បន្ទាប់ពីបានធ្វើការដើរបង្ហាញម៉ូដហ្វេហ្សិននៃខូឡូកហ្សិន “Jungle Drapes the Temples” ដែលបានប្រារព្ធនៅសាកវិទ្យាល័យ Parsons School of Design ស្ថិតនៅទីក្រុងញ៉ូវយ៉ក សហរដ្ឋអាមេរិកជោគជ័យ អ្នកច្នៃម៉ូដ ស៊ឹង ឡៃស៊ីម បានបង្ហាញក្រុម សូវរីន ពីគម្រោងដ៏ទាក់ទាញរបស់ខ្លួនបន្ថែមទៀតដែលមានឈ្មោះថា CLO ដែលជាកម្មវិធីទូរសព្ទជំនាន់ថ្មីដែលបង្កើតឡើងសម្រាប់បង្កើតលំនាំម៉ូដសម្លៀកបំពាក់ហ្វេហ្សិនផងដែរ។ 

          CLO 3D គឺមានតួនាទីយ៉ាងសំខាន់ក្នុងការផ្សារភ្ជាប់រវាងគំនិតច្នៃប្រតិដ្ឋ និងការអភិវឌ្ឍផ្នែកបច្ចេកទេសសម្រាប់ការឌីហ្សាញម៉ូដផ្ទាល់តែម្តង។ តាមការលើកឡើងរបស់ ឡៃស៊ីមបានបញ្ជាក់ថា “បន្ទាប់ពីការគូរព្រាង (Sketching) ខ្ញុំប្រើ CLO 3D ដើម្បីបំប្លែងគំនិតទាំងនោះទៅជាសម្លៀកបំពាក់ជាក់ស្តែង ដែលបានធ្វើឱ្យខ្ញុំអាចសាកល្បងទៅលើសមាមាត្រនៃការដំឡើងម៉ូដ និងចលនារបស់សម្លៀកបំពាក់នីមួយៗ។ ម៉្យាងវិញទៀត CLO 3D បានជួយដល់ការគិតរបស់ខ្ញុំឲ្យកាន់តែមានច្បាស់លាស់អំពីការបង្កើតពុម្ភសម្លៀកបំពាក់ (Pattern-making) និងការវាស់ខ្នាតឱ្យត្រូវរាង (Fit) ស្របពេលដែលខ្ញុំកំពុងតែច្នៃម៉ូដបន្ថែមទៀតបានដោយសេរីភាពបន្ថែមទៀត។” លើសពីនេះទៅទៀត កម្មវិធី CLO 3D ក៏បាផ្តល់ភាពងាយស្រួលសម្រាប់អ្នកច្នៃម៉ូដរូបនេះឱ្យមើលឃើញនូវរូបរាងសម្លៀកបំពាក់ ជាក់ស្តែងតែម្តង (Real-time) ដែលបង្កើន ការរចនានៃម៉ូដនីមួយៗកាន់តែមានប្រសិទ្ធភាព និងចំគោលដៅខុសពីសព្វមួយដង។ យុវជនរូបនេះក៏បានលើកបញ្ជាក់ថា “ខ្ញុំអាចកែសម្រួលរូបរាងសម្លៀកបំពាក់ (Silhouettes) សាកល្បងជាមួយប្រភេទសាច់ក្រណាត់ និងកែសម្រួលព័ត៌មានលម្អិតបានយ៉ាងរហ័ស ដោយមិនចាំបាច់ខ្ជះខ្ជាយសម្ភារៈ និងចំណាយពេលវេលាក្នុងការធ្វើសាកល្បងពីប្រភេទសាច់ក្រណាត់នីមួយៗនោះឡើយ។ ដំណើរការទាំងអស់នេះដែរបានជួយឱ្យខ្ញុំរកឃើញពីបញ្ហានៃការរចនាបានឆាប់រហ័ស និងការសម្រេចនៃការអភិវឌ្ឍលទ្ធផលបានកាន់តែល្អឥតខ្ចោះសម្រាប់ការផលិតនៃសម្លៀកបំពាក់។