Sovrin
Sovrin
ជំនួបនឹងអ្នកច្នៃម៉ូដវ័យហ្វេហ្សិន និងជាម្ចាស់ស្លាកយីហោសម្លៀកបំពាក់ MOIS ឡេង មុយស៊ីម បញ្ចប់ការសិក្សាថ្នាក់បរិញ្ញាបត្រសិល្បៈ ផ្នែករចនាម៉ូដ និងការច្នៃប្រតិដ្ឋអាជីវកម្ម ពីសាកលវិទ្យាល័យ លីម កុកវីង។ បើតាមការលើកឡើងរបស់ស្ថាបនិករូបនេះបង្ហាញថា អត្ថន័យរបស់ MOIS គឺជាម៉ាកហ្វេហ្សិនមួយដែលប្រមូលផ្តុំនូវវប្បធម៌ខ្មែរអមដោយការស្រមើស្រមៃវេទមន្តដែលប្រៀបបានទៅនឹងការនិទានរឿងដ៏ស្រស់បំព្រងផងដែរ។
ម្ចាស់ជ័យលាភីរូបនេះបានលើកឡើងថា “ខ្ញុំបានតាមដានការប្រកួតប្រជែងវាយនភណ្ឌ និងសម្លៀកបំពាក់តាំងពីរដូវកាលទី ១ មកម្ល៉េះ។ ខ្ញុំតែងតែចង់ចូលរួម ប៉ុន្តែក្នុងអំឡុងពេលពីររដូវកាលដំបូង ខ្ញុំនៅរៀន និងមានបន្ទុកការងារច្រើនពីការប្រមូលផ្ដុំស្នាដៃបញ្ចប់ការសិក្សា និងគម្រោងផ្សេងៗទៀត។ រហូតមកដល់រដូវកាលទី ៣ បានមកដល់ក្នុងពេលដែលត្រឹមត្រូវបំផុត ខ្ញុំមានពេលវេលាគ្រប់គ្រាន់ បទពិសោធន៍ និងភាពជឿជាក់ក្នុងការបង្ហាញស្នាដៃរបស់ខ្ញុំតែម្តង។”
សម្រាប់ការប្រកួតក្នុងវគ្គពាក់កណ្ដាលផ្ដាច់ព្រ័ត្រ និងគំនិត “ខ្មែរតែមួយ” ឯនេះវិញការប្រកួតនេះបានដំណើរការប្រហែល ៤ ខែ ក្រោយមក មុយស៊ីម ត្រូវបានជ្រើសរើស និងបានឈានចូលដល់វគ្គពាក់កណ្ដាលផ្ដាច់ព្រ័ត្រ ដែលតម្រូវឲ្យមានការរចនាម៉ូដមួយឈុតក្រោមប្រធានបទ "សម្លៀកបំពាក់បែបអាជីវកម្មលក្ខណៈធម្មតា" (Business Casual Wear) ដោយប្រើក្រណាត់ និងក្រមាដែលបានផ្ដល់ឱ្យ។
នោះហើយជាពេលដែលអ្នកច្នៃម៉ូដរូបនេះមានគំនិតក្នុងការបង្កើត “ខ្មែរតែមួយ” ដែលបំផុសគំនិតដោយភាពក្លាហានរបស់ទាហានខ្មែរ និងស្មារតីរបស់ក្រមា។ ក្រោយមក វគ្គផ្ដាច់ព្រ័ត្រឈានមកដល់គឺជា៖ ការពង្រីកគំនិត “ខ្មែរតែមួយ”។ អ្នកច្នៃម៉ូដហ្វេហ្សិនវ័យក្មេងរូបនេះបានលើកឡើងថា “ក្នុងវគ្គផ្ដាច់ព្រ័ត្រ យើងត្រូវបង្កើតម៉ូដពីរឈុតក្រោមប្រធានបទ "សម្លៀកបំពាក់បែបអាជីវកម្មជំនាញ (Business Professional Wear) ដូច្នេះខ្ញុំបានពង្រីកគំនិតនេះទៅជា ខ្មែរតែមួយ។ ខ្ញុំបានស្រាវជ្រាវកាន់តែស៊ីជម្រៅទៅលើឯកសណ្ឋានយោធា និងការស្លៀកពាក់បែបសហគ្រិន ដើម្បីកសាងរឿងនិទានកាន់តែរឹងមាំ និងបង្ហាញពីលទ្ធភាពនៃការរចនាម៉ូដទាំងនោះ។” មុយស៊ីមបានបន្ត “ខ្ញុំក៏បានរៀបចំឯកសារបច្ចេកទេសពេញលេញ (Full Tech Packs) គំរូក្រណាត់ (Swatches) និងគ្រឿងតុបតែង (Trims) ដើម្បីបង្ហាញពីចក្ខុវិស័យពេញលេញមួយ។ គណៈកម្មការបានឆ្លើយតបយ៉ាងល្អ ហើយមតិយោបល់របស់ពួកគាត់គឺជាមតិវិជ្ជមានបំផុតដែលខ្ញុំធ្លាប់ទទួលបាន។”
សម្រាប់បទពិសោធន៍ក្នុងការចូលរួមនេះបានបង្ហាញ មុយស៊ីម ពីការអភិវឌ្ឍបច្ចេកទេស (Technical Development) និងរបៀបដែលភ្ជាប់វប្បធម៌ ទៅនឹងការរចនា។ វាក៏បានរំឭកយុវតីរូបនេះផងដែរថា បន្ទាប់ពីបញ្ចប់ការសិក្សា មានវិធីសាស្ត្រ និងស្ថានភាពជាច្រើនដែលត្រូវឆ្លងកាត់ ជាមួយនឹងឱកាសដ៏ត្រឹមត្រូវដែលមានលទ្ធភាពកាន់តែច្រើនអាចនឹងលេចឡើងផងដែរ៕
Article by SIVLY PAN (Emily Siv)
