ម៉ាកហ្វេហ្សិនអន្តរជាតិល្បីៗបរិច្ចាគទឹកប្រាក់ខ្ទង់លានដុល្លារដើម្បីប្រឆាំងវីរុសកូវីដ១៩
NEWS 4 years agoថ្វីដ្បិតស្ថិតក្នុងស្ថានការណ៍លំបាកនៃវីរុសកូវីដ១៩កំពុងរាតត្បាតជាសកលដែលធ្វើឲ្យវិស័យហ្វេហ្សិនធ្លាក់ចុះយ៉ាងណាក្តី ប៉ុន្តែជាមួយគ្នានេះម៉ាកហ្វេហ្សិនអន្តរជាតិល្បីៗលំដាប់ពិភពលោកបានកំពុងដើរតួជាផ្នែកមួយយ៉ាងសំខាន់ក្នុងការប្រយុទ្ធប្រឆាំងនឹងវីរុសកូវីដ១៩ ដោយផ្លាស់ប្តូរទាំងសង្វាក់ផលិតកម្មនិងប្រមែប្រមូលមូលនិធិនានាដើម្បីផ្តល់ជំនួយគាំទ្រទៅកាន់អង្គការសុខភាពពិភពលោក(WHO) មន្ទីរពេទ្យ មន្ទីរស្រាវជ្រាវ ព្រមទាំងអង្គការសុខភាពនានាទាំងក្នុងស្រុកនិងក្រៅស្រុកជាដើម។ ខាងក្រោមនេះជាស្លាកយីហោអន្តរជាតិល្បីៗនៅលើពិភពលោកដែលពួកគេបានកំពុងរួមដៃគ្នាដើម្បីជួយដល់ប្រទេសជាតិក៏ដូចជាពិភពលោកទាំងមូលក្នុងការកម្ចាត់វីរុសកូវីដ១៩ឲ្យចេញផុតពីភពផែនដី។
1. Hermès
Hermès ស្លាកយីហោដ៏ប្រណីតរបស់ប្រទេសបារាំងមួយនេះបានបរិច្ចាគទឹកប្រាក់ដល់ទៅជាង ២១លានដុល្លារទៅដល់មន្ទីរពេទ្យរដ្ឋនានានៅក្នុងទីក្រុងប៉ារីស ព្រមជាមួយម៉ាសចំនួន៣ម៉ឺន១ពាន់ និងជែលសម្អាតដៃប្រមាណ៣០តោនដែលផលិតផ្ទាល់នៅរោងចក្ររបស់ខ្លួន។
2. Ralph Lauren
ប្រ៊េនដ៏ល្បីល្បាញរបស់អាមេរិក Ralph Lauren បានបរិច្ចាគជាទឹកប្រាក់ដល់ទៅ១០លានដុល្លារឯណោះ។ ទឹកប្រាក់ជំនួយដ៏ច្រើនបំផុតនេះនឹងផ្តល់ជូនទៅកាន់អង្គការសុខភាពពិភពលោក(WHO)ដើម្បីឆ្លើយតបទៅនឹងមូលនិធិរួបរួមកម្ចាត់វីរុសកូវីដ១៩ផង មូលនិធិជំនួយគ្រាអាសន្នផង និងមូលនិធិPink Poy របស់ខ្លួនដែលគាំទ្រទៅលើគ្រឹះស្ថានប្រយុទ្ធប្រឆាំងជំងឺមហារីកផងដែរ។ ម៉ាក Ralph Lauren ក៏កំពុងចាប់ផ្តើមផលិតម៉ាសចំនួន២៥ម៉ឺន និងសម្លៀកបំពាក់វេជ្ជសាស្ត្រ២ម៉ឺន៥ពាន់ឈុតសម្រាប់គ្រូពេទ្យព្យាបាលអ្នកជំងឺ។ ថ្វីដ្បិតទឹកប្រាក់ផ្តល់ជំនួយមិនសមាមាត្រនឹងចំណូលរួមទាំងផ្គត់ផ្គង់អ្នកច្នៃម៉ូដរបស់ខ្លួននៅក្នុងកំឡុងវិបត្តិនេះក្តី ប៉ុន្តែតំណាងម៉ាក Ralph Lauren បានថ្លែងយ៉ាងខ្លីថា«យើងជឿជាក់ថាមិនថាអ្នកជានរណាមកពីណា ពួកយើងទាំងអស់គ្នានឹងផ្សារភ្ជាប់គ្នាជាប់ជានិច្ច ហើយទាំងនេះគឺជាហេតុផលដែលពួកយើងធ្វើសកម្មភាពដ៏សំខាន់ដើម្បីជួយដល់ក្រុមរបស់យើងក៏ដូចជាសហគមន៍របស់យើងនៅក្នុងគ្រាវិបត្តិនេះ»។
3. Louis Vuitton
ឆ្លើយតបទៅនឹងការសុំជំនួយពីរដ្ឋាភិបាលបារំាង ម៉ាកដ៏ប្រណីតល្បីលំដាប់ពិភពលោក Louis Vuitton នឹងប្រើប្រាស់ផលិតកម្មរបស់ខ្លួនមកជាផ្នែកមួយសំខាន់ក្នុងការប្រយុទ្ធប្រឆាំងនឹងវីរុសកូវីដ១៩។ ឃ្លាមួយយ៉ាងខ្លី «ម៉ាសឧបត្តម្ភរាប់រយរាប់ពាន់រាប់ម៉ឺន» ដែលម៉ាក Louis Vuitton បានបង្ហោះគឺដើម្បីបញ្ជាក់ថាខ្លួនបានបង្វែរសង្វាក់ផលិតកម្មរបស់ខ្លួននៅក្នុងសហរដ្ឋអាមេរិកមកចាប់ផ្តើមផលិតម៉ាសដើម្បីបរិច្ចាគទៅកាន់តំបន់ដែលរងឥទ្ធិពលខ្លាំងជាមួយវីរុសកូវីដ១៩។
4. Chanel
ខណៈដែលការងាររបស់និយោជិតទាំងអស់ត្រូវរាំងស្ទះដោយសារតែការរាតត្បាតវីរុសកូវីដ១៩ជាសកល ម៉ាកយីហោប្រណីតរបស់ប្រទេសបារាំង Chanel បានកំពុងសហការជាមួយនឹងអាជ្ញាធរដើម្បីផ្លាស់ប្តូរសង្វាក់ផលិតកម្មរបស់ខ្លួនមកផលិតជាម៉ាសការពារវិញផងដែរ។ «ថ្ងៃនេះពួកយើងនិងដៃគូបានកំពុងរួបរួមកម្លាំងគ្នាដើម្បីផលិតម៉ាសការពារ និងសម្លៀកបំពាក់គិលានុបដ្ឋាយិកា»។ នេះជាការលើកឡើងរបស់ Chanel។
5. Fendi
ស្លាកយីហោហ្វេហ្សិនរបស់ប្រទេសអ៊ីតាលី Fendi បានបរិច្ចាគជាទឹកប្រាក់ប្រមាណជាង២៧ម៉ឺនដុល្លារទៅកាន់អង្គការនានានៅក្នុងតំបន់ Lombardy ប្រទេសរបស់ខ្លួន និងកំពុងសហការជាមួយអ្នកផ្គត់ផ្គង់ជាច្រើនដើម្បីផ្តល់ម៉ាសវេជ្ជសាស្ត្រសន្ធឹកសន្ធាប់ទៅកាន់គ្រូពេទ្យជំនាញនៅក្នុងតំបន់ Tuscany។ ជាមួយគ្នានេះអ្នកស្នងម៉ាក Fendi អ្នកស្រី Carla Fendi បានបង្កើតកម្មវិធីមូលនិធិ និងប្រមូលមូលនិធិបានជាង១០ម៉ឺនដុល្លារសម្រាប់បរិច្ចាគគាំទ្រដល់អង្គភាពថែទាំនៅមន្ទីរពេទ្យ Presidio Sanitario Columbus ស្ថិតនៅក្នុងទីក្រុងរ៉ូម។
6. Coach
Coach ដែលជាម៉ាកហ្វេហ្សិនរបស់អាមេរិកបានរួមដៃគ្នាជាមួយអាជ្ញាធរទីក្រុងញូវយកនិងធនាគារ Goldman Sachs បរិច្ចាគជាទឹកប្រាក់២លានដុល្លារទៅកាន់អាជីវកម្មខ្នាតតូចនានានៅក្រុងទីក្រុងដើម្បីឲ្យអាជីវករបានបន្តនិរន្តភាពអាជីវកម្មរបស់ខ្លួន។
7. Bottega Veneta
ប្រ៊េនរបស់ប្រទេសអ៊ីតាលីនេះនឹងគាំទ្រទៅលើការស្រាវជ្រាវវិទ្យាសាស្ត្រសម្រាប់វីរុសកូវីដ១៩ ដោយផ្តល់អាហាររូបករណ៍រយៈពេលពីរឆ្នាំទៅកាន់តំបន់បីនៃទីក្រុងក្នុងប្រទេសរួមមាន តំបន់Veneto តំបន់ Lazio និង តំបន់Campania។ ទឹកប្រាក់ជាង ៣២ម៉ឺន៥ពាន់ដុល្លារនឹងជាមូលនិធិសម្រាប់ការស្រាវជ្រាវនៅសាកលវិទ្យាល័យ Padua និងវិទ្យាស្ថានជាតិស្រាវជ្រាវជំងឺឆ្លងនៅទីក្រុងរ៉ូម ព្រមទាំងមន្ទីរពិសោធន៍មីក្រូជីវសាស្ត្រនិងវីរុសនៅមន្ទីរពេទ្យ Domenico Cotugno ស្ថិតនៅក្នុងទីក្រុងNaples។
8. Gucci
ដើម្បីចូលរួមយុទ្ធនាការប្រឆាំងវីរុសកូវីដ១៩ស្លាកយីហោដ៏ល្បីរបស់ប្រទេសអ៊ីតាលីបានផ្តល់ជំនួយទៅកាន់នាយកដ្ឋានការពារជនស៊ីវិលអ៊ីតាលីនិងអង្គការសុខភាពពិភពលោក(WHO) ជាមួយម៉ាសវេជ្ជសាស្ត្រចំនួន ១លាន១០ម៉ឺនម៉ាស និង សម្លៀកបំពាក់ការពារវេជ្ជសាស្ត្រប្រមាណ៥៥ពាន់ឈុត។ សហគមន៍ម៉ាក Gucci ក៏បានអំពាវនាវដល់អ្នកគាំទ្រឲ្យនាំគ្នាចូលរួមផ្តល់ជំនួយក៏ដូចជាបរិច្ចាគទៅកាន់អង្គការសុខភាពពិភពលោកតាមរយៈការទំនាក់ទំនងទៅកាន់ភ្នាក់ងាររបស់ខ្លួននៅលើបណ្តាញសង្គមផងដែរ។
9. Kering
មានម៉ាកល្បីៗជាច្រើនដែលស្ថិតនៅក្រោមក្រុមហ៊ុននេះបានបរិច្ចាគជាទឹកប្រាក់ផងនិងផលិតកម្មផងដើម្បីប្រឆាំងនឹងវីរុសកូវីដ១៩។ តួយ៉ាង ដូចជាម៉ាក Gucci ដែលបានរៀបរាប់នៅខាងលើ ម៉ាក Saint Laurent និងម៉ាក Balenciaga នឹងរួមដៃគ្នាបង្កើតសង្វាក់ផលិតកម្មផលិតម៉ាសដោយខ្លួនឯងដែលនឹងចាប់ផ្តើមផលិតនៅពេលឆាប់ៗនេះខណៈកំពុងរង់ចាំការអនុម័តពីអាជ្ញាធរសុខភាព។ កិច្ចសហការនេះដែរក៏បានប្រមូលទឹកប្រាក់ចំនួន១លានដុល្លារបរិច្ចាគទៅកាន់មូលនិធិរបស់មជ្ឈមណ្ឌលគ្រប់គ្រងជំងឺនិងការពារសុខភាពCDC ព្រមទាំងផ្តល់ការផ្គត់ផ្គង់សំខាន់ៗ និងសម្ភារសំខាន់ៗទៅកាន់បុគ្គលិកថែទាំសុខភាពនៅទូទាំងសហរដ្ឋអាមេរិក។
10. Tory Burch
ប្រ៊េនហ្វេហ្សិនរបស់អាមេរិកមួយនេះផងដែរបានចាប់ដៃគ្នាជាមួយខាងផ្នែកឯកទេសសុខភាព 1199SEIU United Healthcare Workers East ដោយផ្តល់ជំនួយជាសម្ភារវេជ្ជសាស្ត្រមានតម្លៃស្មើនឹង៥លានដុល្លារ។ ក្នុងនោះមានដូចជា សម្លៀកបំពាក់ការពារវេជ្ជសាស្ត្រ ខ្សែក្រវាត់ និងស្បែកជើង សម្រាប់អ្នកជំនាញថែទាំសុខភាព ព្រមទាំងក្រណាត់ប្រវែង២៧០០ម៉ែត្រសម្រាប់កាត់ធ្វើម៉ាសនិងសម្លៀកបំពាក់ការពារវេជ្ជសាស្ត្រសម្រាប់សេវាសុខភាពកាតូលិកនៃកោះ Long Island។
11. Prada
បច្ចុប្បន្ន ម៉ាក Prada បានកំពុងផ្តល់ហិរញ្ញប្បទានដល់អង្គភាពថែទាំនៅមន្ទីរពេទ្យថ្មីបីកន្លែងនៅទីក្រុង Milan ប្រទេសអ៊ីតាលី។ ក្រុមហ៊ុនម៉ាកផលិតផលហ្វេហ្សិនដ៏ធំប្រចាំអ៊ីតាលីនេះក៏បានកំពុងដុតដៃដុតជើងផ្តោតលើការផលិតម៉ាសចំនួន១១ម៉ឺនម៉ាស និងសម្លៀកបំពាក់ការពារវេជ្ជសាស្ត្រចំនួន៨ម៉ឺនឈុតនៅរោងចក្រផ្ទាល់ខ្លួននៅឯទីក្រុងPerugiaដើម្បីផ្តល់ជូនទៅកាន់មន្ទីរពេទ្យទាំងប៉ុន្មាននៅតំបន់ Tuscan។
12. Michael Kors
ម៉ាកដ៏ប្រណីតរបស់ប្រទេសអាមេរិក Michael Kors បានផ្តល់ជំនួយទឹកប្រាក់ចំនួន១លានដុល្លារ រួមជាមួយទឹកប្រាក់បន្ថែម១លានដុល្លារទៀតពីអ្នកច្នៃម៉ូដប្រចាំម៉ាក ប្រគល់ជូនទៅកាន់អង្គការនានានៅក្នុងទីក្រុងញូវយកដើម្បីប្រយុទ្ធប្រឆាំងនឹងវីរុសកូវីដ១៩។
13. Versace
អ្នកច្នៃម៉ូដប្រចាំម៉ាក Versace អ្នកស្រី Donatella និងប្អូនស្រីរបស់ខ្លួន Allegra បានបរិច្ចាគទឹកប្រាក់ប្រមាណជាង២១ម៉ឺន៥ពាន់ដុល្លារទៅកាន់អង្គភាពICU នៅមន្ទីរពេទ្យ San Raffaele Hospital ទីក្រុង Milan ប្រទេសអ៊ីតាលី ហើយក្នុងនោះក៏មានទឹកប្រាក់៤០ម៉ឺនដុល្លារបន្ថែមពីក្រុមហ៊ុន Versace ផ្ទាល់ផងដែរ។ ម៉ាក Versace ក៏នឹងបរិច្ចាគទឹកប្រាក់ ១០ម៉ឺនដុល្លារទៅកាន់អង្គការ Camera Nazionale Della Moda Italiana ដើម្បីនាំយកកង្ហារ និងសម្ភារវេជ្ជសាស្ត្រទៅកាន់មន្ទីរពេទ្យនានានៅក្នុងប្រទេសអ៊ីតាលី។
14. Jimmy Choo
Jimmy Choo ដែលជាស្លាកយីហោគ្រឿងតាក់តែងកាយដ៏ល្បីរបស់ទីក្រុងឡុងដ៍បានផ្តល់ជំនួយជាទឹកប្រាក់ប្រមាណ៥០ម៉ឺនដុល្លារទៅកាន់អង្គការនានានៅក្នុងចក្រភពអង់គ្លេស។ ក្នុងនោះមានទឹកប្រាក់២ម៉ឺន៥ពាន់ដុល្លារនឹងផ្តល់ទៅកាន់សេវាសុខភាពជាតិប្រឆាំងវីរុសកូវរីដ១៩ និង២ម៉ឺន៥ពាន់ដុល្លារទៀតជូនទៅកាន់អង្គការសុខភាពពិភពលោក(WHO)។
15. Burberry
ម៉ាកហ្វេហ្សិនរបស់ប្រទេសអង់គ្លេស Burberry បានប្រកាសថា រោងចក្រនៅស្រុក Yorkshire របស់ខ្លួននឹងចាប់ផ្តើមផលិតម៉ាសនិងសម្លៀកបំពាក់ការពារវេជ្ជសាស្ត្រឲ្យទាន់តាមពេលកំណត់របស់ភ្នាក់ងារផ្នែកវេជ្ជសាស្ត្រនិងផលិតផលថែរក្សាសុខភាព។ សង្វាក់ផលិតកម្មនេះនឹងក្លាយជាការផលិតដ៏លឿនបំផុត និងបញ្ចូនឲ្យបានរហ័សបំផុតជាមួយម៉ាសប្រមាណច្រើនជាង១០ម៉ឺនម៉ាសសម្រាប់ចែកចាយនៅកាន់ផ្នែកសេវាសុខភាពជាតិក្នុងចក្រភពអង់គ្លេស។ ក្នុងនោះក៏រួមបញ្ចូលផ្តល់មូលនិធិសម្រាប់ការស្រាវជ្រាវរកវ៉ាក់សាំងចាត់ចែងដោយសាកលវិទ្យាល័យ Oxford ផងដែរ។ លើសពីនេះម៉ាក Burberry បានបរិច្ចាគទៅគម្រោង FareShare និងគម្រោង The Felix ដើម្បីផ្គត់ផ្គង់ស្បៀងអាហារនៅក្នុងចក្រភពអង់គ្លេសម្រាប់អ្នកដែលត្រូវការផងដែរ។
16. Prabal Gurung
អ្នកច្នៃម៉ូដនិងជាស្ថាបនិកម៉ាក Prabal Gurung នៃសហរដ្ឋអាមេរិកបានបរិច្ចាគជាម៉ាស N95 ចំនួន ២ពាន់ទៅកាន់មន្ទីរពេទ្យនៅទីក្រុងញូវយក ហើយក៏ដើរតួជាបុគ្គលិកផ្នែកវេជ្ជសាស្ត្រមួយដោយរួមដៃជាមួយអង្គភាពមូលនិធិកូវីដ១៩។ លោកបានលើកឡើងថា «ខ្ញុំពិតជារំភើបចិត្តណាស់ដែលបានរួមដៃជាមួយអង្គភាពមូលនិធិកូវីដ១៩ ដើម្បីនាំយកការគាំពារទៅកាន់វីរបុរសដែលធ្វើការដោយមិនខ្លាចនឿយហត់ដើម្បីជួយជីវិតមនុស្ស ហើយខ្ញុំពិតជាស្ងើចចំពោះសេចក្តីមោះមុត និងភាពមិនស្ទាក់ស្ទើររបស់ពួកគាត់នៅក្នុងគ្រាដ៏លំបាកនេះ។ សាមគ្គីភាពនិងក្តីសង្ឃឹមគឺជាឱសថដ៏សំខាន់សម្រាប់ព្យាបាលមនុស្សជាតិរបស់យើង»។
17. Armani
អ្នកច្នៃម៉ូដបង្កើតស្លាកយីហោនេះបានបរិច្ចាគជាទឹកប្រាក់ប្រមាណ១,៤លានដុល្លារទៅកាន់មន្ទីរពេទ្យនិងអង្គការសុខភាពនានានៅក្នុងប្រទេសអ៊ីតាលី។
18. Tiffany & Co.
មូលនិធិរបស់ក្រុមហ៊ុនផលិតគ្រឿងលម្អកាយយីហោ Tiffany & Co. បានបរិច្ចាគទឹកប្រាក់ចំនួន១លានដុល្លារដោយក្នុងនោះទឹកប្រាក់៧៥ម៉ឺនដុល្លារនឹងប្រគល់ជូនទៅអង្គការសុខភាពពិភពលោក (WHO) រីឯ២៥ម៉ឺនដុល្លារទៀតសម្រាប់ឆ្លើយតបទៅនឹងមូលនិធិសហគមន៍ញូវយកដែលប្រឆាំងវីរុសកូវីដ១៩។ ក្រុមហ៊ុនម៉ាកយីហោនេះក៏នឹងរៀបចំកម្មវិធីប្រមូលមូលនិធីសម្រាប់បុគ្គលិកដើម្បីឲ្យស៊ីមេទ្រីគ្នាទៅនឹងការផ្តល់មូលនិធិសម្រាប់អង្គការដើម្បីប្រយុទ្ធនឹងឥទ្ធិពលនៃវីរុសកូវីដ១៩ផងដែរ។
19. H&M
ប្រ៊េន H&M បានបរិច្ចាគទឹកប្រាក់ចំនួន៥០ម៉ឺនដុល្លារដើម្បីឆ្លើយតបទៅនឹងមូលនិធិសាមគ្គីភាពប្រឆាំងវីរុសកូវីដ១៩។ ក្រុមហ៊ុនក៏កំពុងរៀបចំសង្វាក់ផលិតកម្មដោយខ្លួនឯងផ្ទាល់ដើម្បីផលិតសម្ភារការពារយកទៅផ្គត់ផ្គង់នៅមន្ទីរពេទ្យនានាជុំវិញពិភពលោក ព្រមទាំងផ្តល់ជំនួយបន្ថែមដល់អង្គការនានាតាមរយៈការជួយផ្សព្វផ្សាយជាសារទៅលើការថែទាំងសុខភាពនិងសុវត្ថិភាព។ យ៉ាងណាមិញមួយរយៈមុនក្រុមហ៊ុនក៏បានបរិច្ចាគជាផលិតផលរបស់ខ្លួនប្រមាណ៧ម៉ឺនផលិតផលទៅកាន់អង្គការកុមារមួយចំនួននៅក្នុងសហរដ្ឋអាមេរិកផងដែរ។
20. Loewe
Loewe ដែលជាប្រ៊េនហ្វេហ្សិនរបស់ប្រទេសអេស្ប៉ាញបានចាប់ដៃជាមួយអង្គការ Plataforma de Infancia បរិច្ចាគទឹកប្រាក់ ៥៤ម៉ឺនដុល្លារ រួមទាំងទឹកប្រាក់៤៣ដុល្លារ(ក្នុងផលិតផលមួយ)ដែលលក់បានពីផលិតផលនីមួយៗពីខូឡិកហ្សិន Paula’s Ibiza ទៅអង្គការដែលធ្វើការការពារកុមារនៅក្នុងប្រទេសជាតិរបស់ខ្លួន។ លើសពីនេះ Loewe ក៏នឹងផ្តល់ជាម៉ាសវេជ្ជសាស្ត្រចំនួន១០ម៉ឺនទៅកាន់អង្គការកាកបាទក្រហមអេស្ប៉ាញផងដែរ៕
Article by HEM SOKKHIM