Sovrin
Sovrin
ជាទូទៅសាច់អាំងត្រូវបានគេនិយមបរិភោគក៏ព្រោះតែវាមានរសជាតិឆ្ងាញ់គ្រាមក្រៅនិងទន់ក្នុងជាពិសេសគឺនៅពេលដែលគេមានកម្មវិធីជួបជុំណាមួយក៏គេមិនភ្លេចឡើយនូវសាច់អាំងបាប៊ីឃ្យូរនេះ។ ការបរិភោគសាច់អាំងក៏ជាវិធីសាស្រ្តមួយក្នុងការសម្រកទម្ងន់ផងដែរ ពីព្រោះជាតិខ្លាញ់នៅក្នុងសាច់មួយចំនួនត្រូវបានហូរតក់ចេញមកខាងក្រៅនៅពេលដែលត្រូវកម្តៅត្រឹមកម្រិតណាមួយ។ បើទោះបីជាយ៉ាងនេះក្តី ការសិក្សាជាច្រើនបានរកឃើញថាការបរិភោគសាច់អាំងច្រើនអាចនឹងប្រឈមមុខនឹងហានិភ័យខ្ពស់ក្នុងការកើតជម្ងឺមហារីក។ វេជ្ជបណ្ឌិតជាច្រើនបានប្រាប់ថា អ្នកចូលចិត្តទទួលទានអាហារដោយអាំងភ្លើងបាប៊ីឃ្យូ អាចនឹងមានគ្រោះកើតជំងឺមហារីក ប្រូស្តាត មាត់ ក្រពះ និងលំពែង។ នៅពេលដែលសាច់មួយបន្ទះត្រូវបានគេដាក់អាំង ជាតិខ្លាញ់ដែលហូរចេញពីសាច់នោះបានតក់លើរងើកភ្លើងបណ្តាលឲ្យមានភ្លើងឆេះឆុលឡើងជាមួយនឹងផ្សែងនិងកំទេចធូលីផេះល្អិតឆ្មាហោះមកប៉ះជាមួយនឹងសាច់ហើយសារធាតុទាំងអស់នេះហើយដែលជាភ្នាក់ងារយ៉ាងសកម្មនិងជាសារធាតុពុលក្នុងការបង្កើតជាជម្ងឺមហារីកនេះឡើង។ សារធាតុពុលដំបូងគេបង្អស់នោះ គឺ បេនហ្សូពៀរ៉ែន (Benzopyrene ) ដែលគេសង្កេតឃើញមាននៅក្នុងផ្សែងបង្ហុយចេញពីបំពង់ស៊ីម៉ាំងឡាន ឬផ្សែងបារីជាដើម។ ផ្សែងបំពុលនោះហើយដែលធ្វើឲ្យសាច់ខ្លោចប្រែទៅជាពណ៌ខ្មៅ ដែលយើងមិនបានចាប់អារម្មណ៍ឬខ្ចិលនឹងកាត់សាច់ដែលជាចំហេះខ្លោចនោះចេញពីសាច់។ យកល្អអ្នកគួរតែកាត់ឬច្រឹបសាច់ខ្លោចពណ៌ខ្មៅនៅខាងលើសាច់អាំងចេញមុននឹងបរិភោគ វាអាចនឹងជួយកាត់បន្ថយសារធាតុពុលបានមួយភាគតូចផងដែរ។ ដូច្នេះតើត្រូវធ្វើដូចម្តេចដើម្បីបរិភោគអាហារអាំងឲ្យមានសុវត្ថិភាពសុខភាព?
អ្នកជំនាញជាច្រើនបានណែនាំថា នៅពេលដែលអ្នកមានបំណងចង់ចម្អិនអាហារអាំងអ្នកគួរតែដាក់ចង្អើរអាំងពីរងើកភ្លើងយ៉ាងតិច ដប់សង់ទីម៉ែត្រ ព្រោះវាអាចកាត់បន្ថយសារធាតុពុលដែលចេញពីរងើកភ្លើងបានមួយភាគផងដែរ។ ប្រសិនបើអ្នកចង់ឲ្យមានសុវត្ថិភាពខ្ពស់ក្នុងការបរិភោគសាច់ល្អ អ្នកគួរតែចម្អិនយ៉ាងណាកុំឲ្យមានអណ្តាតភ្លើងឆាបឆេះឡើងខ្ពស់ពេក ឬត្រូវចម្អិនឲ្យមានផ្សែងតិចជាទីបំផុត។ ប្រសិនបើសាច់ត្រូវបានក្លេស្សេទុកឲ្យកក់ គួរតែយកសាច់នោះមកសំដិលចោលឲ្យបាត់ត្រជាក់ជាមុនសិនមុននឹងយកមកអាំង ព្រោះសាច់ដែលត្រជាក់ពេកអាចនឹងឆ្អិនមិនបានល្អនោះឡើយ។ នៅពេលដែលអាំង សូមកុំទម្លាប់ប្រើសីតុណ្ហភាពក្តៅខ្លាំងពេក ព្រោះភ្លើងកាន់តែក្តៅ វានឹងធ្វើឲ្យសាច់បញ្ចេញខ្លាំងកាន់តែខ្លាំង និងតក់លើរងើកភ្លើងកាន់តែលឿនដែលបណ្តាលឲ្យភ្លើងឆេះមិនព្រមឈប់ឡើយ ប៉ុន្តែយើងក៏មិនត្រូវប្រើទឹកដើម្បីពន្លត់ដែរ ព្រោះនៅពេលដែលយើងបាញ់ទឹកចូលទៅវាក៏អាចឲ្យមានផ្សែងហុយឡើងខ្លាំងផងដែរ។ សរុបមកវិញ ការបរិភោគសាច់ឬអាហារអាំងញឹកញាប់ពេក ពិតជាអាចប៉ះពាល់ដល់សុខភាពខ្លាំងដូចដែលបានរៀបរាប់ពីខាងលើរួចស្រាប់។ ដូចនេះប្រសិនបើអ្នកនិយមចូលចិត្តបរិភោគសាច់អាំង ជាពិសេសអាហារពេលព្រឹកដែលប្រជាជនខ្មែរយើងនិយមពិសារបាយស្រូប ក៏គួរតែកាត់បន្ថយផងដែរ។ តែប្រសិនបើត្រូវបរិភោគដោយខានពុំបានក៏គួរតែមានភាពឆ្លាតវៃក្នុងការចម្អិនដោយមិនត្រូវឲ្យផ្សែងប៉ះសាច់អាំងច្រើនខ្លាំងនោះដែរ៕
Article By KEOSONG
