ជាទូទៅបើនិយាយអំពីដំណើរកម្សាន្តសម្រាប់ថ្ងៃឈប់សម្រាកនានា វាជារឿងពិបាកក្នុងការកំណត់ថាតើតំបន់ទេសចរណ៍ណាមួយជាគោលដៅល្អបំផុតសម្រាប់អ្នកទេសចរទាំងឡាយ ពីព្រោះបុគ្គលម្នាក់ៗរមែងមានចំណង់ចំណូលចិត្តក៏ដូចជារសនិយមនៃដំណើរកម្សាន្តផ្សេងៗពីគ្នា អាស្រ័យលើពេលវេលានិងគម្រោង កញ្ចប់ថវិកាទេសចរណ៍ជាក់ស្តែង ។ ទោះបីជាយ៉ាងណាក៏ដោយ ក្នុងឱកាសចុងឆ្នាំ២០១៩ ឈានឆ្លងចូល២០២០ ដ៏ខ្លីខាងមុខនេះ សូវរីនសូមណែនាំគោលដៅទេសចរណ៍ចំនួន៤ធំៗ ផ្អែកទៅលើទីតាំងប៉ូលទេសចរណ៍ធំៗទាំង៤នៃព្រះរាជាណាចក្រកម្ពុជាគឺ ភ្នំពេញនិងតំបន់ជុំវិញ តំបន់ជុំវិញបឹងទន្លេសាប តំបន់ឆ្នេរសមុទ្រ និង តំបន់ភូមិភាគឦសាន។
១. ទូកទេសចរណ៍ឡឺទន្លេ (Le Tonle Boat) រាជធានីភ្នំពេញ
Le Tonle ជាឈ្មោះទូកទេសចរណ៍ដែលមានរចនាបថជាទូកឈើបុរាណដែលមានប្រវែង២០ម៉ែត្រប៉ុន្តែត្រូវបានរៀបចំតុបតែងយ៉ាងស្រស់ប្រណិតទាន់សម័យរហូតក្លាយជាទីតាំងដែលភ្ញៀវទេសចរប្រុសស្រីជាតិនិងអន្តរជាតិប្រមូលផ្តុំគ្នាជិះលម្ហែកម្សាន្តលើផ្ទៃទឹកទន្លេចតុមុខយ៉ាងសែនមនោរម្យក្នុងរដូវទឹកសម្រកលាយឡំនឹងជំនោរខែកត្តិកបក់ផាយផាត់រំភើយៗ។ ភ្ញៀវទេសចរជាតិនិងអន្តរជាតិអាចជិះទូកបណ្តើរ សម្លឹងមើលអគារ Skyline ដែលមានកម្ពស់ខ្ពស់ឈរតម្រៀបជួរជាបន្ទាត់ស្របនៅប្របមាត់ទន្លេត្រើយខាងរាជធានីភ្នំពេញក្រោមពន្លឺភ្លើងកាំជ្រួចនៅពេលរាត្រីចាំងច្រាលពេញផ្ទៃវេហាស៍បង្កើតបានជាអនុស្សាវរីយ៍ជ្រាលជ្រៅបំភ្លេចមិនបានក្នុងខែធ្នូនេះ។ ភ្ញៀវអាចគោះកែវសុរាជប់លៀងរាំច្រៀងសប្បាយ ឬ ទទួលទានអាហារពេលល្ងាចយ៉ាងរ៉ូមេនទិកនៅលើទូកដោយគ្មានការរំខានពីមជ្ឈដ្ឋានខាងក្រៅ ។ ប៉ុន្តែភ្ញៀវក៏អាចគ្រាន់តែជិះទូកកម្សាន្ត រួចហើយឡើងមកត្រើយម្ខាងខាងអរិយក្សត្រដើម្បីឈប់សម្រាកគយគន់ថ្ងៃលិច ហើយប្រារព្ធពិធីជប់លៀងលក្ខណៈឯកជននៅលើភោជនីយដ្ឋាននិងបារបណ្តែតទឹករបស់សណ្ឋាគារ Floatation ។ រសជាតិស្រាសាំប៉ាញ និង សម្លេងតន្រ្តីស្រាលស្រទន់លើផ្ទៃទឹកអមដោយធម្មជាតិមាត់ច្រាំងជាមន្តស្នេហ៍ដកចិត្តមិនរួច។
២. ភូមិបណ្តែតទឹក និង តំបន់ផាប់ស្រ្ទីត (Pub Street) ខេត្តសៀមរាប
ខេត្តសៀមរាបជាគោលដៅទេសចរណ៍គ្រប់រដូវកាលរបស់អ្នកដំណើរជិតឆ្ងាយគ្រប់ទិសទី។ ក្រៅពីការដើរទស្សនាប្រាសាទបុរាណជាច្រើននៅតាមវង់តូច វង់ធំ ក្រុមប្រាសាទរលួស តំបន់ភ្នំគូលេន ភ្ញៀវទេសចរអាចចំណាយពេលទៅកាន់តំបន់ភូមិបណ្តែតទឹកមួយចំនួននៅក្នុងតំបន់បឹងទន្លេសាប ជាអាទិ៍ សហគមន៍ចុងឃ្នាស សហគមន៍កំពង់ភ្លុក សហគមន៍កំពង់ឃ្លាំង និង សហគមន៍មេជ្រៃ គយគន់ជីវភាពរស់នៅប្រចាំថ្ងៃរបស់អ្នកភូមិបណ្តែតទឹកនារដូវទឹកសម្រក ហ៊ុមព័ទ្ធដោយព្រៃលិចទឹកដែលជាជម្រកសត្វស្លាប និង មច្ឆជាតិដ៏សំខាន់។ ក្រោយព្រះទិនករលិចបាត់ទៅ ទេសចរទាំងអស់តែងតែរង់ចាំរាប់ថយក្រោយ (countdown) រហូតពាក់កណ្តាលអាធ្រាត្រត្រៀមស្វាគមន៍ថ្ងៃដំបូងនៃឆ្នាំថ្មី។ ម្ចាស់ហាងនានានៅតំបន់ផ្សាររាត្រី ឬ ផាប់ស្រ្ទីតនេះ សុទ្ធតែត្រៀមតុបតែងលម្អហាងរបស់ខ្លួនឲ្យស្របតាមកម្មវិធីបុណ្យបែបបស្ចិមប្រទេស តួយ៉ាង តាំងដើមណូអែល រៀបកាដូតូចធំនៅមុខហាង ដាក់ស្លាកប្រូម៉ូហ្សិន ឬ បញ្ចុះតម្លៃភេសជ្ជៈ Happy Hour និង បំពាក់ភ្លើង អំពូលជាអក្សរ Merry Christmas &; Happy New Year មិនដែលខាន។ យប់ឆ្លងឆ្នាំនឹងត្រូវបានបញ្ចប់ដោយស្នូរកាំជ្រួចក្ឌុងក្ឌាំង សម្លេងហ៊ោកញ្រ្ជៀវរបស់អ្នកចូលរួម ព្រមទាំងការប្រគំតន្រ្តីនៅកណ្តាលផ្លូវយ៉ាងអធឹកអធ័ម។
៣. តំបន់កោះរ៉ុង និង កោះរ៉ុងសន្លឹម ខេត្តព្រះសីហនុ
កោះរ៉ុង និង កោះរ៉ុងសន្លឹម ប្រៀបបានដូចជាបងប្អូនបង្កើតពីរនាក់ដែលមានកេរ្តិ៍ឈ្មោះល្បីជាងគេផ្នែកទេសចរណ៍ប្រចាំខេត្តព្រះសីហនុ ភូមិភាគនិរតី ក្នុងទសវត្សរ៍ចុងក្រោយនេះ។ ភ្ញៀវទេសចរចម្រុះជាតិសាសន៍ ជាពិសេសមិត្តយុវវ័យ ហាក់បីដូចជាមិនចេះជិនណាយនឹងសម្រស់ឆ្នេរខ្សាច់សក្បុស ទឹកសមុទ្រថ្លាឆ្វង់ និង ធនធានជីវៈចម្រុះបាតសមុទ្រដ៏សំបូរបែបនៃកោះទាំងពីរនេះទាល់តែសោះ។ សម្រាប់រដូវបុណ្យណូអែល និង ឆ្លងឆ្នាំសកលខាងមុខនេះ ក៏មិនខុសអ្វីពីសព្វមួយដងដែរ អ្នកទេសចរច្បាស់ជាសម្រុកធ្វើដំណើរទៅកាន់កោះទាំងពីរនេះដើម្បីប្រារព្ធកម្មវិធីជួបជុំមិត្តភក្តិ និង ក្រុមគ្រួសារ ជិះទូកកម្សាន្តតាមកោះ អាំងសាច់ប៊ីប៊ីឃ្យូនៅលើឆ្នេរខ្សាច់ ទទួលទានអាហារសមុទ្រស្រស់ៗរបស់អ្នកកោះ ;និង ចាក់ភ្លេងរាំលេងកម្សាន្តលាយ ឡំនឹងស្នូរទឹករលកជោរនាចបោកបក់គ្រាំៗ។ ម្ចាស់ផ្ទះសំណាក់ ឬ រីសតនៅកោះតែងតែត្រៀមរៀបចំកម្មវិធីកម្សាន្តសប្បាយផ្សេងៗដើម្បីកំដរភ្ញៀវដែលស្នាក់នៅទីនោះដល់ម៉ោង១២យប់។ ឆ្នេរដែលភ្ញៀវពេញនិយមទៅសម្រាកកម្សាន្តមានដូចជា ឆ្នេរសុខសាន្ត ឆ្នេរឡុងប៊ិច (Long Beach) ឆ្នេរឡុងសិត (Longset Beach) ឆ្នេរកោះតូច ឆ្នេរដូង ឬ ឆ្នេរខូខូណាត់ (Coconut) ឆ្នេរភ្លោះកោះឋានសួគ៌ ឆ្នេរភូមិ២៣ និង ឆ្នេរសារ៉ាសិន ។ល។
៤. ដងទន្លេមេគង្គលើ ខេត្តក្រចេះ
សម្រាប់ទេសចរដែលចូលចិត្តត្រាច់ចរទៅកាន់តំបន់ឆ្ងាយ លោកអ្នកអាចសាកល្បងបទពិសោធន៍ដំណើរកម្សាន្តថ្មីប្លែកតាមផ្លូវជាតិលេខ៧៣ ទៅកាន់ទីប្រជុំជនឆ្លូងស្ថិតនៅប្របទន្លេមេគង្គលើដែលមានសម្រស់មិនចាញ់ទីក្រុងបុរាណតាមដងទន្លេនៃប្រទេសជិតខាងនោះទេ។ លោកអ្នកអាចឈប់សម្រាកនៅសណ្ឋាគារ “លឺរីលីសដឺឆ្លូង” (Le Relais de Chhlong) អតីតភូមិគ្រឹះដ៏ស្កឹមស្កៃរបស់អ្នកជំនួញកាត់ចិនក្នុងតំបន់នោះបន្សល់ទុកតាំងពីឆ្នាំ១៩១៦។ បន្ទប់ Mekong View នៅជាន់ខាងលើអាចឲ្យភ្ញៀវគយគន់ទេសភាពផ្ទៃជលសាដ៏ធំមហិមាអមដោយដើមឈើទាលនិងគគីរដែលដុះតាមជួរមាត់ទន្លេ។ រីឯបន្ទប់ Garden View នឹងធ្វើឲ្យភ្ញៀវមានអារម្មណ៍ហាក់កំពុងសម្រាកក្នុងព្រះរាជដំណាក់កណ្តាលឧទ្យានធម្មជាតិ។ នៅទីនោះ ភ្ញៀវអាចជិះកាណូតលេងកម្សាន្តតាមដងទន្លេ ដើរលេងផ្សារក្រមួនរបស់អ្នកស្រុក និង ទស្សនាផ្ទះបុរាណ មត៌កនៃត្រកូលដង្ខៅឈើប្រចាំអតីតទីក្រុងកំពង់ផែឈើសម័យបារាំងនេះ។ សម្រាប់ឱកាសបុណ្យណូអែលនិងឆ្លងឆ្នាំ ភ្ញៀវអាចជប់លៀងជល់កែវបានយ៉ាងសប្បាយរីករាយ ដោយសារសណ្ឋាគារក៏មានបារដ៏ស្រស់ស្អាតមួយដែរសម្រាប់រង់ចាំបម្រើលោកអ្នក។ ជាចុងក្រោយ ភ្ញៀវទេសចរគួរឆៀងចូលភ្លក្សរសជាតិអាហារប្រចាំតំបន់ដ៏ពិសេសរបស់ខេត្តក្រចេះនៅភោជនីយដ្ឋានទន្លេ (Le Tonlé) ដែលស្ថិតនៅផ្លូវលេខ៣ ទីរួមខេត្ត។ ញាំក្រូចថ្លុង នំបញ្ចុកណែមទឹកត្រីផ្អែម និង ភេសជ្ជៈផ្សំពីបន្លែផ្លែឈើធម្មជាតិ ស្នាដៃសិស្សទេសចរណ៍ខេត្ត ជាចំណុចពិសេសនៃភោជនីយដ្ឋាននេះដែលលោកអ្នកមិនគួររំលងឡើយ៕
Article by SRIN SOKMEAN