Sovrin
Sovrin
បង្កើតបរិយាកាសរីករាយនៅថ្ងៃបុណ្យនៃក្តីស្រលាញ់ជាមួយភោជនាហារដ៏ពិសេស
TRAVEL & LIVING 2 months ago
ទំនាក់ទំនងយូរអង្វែងរមែងកើតឡើងពីការចេះយល់ចិត្តគ្នាទៅវិញទៅមក ហើយទំនាក់ទំនងកាន់តែស្អិតរមួតក៏រមែងកើតឡើងពីការចេះបង្កើតពេលវេលាផ្អែមល្ហែមជាមួយគ្នា។ ក្នុងឱកាសថ្ងៃបុណ្យ Valentine’s Day ឬ បុណ្យនៃក្តីស្រឡាញ់ ថ្វីបើមិនមែនជាបុណ្យជាតិសាសន៍របស់យើងក៏ពិតមែន តែយើងក៏អាចជ្រើសរើសថ្ងៃនេះបង្កើតសកម្មភាពបង្ហាញពីក្តីស្រឡាញ់ទៅកាន់មនុស្សជុំវិញខ្លួន មនុស្សជាទីស្រឡាញ់ ជាពិសេសមនុស្សសំខាន់ផងដែរ។ ថ្ងៃនេះ សូវរីន បានសម្រិតសម្រាំងនាំយកនូវមុខម្ហូបយ៉ាងពិសេសសម្រាប់ជាការរៀបចំទទួលទានជួបជុំជាមួយមនុស្សពិសេស ឬមនុស្សជាទីស្រឡាញ់ ដែលអាចបង្កើតជាអនុស្សាវរីយ៍ដ៏ផ្អែមល្ហែមមួយពោរពេញទៅដោយអត្ថន័យជ្រាលជ្រៅបំផុត។ យើងជឿជាក់ថាអ្នកនឹងទទួលបានការស្រឡាញ់ ដូចទៅនឹងការស្រឡាញ់ដែលអ្នកបានផ្តល់ទៅឱ្យពួកគេ។
ស៊ុបគ្រីមបង្កង(Lobster Bisque): គ្រឿងផ្សំ៖ បង្កង៤ក្បាល, គ្រីមទឹកដោះគោ (Heavy cream) ២៥០ម.ល, ទឹកស្ងោរបង្កង១លីត្រ, ប៊័រ១ស្លាបព្រាបាយ, ប៉េងប៉ោះកិន៩០ក្រាម, ប្រេងអូលីវ២ស្លាបព្រាបាយ, ខ្ទឹមបារាំង១មើម(ហាន់ល្អិតៗ), ការ៉ុត១ផ្លែ(ហាន់ល្អិតៗ), អំបិល១ស្លាបព្រាកាហ្វេ, ម្សៅស៊ុប១ស្លាបព្រាកាហ្វេ, ស្ករស១ស្លាបព្រាកាហ្វេ, ម្រេចកន្លះស្លាបព្រាកាហ្វេ, ខ្ទឹមស៤កំពឹស(ចិញ្រ្ចំាល្អិតៗ) និងជីរ Parsley ចិញ្រ្ចំាឱ្យម៉ដ្ត(សម្រាប់រោយពីលើ)។
វិធីធ្វើ៖ ចាប់ផ្តើមដំបូងដោយយកបង្កងទៅស្ងោរ ឬចំហុយរយៈពេល៥នាទី សឹមយកបង្កងទៅបកសំបកទុកមួយអន្លើ។ បន្ទាប់មកដាក់ដាំខ្ទះឱ្យក្តៅ ដាក់ប៊័រទុកឱ្យរលាយ ដាក់ប្រេងអូលីវ ខ្ទឹមស ខ្ទឹមបារាំងចូលទុកឱ្យឈ្ងុយ ទើបដាក់សាច់បង្កងចូលដោយប្រើកម្តៅល្មម ចៀនសាច់បង្កងពីរបីត្រឡប់ រួចស្រង់សាច់បង្កងទុកមួយឡែកសិន។ ក្រោយមកយកការ៉ុត និងទឹកស្ងោរបង្កង ចាក់ចូលក្នុងខ្ទះដដែល រួចរម្ងាស់រហូតដល់ពុះ សឹមដាក់ប៉េងបោះកិន អំបិល ម្សៅស៊ុប ស្ករសចូល។ បន្ទាប់មកទៀតត្រូវយកទឹកស្ងោរនោះទៅក្រឡុកឬកិនឱ្យម៉ដ្ត ទើបយកមកត្រងយកកាកចេញ រួចយកល្បាយនោះមកដាក់រម្ងាស់ម្តងទៀត សឹមបន្ថែមគ្រីមទឹកដោះគោចូលកូរឱ្យសព្វល្អ។ ចុងក្រោយដួសដាក់ក្នុងចាន ដាក់សាច់បង្កងចូល បន្ថែមម្រេច និងរោយជីរ Parsley ពីលើជាការស្រេច។ អាចញ៉ាំជាមួយនំប៉័ងនឹងទទួលបានឱជារសកាន់តែឆ្ងាញ់។
នំខេកឈីសប្ល៊ូប៊ឺរី(Blueberry cheesecake): គ្រឿងផ្សំ៖ ផ្លែប្ល៊ូប៊ឺរី១៣០ក្រាម, ផ្លែប្ល៊ូប៊ឺរីស្រស់សម្រាប់បន្ថែមពីលើ(តាមចំណូលចិត្ត), ស្ករស៦០ក្រាម, ប៊័រសាប៣០ក្រាម, នំឃុកឃី (cookie)១០០ក្រាម, គ្រីមឈីស២០០ក្រាម, យ៉ាអ៊ួរ៥០ក្រាម, ទឹកដោះគោស្រស់៥០ម.ល, គ្រីមទឹកដោះគោ (Heavy cream) ២០០ក្រាម, ម្សៅសម្រាប់ធ្វើចាហួយ១ស្លាបព្រាកាហ្វេ និងកែវជ័រថ្លា(សម្រាប់ដាក់នំ)។
វិធីធ្វើ៖ ដំបូងត្រូវយកផ្លែប្ល៊ូប៊ឺរី១៣០ក្រាម និងស្ករស៣០ក្រាមកដាក់កូរលើភ្លើងឱ្យរលាយ សឹមយកទៅក្រឡុកចូលគ្នាឱ្យម៉ដ្តល្អ។ បន្ទាប់មកត្រូវយកនំឃុកឃីមកដំឱ្យម៉ដ្តល្មម ទើបយកទៅលាយជាមួយប៊័រសាបទុកមួយឡែក។ យកគ្រីមឈីស យ៉ាអ៊ួរ ស្ករស៣០ក្រាម មកលាយបញ្ចូលគ្នាឱ្យសព្វ។ បន្ទាប់មកត្រូវយកម៉ាស៊ីនវាយគ្រីមមកវាយគ្រីមទឹកដោះគោឱ្យឡើងខាប់ល្អ។ ក្រោយមកយកទឹកដោះគោស្រស់ និងម្សៅសម្រាប់ធ្វើចាហួយមកកូរលើភ្លើងរយៈពេល១នាទី រួចយកចាក់ចូលជាមួយគ្រីមទឹកដោះគោដែលបានវាយរួច និងគ្រីមឈីសដែលបានលាយមុននេះ កូរចូលគ្នាឱ្យក្លាយជាល្បាយតែមួយ។ យកនំឃុកឃីដាក់ក្នុងកែវ ហើយសង្កត់ឱ្យណែន សឹមយកល្បាយគ្រីមឈីសមកដាក់លើនំឃុកឃី បន្ទាប់មកយកដំណាប់ប្ល៊ូប៊ឺរីដែលបានកូររួចនោះដាក់ពីលើ និងចុងក្រោយបន្ថែមផ្លែប្ល៊ូប៊ឺរីស្រស់ពីលើដូចក្នុងរូបជាការស្រេច។ អាចទទួលទានបានភ្លាមៗបន្ទាប់ពីធ្វើរួច ឬយកទៅក្លាសេឱ្យត្រជាក់តាមចំណូលចិត្ត។
ស្រាក្រឡុកបាខាឌី(Bacardi Cocktail): គ្រឿងផ្សំ៖ Bacardi Superior White Rum ៤៥ម.ល, ទឹកក្រូចឆ្មារ ២០ម.ល, ទឹកស៊ីរ៉ូធម្មតា១៥ម.ល, ទឹកស៊ីរ៉ូហ្រ្គីណាឌីន (grenadine syrup) ៥ម.ល, ផ្លែស្រ្តប៊ឺរីស្រស់២ផ្លែ(សម្រាប់ដាក់មាត់កែវ) និងទឹកកកដុំបន្តិច។
វិធីធ្វើ៖ ត្រូវយកគ្រឿងផ្សំទាំងអស់ចាក់បញ្ចូលគ្នា រួចយកទៅលាយជាមួយទឹកកក សឹមយកទៅក្រឡុកចុះឡើងរយៈពេល១៥ ទៅ២០វិនាទី។ ចុងក្រោយចាក់យកតែទឹកដាក់ចូលក្នុងកែវជាការស្រេច។
អយស្ទ័របំពងទឹកជ្រលក់ខ្ទឹមស(Fried Oyster with Garlic Mayo): គ្រឿងផ្សំ៖ អយស្ទ័រ៥ទៅ៧គ្រាប់(តាមចំណូលចិត្ត), ម្សៅបំពង៦ស្លាបព្រាបាយ, ពងមាន់១គ្រាប់, ម្សៅខ្ទឹមស១ស្លាបព្រាបាយ, យ៉ាអ៊ួរ៣ស្លាបព្រាបាយ, ម៉ាយូណេស៣ស្លាបព្រាបាយ, ជីរ Parsley(ចិញ្រ្ចាំឱ្យម៉ដ្ត)១ស្លាបព្រាបាយ, អំបិល១ស្លាបព្រាកាហ្វេ និងប្រេង (សម្រាប់បំពង)។
វិធីធ្វើ៖ ជំហានដំបូងត្រូវធ្វើទឹកជ្រលក់ជាមុនសិន ដោយយកគ្រឿងផ្សំដូចជា ម្សៅខ្ទឹមស យ៉ាអ៊ួរ ម៉ាយូណេស ជីរ Parsley និងអំបិល មកលាយបញ្ចូលគ្នាឱ្យសព្វល្អ រួចភ្លក់តាមចំណូលចិត្ត។ បន្ទាប់មកយកពងមាន់កូរឱ្យបែកដាក់ក្នុងចានមួយ និងម្សៅបំពងដាក់ក្នុងចានមួយដោយឡែកទៀត។ យកសាច់អយស្ទ័រលាងទឹកឱ្យស្អាត សឹមយកទៅប្រឡាក់ជាមួយម្សៅបំពង រួចយកទៅជ្រលក់ក្នុងពងមាន់ ទើបយកមកប្រឡាក់ជាមួយម្សៅបំពងម្តងទៀត (ធ្វើបែបនេះដើម្បីឱ្យម្សៅខាំជាប់ល្អ)។ បន្ទាប់មកទៀតដាក់ដាំខ្ទះដាក់ប្រេងចូលទុកឱ្យក្តៅ ដោយប្រើកម្តៅល្មម ទើបយកអយស្ទ័រមកបំពងរយៈពេល៣០ទៅ៤៥វិនាទី ឬរហូតដល់អយស្ទ័រឆ្អិនល្អ (កុំបំពងឱ្យក្រៀមខ្លាំងពេក)។ ជាចុងក្រោយរៀបចំតុបតែងដូចក្នុងរូបជាការស្រេច។
បង្កងដុតប៊័រខ្ទឹមស(Garlic Butter Lobster Tail): គ្រឿងផ្សំ៖ បង្កង៣០០ក្រាម, ប៊័រ១០០ក្រាម, ម្សៅម្ទេសហាវៃក្រហម(Paprika Powder)២ស្លាបព្រាកាហ្វេ, ម្ទេសម៉ដ្ត(តាមចំណូលចិត្ត), ជីរ Parsley(ចិញ្រ្ចាំឱ្យល្អិត)២ស្លាបព្រាបាយ និងខ្ទឹមស(ចិញ្រ្ចាំឱ្យល្អិត)១ស្លាបព្រាបាយ។
វិធីធ្វើ៖ ដំបូងត្រូវយកប៊័រទៅរំលាយ ដោយដាក់ដាំខ្ទះឱ្យក្តៅល្មម ដាក់ប៊័រចូលទុកដល់រលាយ ទើបយកទៅលាយជាមួយ ម្សៅម្ទេសហាវៃក្រហម ម្ទេសម៉ដ្ត ជីរ Parsley និងខ្ទឹមស។ យកបង្កងលាងទឹកឱ្យស្អាត រួចកាត់ខ្នងជាពីរ(ដូចក្នុងរូប) បន្ទាប់មកយកប៊័រដែលបានលាយមុននេះមកលាបលើសាច់បង្កងឱ្យសព្វចូលជាតិល្អ។ ចុងក្រោយយកទៅដុតក្នុងអូវិនដោយប្រើកម្តៅ២៣០អង្សា រយៈពេល១០ទៅ១៥នាទីជាការស្រេច(រយៈពេលដុតយូរ ឬឆាប់អាស្រ័យទៅលើទំហំបង្កង)៕
Article by SOUNG SOKSAN
