Sovrin
Sovrin
តាមធម្មតាកោសិកាស្បែកកូនក្មេងមានសភាពនៅខ្ចីហើយស្តើង ដែលងាយប្រតិកម្មបំផុតជាមួយអ្វីៗនៅជុំវិញខ្លួន ជាពិសេសមកដល់រដូវភ្លៀង អាកាសធាតុពោរពេញដោយសំណើម និងធូលីដី អាចនឹងធ្វើឲ្យស្បែកកូនងាយប្រតិកម្មបំផុត។ ចំណុចសំខាន់ដែលអ្នកម្តាយត្រូវយកចិត្តទុកដាក់ចម្បង គឺជ្រើសរើសប្រើផលិតផលដែលតម្រូវទៅតាមរដូវកាលឬអាកាសធាតុ ដោយផលិតផលនីមួយៗត្រូវប្រាកដថាមានផ្ទុកនូវធាតុផ្សំពីធម្មជាតិ និងជារូបមន្តដែលអាចដោះស្រាយបញ្ហាស្បែកផ្សេងៗនៅរដូវភ្លៀង។ តាមរយៈវេជ្ជបណ្ឌិត សាប់ហាស៊ីនី (Subhasini) អ្នកជំនាញខាងផ្នែកជំងឺសើរស្បែកនៃក្រុមស្រាវជ្រាវវិទ្យាសាស្ត្រ បាននិយាយថា៖ ការដែលអាកាសធាតុពោរពេញដោយសំណើម អាចជាករណីធ្វើឲ្យបែកញើសជាហេតុបង្កឲ្យឡើងកន្ទួលឬរលាកនៅលើស្បែក និងឆ្លងមេរោគ។ ការឡើងកន្ទួលឬរលាកនៅលើស្បែកនេះ រមែងកើតឡើងនៅលើក្បាលធ្វើឲ្យស្បែកក្បាលរមាស់ និងឡើងអាចម៍ក្របី ហើយវាក៏ជាករណីងាយប្រឈមបំផុតនៅក្នុងរដូវភ្លៀង។ កត្តាសំខាន់បំផុតក្នុងការថែស្បែកកូននៅរដូវភ្លៀង អ្នកម្តាយត្រូវប្រាកដថាស្បែករបស់កូនបានផ្តល់សំណើមត្រឹមត្រូវជាមួយផលិតផលដែលផ្សំពីធម្មជាតិ និងចៀសវាងផលិតផលផ្ទុកនូវសារធាតុមួយចំនួនដូចជា សារធាតុ Phthalates ឬសារធាតុប្រេង សារធាតុប៉ារ៉ាបែន (Parabens) អាកុល សារធាតុពណ៌ ប្រេងរ៉ែ និង សារធាតុ Animal-derived ingredients។
ក្រៅពីការជ្រើសរើសផលិតផលប្រើប្រាស់តម្រូវទៅតាមរដូវកាល ជាមួយគ្នានេះ វេជ្ជបណ្ឌិតខាងលើក៏បានណែនាំនូវគន្លឹះ៥ជំហានក្នុងការថែទាំស្បែកកូននៅរដូវភ្លៀងផងដែរ។ ជំហានទាំង៥នោះរួមមាន ៖
ជំហានទី១៖ សម្រាប់ការងូតទឹកជាមួយសាប៊ូដុំ ត្រូវជ្រើសរើសសាប៊ូដែលទន់ឆាប់រលាយ ហើយជាសាប៊ូដែលផ្សំឡើងពីឱសថបុរាណធម្មជាតិ ជួយរក្សាស្បែកឲ្យទន់ និងមានសំណើម។ ការប្រើសាប៊ូរូបមន្តផ្សំជាមួយប្រេងអូលីវ និងប្រេងអាល់ម៉ុនអាចការពារស្បែករបស់កូន និងធ្វើឲ្យស្បែកកូនទន់ល្មើយ ក៏ព្រោះតែប្រេងអូលីវអាចជួយផ្តល់សារធាតុចិញ្ចឹមដល់ស្បែក ចំណែកឯប្រេងអាល់ម៉ុនជួយផ្តល់សំណើមបានយ៉ាងល្អ។
ជំហានទី២៖ សម្រាប់ការងូតទឹកប្រើសាប៊ូទឹកវិញ អ្នកអាចជ្រើសរើសសាប៊ូដែលជួយធ្វើឲ្យស្បែកទន់ និងមានសំណើម។ អាចជាសាប៊ូដែលរូបមន្តផ្សំពីសណ្តែកខៀវឬសណ្តែកបាយ និងសណ្តែកបារាំងលឿង ដោយសារវាអាចសម្អាតបានយ៉ាងល្អ ធ្វើឲ្យស្បែកទន់ល្មើយ ពិសេសស័ក្តិសមចំពោះក្មេងដែលស្បែកងាយប្រតិកម្ម។
ជំហានទី៣៖ ចំពោះការកក់សក់នៅអំឡុងរដូវភ្លៀង អ្នកត្រូវប្រាកដថាបានកក់សក់ឲ្យកូនយ៉ាងហោចណាស់ ២ដងក្នុងមួយសប្តាហ៍។ ការធ្វើដូចនេះអាចជួយជៀសវាងការឡើង ក្រមរ ឬអាចម៍ក្របីនៅលើក្បាល និងធ្វើឲ្យសក់និងស្បែកក្បាលមានភាពស្រស់ស្រាយ។ ជម្រើសល្អសម្រាប់ស្បែកក្បាលកូន អ្នកអាចជ្រើសរើសសាប៊ូកក់សក់ដែលមានរូបមន្តផ្សំពីផ្ការំយោល និងសណ្តែកបារាំងលឿង ព្រោះផ្ការំយោលនឹងជួយបន្ទន់សក់ រីឯសណ្តែកបារាំងជួយចិញ្ចឹមសក់ផងដែរ។
ជំហានទី៤៖ ងាកមកការថែទាំស្បែក អ្នកអាចជ្រើសរើសឡេលាបស្បែកពពួក កាឡាមីន (Calamine) ដែលមានផ្ទុកធាតុផ្សំពីធម្មជាតិដូចជា ប្រទាលក្រពើ ប្រេងផ្កាស្មៅ និងប្រេងម៉ូតាត(Mustard)។ ធាតុផ្សំទាំងនេះអាចដោះស្រាយនូវបញ្ហារោល កន្ទួល និងសម្រួលបញ្ហារមាស់លើស្បែកបានយ៉ាងឆាប់រហ័ស។
ជំហានទី៥៖ បន្ទាប់ពីងូតទឹករួច គប្បីលាបគ្រីមការពាររលាក ដោយជ្រើសរើសគ្រីមមានរូបមន្តផ្សំឡើងពីប្រេងអាល់ម៉ុនដែលវាជួយការពារ ការហើម ការរោលរលាក និងកន្ទួលនៅលើស្បែកជាដើម។
គួរចងចាំថា ការការពារស្បែកកូនដ៏ល្អបំផុតដើម្បីចៀសវាងការឆ្លងមេរោគ និងកន្ទួលរមាស់នៅរដូវភ្លៀងនេះ គឺត្រូវអនាម័យកូនជាប់ជានិច្ច និងចៀសវាងពីសំណើម។ ហើយក៏ត្រូវប្តូរខោទឹកនោមកូនជាប្រចាំដើម្បីការពាររលាកផងដែរ។ ជាមួយនឹងគន្លឹះងាយៗទាំងនេះ ជឿជាក់ថាអ្នកម្តាយគ្រប់រូបនឹងទទួលបានចំណេះដឹងបន្ថែមសម្រាប់ការថែទាំកូន ក៏ដូចជាលែងបារម្ភពីបញ្ហាកើតឡើងចំពោះស្បែកកូននៅក្នុងរដូវភ្លៀងនេះ៕
Article by SOUNG SOKSAN
