Sovrin
Sovrin
“ពិសាខដើមឆ្នាំ ខ្មែរតែងចំណាំ ភ្ជួរស្រែចម្ការ...” ជាអត្ថន័យបទចម្រៀងដែលប្រាប់ ជាសញ្ញាដល់ជនានុជនក្មេងចាស់ប្រុសស្រីថាដើមរដូវវស្សាបានចូលមកដល់ជាវេលាមាស ដ៏មហាសាលសម្រាប់ប្រជាកសិករទូទាំងប្រទេស។ ក្នុងដើមវស្សានរដូវនេះដែរ សូវរីនក៏ពាំនាំនូវមាតិកាថ្មីៗប្រៀបដូចជាថ្នាលសាបព្រោះបណ្តុះចំណេះដឹងនិងចំណីអារម្មណ៍ថ្មីៗជូនមិត្តអ្នកអានទាំងឡាយ។ ជាសក្ខីភាព វត្តមានថ្មីបង្អស់នៃកូនខ្មែរដ៏ពូកែមួយរូបនៅក្នុង ដំណើរការផលិតភាពយន្តអន្តរជាតិនៃក្រុមហ៊ុនគំនូរជីវចលលំដាប់ថ្នាក់ពិភពលោក Walt Disney ប្រចាំសហរដ្ឋអាមេរិកត្រូវបានលាតត្រដាង ដែលមនុស្សភាគច្រើនមិនធ្លាប់នឹក ស្រមៃដល់ទាល់តែសោះ។ ទន្ទឹមនឹងនេះ ស្រ្តីកម្ពុជាមួយរូបទៀតដែលទើបតែទទួល បានពានរង្វាន់ជ័យលាភីលេខមួយផ្នែករចនាម៉ូដក្រចកលើឆាកអន្តរជាតិក៏នឹងស្ម័គ្រចិត្ត ចូលមកចែករំលែកបទពិសោធន៍ការងាររបស់ខ្លួននៅលើទំព័រទស្សនាវដ្តីសូវរីនលេខនេះ ផងដែរ។
ប៉ុន្តែយើងក៏មិនបំភ្លេចចោលនូវមត៌កពីសម័យដើមរបស់យើងនោះដែរ នោះគឺ អត្តសញ្ញាណស្ថាបត្យកម្មក្រុងភ្នំពេញសម័យអាណានិគមបារាំង និងស្ថាបត្យកម្មខ្មែរទំនើប សម័យក្រោយឯករាជ្យដែលសកលលោកស្ងើចសរសើរមិនដាច់ពីមាត់។ ទាំងនេះត្រូវបានគាស់កកាយឡើងវិញក្នុងទម្រង់ឌីជីថលដែលជាស្នាដៃរបស់ស្ថាបត្យករ ពុំ មាសបណ្តូល។ ទោះបីជាយ៉ាងណា រហូតមកដល់ពេលនេះ វិបត្តិកូវីដ១៩បាននិងកំពុងជះឥទ្ធិពលមកលើ ប្រជាជនកម្ពុជាគួរឲ្យកត់សម្គាល់។ ដូចនេះទស្សនាវដ្តីលេខនេះក៏មានកិត្តិយសដែលបាន ចុះផ្សាយពីលោកស្រី លឹម សូលីន នាយិកាអង្គការអុកស្វាម (Oxfam) ប្រចាំ ប្រទេសកម្ពុជា ស្តីពីប្រធានបទ “សមភាពនៃការចាក់វ៉ាក់សាំងកូវីដ១៩” ដែលប្រជាពលរដ្ឋកម្ពុជាគ្រប់រូប កំពុងទន្ទឹងរង់ចាំចង់ដឹងចង់ឮខានមិនបានដើម្បីបានវិលត្រឡប់ទៅកាន់ជីវភាពប្រក្រតី សុខដុមរមនាទាំងអស់គ្នាវិញ។ ទាក់ទងនឹងសុខភាព យើងបានចែករំលែកចំណេះដឹងអំពី វីតាមីនសេដែលមនុស្សម្នាជាច្រើនកំពុងតែផ្តោតនៅក្នុងអន្តរកាលនេះក៏ដួចជារូបមន្តភេសជ្ជៈផ្សំពីស៊ុតមាន់ធម្មជាតិដែលផ្តល់អត្ថប្រយោជន៍ជំនួយសុខភាពដែលលោកអ្នកពិតជាចង់ សាកល្បង៕
