តោះ! សាកធ្វើពងទាប្រៃតាមរូបមន្តថ្មី៣បែបបង្កើតរសជាតិយ៉ាងឆ្ងាញ់ពិសេស
TRAVEL & LIVING 4 years ago បើនិយាយពីអាហារក្លែមបបរស យើងនឹងភ្នកនឹកដល់មុនគេនូវអាហារងាយរកងាយចម្អិននោះគឺ ស៊ុត ជាពិសេសគឺស៊ុតប្រៃតែម្តងដែលនឹងបង្កើនឱជារសនៃការទទួលទានកាន់តែឆ្ងាញ់ពិសា។ ស៊ុតប្រៃ ឬពងទាប្រៃជាទូទៅយើងអាចរកទិញបាននៅតាមបណ្តាផ្សារនានាទាំងតូច និងធំ ហើយចំពោះការចម្អិនគ្រាន់តែស្ងោរក្នុងទឹកពុះឬដាក់ផ្ងំក្នុងបាយតែប្រមាណ១០នាទីជាការស្រេច។ កន្លងមកអាហារប្រៃសាច់សផុយសាច់លឿងក្រមួតនេះ យើងធ្លាប់តែឃើញចាស់ៗធ្វើតាមបែបវិធីងាយៗដោយយកពងទាសាបដាក់ក្នុងទឹកអំបិលរយៈពេលពី ១០ទៅ ១៥ថ្ងៃ រួចយកមកទទួលទាន ដោយឡែកព្រមគ្នានេះដែរ ដើម្បីជាចំណេះដឹងថ្មីសម្រាប់ស្ត្រីមេផ្ទះ សូវរីន សូមលើកយកនូវវិធីធ្វើពងទាប្រៃបែបថ្មី៣បែបគឺ ការត្រាំឱសថបុរាណ ជ្រក់ទឹកត្រី និងកប់អំបិល ដូចនេះចង់ដឹងថរូបមន្តធ្វើមានលក្ខណៈពិសេសបែបណា តោះ! យើងទៅទស្សនាទាំងអស់គ្នា។
• រូបមន្តទី១ ៖ ត្រាំឱសថបុរាណ
សម្រាប់វិធីធ្វើពងទាប្រៃត្រាំឱសថបុរាណយើងត្រូវមានគ្រឿងផ្សំតែប៉ុន្មានមុខប៉ុណ្ណោះ ក្នុងនោះរួមមាន ខ្ទឹមស (ដំឲ្យបែក) ៥កំពឹស, ស្លឹកក្រូចសើច ១០សន្លឹក, រំដេង (ហាន់បន្ទះ) ១មើម, ក្រូចឆ្មារ ២ផ្លែ (ហាន់បន្ទះ), គល់ស្លឹកគ្រៃ ៥មើម (ចិតបញ្ឆិត), ម្ទេសទុំ ១០គ្រាប់, ពងទា ១០គ្រាប់, អំបិលក្រួស ១ចានចង្កឹះ និងទឹក ៤ចានចង្កឹះ។ ចំពោះ គ្រឿងផ្សំខាងលើត្រូវលាងទឹកឲ្យស្អាតទុកឲ្យស្រស់ទឹក ពិសេសពងទាត្រូវលាងសម្អាតបីទឹកដោយយកដែកដុសឆ្នាំងដុសឲ្យជ្រះកម្អែលលាមកទា ម្យ៉ាងដើម្បីឲ្យសំបកពងទាសឹកងាយគ្រឿងផ្សំទាំងប៉ុន្មានជ្រាបចូលជាតិបានល្អ។ ក្រោយពីសម្អាតគ្រឿងផ្សំទាំងអស់ខាងលើរួចរាល់ លើកលែងតែអំបិល យើងចាប់ផ្តើមរូបមន្តលាយទឹកត្រាំដោយយកអំបិល១ចានចង្កឹះលាយជាមួយទឹក៤ចានចង្កឹះកូរចូលគ្នាឲ្យរលាយ រួចយកស្បៃចាក់ត្រងទឹកទុកដើម្បីច្រោះកម្ទេចចេញពីទឹកនោះ។ កាលណាច្រោះរួចរាល់ ចាក់ទឹកស្អាតនោះចូលទៅក្នុងឆ្នាំដាំភ្លើងឲ្យក្តៅរហូតពុះ ទើបចាក់គ្រឿងផ្សំដូចជា ខ្ទឹមស រំដេង ក្រូចសើច និងគល់ស្លឹកគ្រៃចូលមុនដោយគ្របទុកពុះរយៈពេលប្រាំនាទីយើងនឹងចាប់ផ្តើមឈ្ងុយក្លិនបែបតុមយំា ហើយបន្តទុក៥នាទីទៀតយើងនឹងឈ្ងុយក្លិនបែបឱសថបុរាណខ្មែរ ទើបលើកចុះពីជើងក្រានទុកឲ្យត្រជាក់សម្រាប់ប្រើការ។ ត្រៀមក្រឡជ័រឬកែវទំហំអាចផ្ទុកស៊ុត ១០គ្រាប់ ជូតឲ្យស្អាត បន្ទាប់មកតម្រៀបស៊ុតដាក់ចូលក្នុងក្រឡ ហើយចាក់ទឹកអំបិលដែលត្រងរួចចូល ព្រមគ្នានេះបន្ថែមបន្ទះក្រូចឆ្មារ និងម្ទេសទុំពីលើ រួចបិទគម្របជិតរក្សាទុករយៈពេលពី ១៥ ទៅ ២០ថ្ងៃ ទើបយកមកចម្អិនជាម្ហូបអាហារបាន។ យ៉ាងណាមិញ ក្នុងករណីចង់ត្រាំស៊ុតច្រើនអាចអនុវត្តរូបមន្តទឹក៤អំបិល១ចានចង្កឹះបន្ថែមដូចបានរៀបរាប់នៅខាងលើ រីឯស៊ុតដែលត្រាំបានពីរថ្ងៃយើងអាចឆ្លៀតថែរក្សាសម្រស់ដោយយកស៊ុតមកគោះយកតែទឹកអន្ធិលសលាបលើផ្ទៃមុខទុករយៈពេល ១៥នាទី លាងទឹកចេញដើម្បីជួយបន្តឹងស្បែកមុខក៏ដូចជាបំបាត់ស្នាមជ្រីវជ្រួញផងដែរ។
• រូបមន្តទី២ ៖ ជ្រក់ទឹកត្រី
តិចនិចជ្រក់ទឹកត្រីងាយស្រួលធ្វើ និងចាយពេលធ្វើត្រឹមតែ ១០ម៉ោងប៉ុណ្ណោះអាចហូបបាន ក្នុងនោះគ្រឿងផ្សំរួមមាន ពងទា ១០គ្រាប់ ទឹកត្រីមួយដបចំណុះ៧០០មីលីលីត្រ , ខ្ទឹមស ៤ កំពឹស(ហាន់ស្តើងៗ) ខ្ទឹមក្រហម ៣មើម(ហាន់ស្តើងៗ) និងម្ទេសទុំនិងខ្ចី ទៅតាមចំណូលចិត្ត។ មុនពេលចាប់ផ្តើមជ្រក់ កត្តាសំខាន់ត្រូវលាងសម្អាតពងទាបីទឹកឲ្យស្អាតដូចទៅនឹងចំណុចទី១ រួចទុកឲ្យស្រស់ទឹក បន្ទាប់មកចាប់ផ្តើមយកទឹកត្រីចាក់ចូលចានឬចានដែកទាំងអស់ ថែមស្ករសកន្លះស្លាបព្រាបាយ និងបីចេងមួយចុងស្លាបព្រាដើម្បីបន្ថែមរសជាតិ។ ដាក់ ខ្ទឹមស ខ្ទឹមក្រហម ម្ទេសទុំ ម្ទេសខ្ចីចូល បន្ទាប់មកទើបដាក់ស៊ុតចូលធ្វើជ្រក់។ លើកនេះយើងមិនមែនត្រាំស៊ុតទាំងសម្បកដូចមុននោះទេ ផ្ទុយមកវិញយើងគោះបកសំបកត្រងយកតែស៊ុតពណ៌លឿង ហើយដាក់ចូលទៅក្នុងទឹកត្រីថ្នមៗកុំឲ្យបែក។ ក្រោយគោះស៊ុតដាក់ចូលរួចរាល់អស់ យើងគ្របទុករយៈពេល ៥ម៉ោងទើបបើកគម្របដើម្បីប្រែពងខាងលើត្រលប់ទៅក្រោមវិញ និងគ្របជាថ្មី ដោយទុកចោលរយៈពេលប្រាំម៉ោងទៀតនឹងអាចទទួលទានបាន។ ១០ម៉ោងប៉ុណ្ណោះ ស៊ុតលឿងទាំងប៉ុន្មានបានក្លាយជាកករឹងឆ្អិនជាអាហារបែបជ្រក់អាចយកមកបរិភោគជាមួយបាយយ៉ាងឆ្ងាញ់ពិសា។
• រូបមន្តទី៣ ៖ កប់អំបិល
ស្រដៀងទៅនឹងរូបមន្តទី២ តែតិចនិចនេះចាយពេល ២៤ម៉ោងទើបអាចហូបបាន។ គ្រឿងផ្សំតិចបំផុតគឺ ពងទា ១០គ្រាប់ (លាងបីទឹកឲ្យស្អាត) អំបិលម៉ដ្ឋ១ចានគោម និងស្ករស ១ចានចង្កឹះ។ អនុវត្តយកអំបិល និងស្ករសកូរចូលគ្នាឲ្យសព្វ ចាក់ចូលក្នុងប្រអប់ជ័រឬកែវមួយហើយពាសអំបិលឲ្យស្មើសាច់ទើបយកស៊ុតមកសង្កត់យករាងផតៗពេញប្រអប់ដូចអំបែងនំគ្រក់។ ចាប់ផ្តើមគោះស៊ុតត្រងយកតែស៊ុតពណ៌លឿង រួចយកទៅដាក់ក្នុងក្រឡុកមូលៗថ្មមៗម្តងមួយៗកុំឲ្យបែក។ ក្រោយដាក់ស៊ុតលឿងទៅតាមក្រឡុករួចរាល់ យើងយកអំបិលបន្ថែមមួយចានចង្កឹះរោយពីលើតិចៗរហូតលុបបាត់ស៊ុតលឿង។ គ្របទុកចោលរយៈពេលមួយយប់មួយថ្ងៃរហូតកករឹងយើងអាចយកមកលាងទឹកស្អាត ហើយធ្វើម្ហូបទៅតាមចំណូលចិត្តដូចជាចៀន ឬឆាជាមួយបន្លែកាន់បង្កើនរសជាតិឈ្ងុយឆ្ងាញ់។ ចំពោះអំបិលសេសសល់ យើងអាចត្រៀមទុកធ្វើជាថ្មីច្រើនដងទៀតផងដែរ។
យ៉ាងណាហើយ បន្ទាប់ពីបានជ្រាបអំពីវិធីធ្វើពងទាប្រៃបែបថ្មីប្លែក ជឿជាក់ថាប្រិយមិត្តគ្រប់រូបនឹងអាចយកវិធីណាមួយទៅអនុវត្តនៅផ្ទះដោយខ្លួនឯងបាន។ បានទាំងមុខម្ហូបថ្មី បានទាំងរសជាតិថ្មី ថែមទាំងវិធីធ្វើបែបងាយៗ ចាំដល់ណាទៀតចាប់ផ្តើមសាកល្បងពីឥឡូវនេះទាំងអស់គ្នា៕
Article by HEM SOKKHIM