងការព្យាបាលជំងឺដែលងាយប្រឈមមួយចំនួនដូចជា ស្ត្រេស មហារីក ទឹកនោមផ្អែម និងឈឺក្បាលប្រកាំង។
បន្ថយសម្ពាធឈាម
ជាមួយនឹងការសម្រួលចលនាឈាម ការសិក្សាមួយកាលពីឆ្នាំ២០០៤ ដោយវេជ្ជបណ្ឌិតកូរ៉េខាងត្បូងបានរកឃើញថា អ្នកដែលទទួលបានការម៉ាស្សាបាតជើងបែបវេជ្ជសាស្ត្រ reflexology ម្តងហើយម្តងទៀត សម្ពាធឈាមខាងលើរបស់ពួកគេដែលហៅថា ស៊ីស្តូលីក(Systolic) ជាសម្ពាធកើតឡើងនៅពេលបេះដូងកន្ត្រាក់បាញ់ឈាមមកសរសៃឈាមក្រហមក្នុង មានការថយចុះគួរឱ្យកត់សម្គាល់។ លើសពីនេះកម្រិតនៃជាតិខ្លាញ់ Triglyceride ដែលជាបណ្តុំនៃសារធាតុខ្លាញ់សុទ្ធអណ្តែតនៅក្នុងសរសៃឈាមក៏មានការថយចុះផងដែរ។
កាត់បន្ថយហើមជើង
Edema ឬ ការហើមដោយគ្មានមូលហេតុគឺជាការកើនឡើងជាតិទឹកលើសនៅក្នុងរាងកាយ។ ការហើមនេះអាចកើតឡើងនៅលើជើង និងប្រអប់ជើងចំពោះអ្នកមានស្ថានភាពជំងឺខុសៗគ្នាដូចជា ជំងឺទឹកនោមផ្អែម បញ្ហាបេះដូង បញ្ហាក្រលៀន ឬស្ត្រីមានផ្ទៃពោះជាដើម។ តាមការសិក្សារបស់សាលាគិលានុបដ្ឋាយិកានៃប្រទេសទួរគីកាលពីឆ្នាំ ២០១០ បានរកឃើញថា ជើងដែលហើមដោយការមានផ្ទៃពោះត្រូវបានកាត់បន្ថយបន្ទាប់ពីស្ត្រីទទួលបានការម៉ាស្សាបាតជើងជាប្រចាំ។
ជួយឱ្យគេងលក់ស្រួល
ការទទួលបានការម៉ាស្សាបាតជើងមុនពេលចូលគេង អាចជួយឱ្យគេងលក់ស្រួលជាងមុន ដោយហេតុវាជួយសម្រួលលំហូរឈាម រំញោចឱ្យមានអារមុ្មណ៍សម្រាក និងធ្វើឱ្យរាងកាយមានអារម្មណ៍ស្រាលជាងមុន។ ដើម្បីគេងលក់ស្រួល អ្នកជំនាញផ្តល់ដំបូន្មានឱ្យម៉ាស្សាបាតជើងក្នុងមួយចំហៀងយ៉ាងហោចណាស់៤នាទី។
បន្ទាប់ពីបានអានចំណុចប៉ុន្មានខាងលើ តើការម៉ាស្សាបាតជើងពិតជាអាចជួយដល់សុខភាពមែនឬ? ជាភស្តុតាងជាក់ស្តែង សូម្បីសាលាវេជ្ជសាស្ត្រ Harvard នៅទីក្រុងបូស្តុន (Boston)នៃសហរដ្ឋអាមេរិកក៏បានកត់ត្រាដែរថា ការម៉ាស្សាបាតជើងអាចជួយសម្រួលលំហូរឈាម រំញោចសាច់ដុំ កាត់បន្ថយអារម្មណ៍តានតឹង ក៏ដូចជាសម្រួលការឈឺចាប់។ និយាយរួមមកមិនថាអ្នកមានបញ្ហាណាមួយដូចបានរៀបរាប់ខាងលើ ការម៉ាស្សាបាតជើងមិនត្រឹមតែជាវិធីធ្វើឱ្យអារម្មណ៍ល្អប៉ុណ្ណោះទេ តែថែមទាំងជំរុញសុខភាពឱ្យប្រសើរឡើង និងធ្វើឱ្យអាយុវែងផងដែរ៕
Article by SOVRIN
