ជំនួបជាមួយនឹងវិចិត្រករ អ៊ីម ពិសី ម្ចាស់ស្នាដៃ “មេឡូឌីជីវិត”

          តាមរយៈការសន្ទនាជាមួយក្រុមការងាររបស់ សូវរីន វិចិត្រកររូបនេះបានបញ្ជាក់ថា បច្ចេកទេសនៃការគូរគំនូររបស់ខ្លួនគឺជាការរូមបញ្ចូលគ្នានូវពណ៌ស្រទន់ (Pastel tones) ហើយជារឿយៗ លោកតែងតែលាយបញ្ចូលប្រភេទពណ៌ដូចជា៖ ប្រភេទពណ៌ប្រេង ប្រភេទពណ៌អាគ្រីលីក (Acrylic) ឬប្រភេទពណ៌ទឹក (Watercolour) ដើម្បីបង្កើតបាននូវសាច់ពណ៌ (Texture)  ដែលផ្តល់អារម្មណ៍ទាំងភាពទន់ភ្លន់ និងភាពស៊ីជម្រៅ។ ក្នុងចំណោមគំនូររបស់លោកផ្ទាល់ ខូឡិកហ្សិនដែលមានឈ្មោះថា “ភាពរស់រវើកនៃទីក្រុង” (Urban Liveliness) គឺជាស្នាដៃសិល្បៈមួយដែលលោកស្រឡាញ់បំផុត។ លោកបានបញ្ជាក់ថា៖ ផ្ទាំងគំនូរនេះបង្ហាញពីចង្វាក់នៃជីវិតរស់នៅប្រចាំថ្ងៃក្នុងរាជធានីភ្នំពេញ ដោយផ្តោតសំខាន់ទៅលើផ្សារធំថ្មី ដែលជាសំណង់និមិត្តរូបដ៏ល្បីល្បាញបំផុតមួយរបស់កម្ពុជា។ វិចិត្រករនេះបង្ហាញថា “អ្វីដែលខ្ញុំចង់បង្ហាញ មិនមែនត្រឹមតែរចនាបថស្ថាបត្យកម្មនៃតួផ្សារនោះទេ ប៉ុន្តែគឺស្មារតីរបស់មនុស្សជាតិដែលបំពេញទីនោះឱ្យមានជីវិត៖ រាប់ចាប់តាំងពីអ្នកធាក់ស៊ីក្លូដែលកំពុងរង់ចាំម៉ូយ អ្នកលក់ដូរដែលកំពុងរៀបចំឆ័ត្រចម្រុះពណ៌របស់ពួកគេ និងមនុស្សម្នាដែលកំពុងធ្វើដំណើរយ៉ាងស្រទន់កាត់ពន្លឺព្រះអាទិត្យនាពេលព្រឹកព្រលឹម។” វិចិត្រកររូបនេះបញ្ជាក់ថា “សម្រាប់រូបខ្ញុំ ផ្ទាំងគំនូរនេះតំណាងឱ្យភាពធន់ និងថាមពលនៃជីវិតខ្មែរ  គឺជារូបភាពដែលបង្ហាញថាមនុស្សគ្រប់គ្នានៅតែបន្តធ្វើការ មានស្នាមញញឹម និងរស់នៅដោយក្ដីសង្ឃឹម ទោះបីជាត្រូវប្រឈមនឹងការលំបាកក្នុងជីវិតប្រចាំថ្ងៃយ៉ាងណាក៏ដោយ។ ការលាយបញ្ចូលគ្នានៃពណ៌ក្ដៅ និងពណ៌ត្រជាក់ ឆ្លុះបញ្ចាំងពីសុខដុមរមនា និងភាពចម្រុះនៅក្នុងទីក្រុង។ រាល់ពណ៌ និងចលនានៅក្នុងគំនូរនេះ រំលឹកខ្ញុំអំពីភាពស្រស់ស្អាតដែលយើងអាចស្វែងរកបាននៅក្នុងខណៈវេលាដ៏សាមញ្ញបំផុត។ជាក់ស្តែង ស្នាដៃនេះមានអត្ថន័យពិសេសជ្រាលជ្រៅក្នុងចិត្តរបស់ខ្ញុំ ព្រោះវាមិនត្រឹមតែជាការចងចាំអំពីភ្នំពេញប៉ុណ្ណោះទេ ប៉ុន្តែក៏ជាការឆ្លុះបញ្ចាំងពីរបៀបដែលខ្ញុំមើលឃើញប្រទេសកម្ពុជានាពេលបច្ចុប្បន្ន  គឺជានិទស្សន្តនៃភាពរស់រវើក រឹងមាំ និងពោរពេញដោយថាមពលជីវិតផងដែរ៕” 

Article by Sivly Pan (Emily Siv)