Sovrin
Sovrin
ខេត្តព្រះសីហនុស្ថិតនៅទិសនិរតីនៃព្រះរាជាណាចក្រកម្ពុជា ខេត្តនេះស្ថិតនៅជាប់នឹងមាត់សមុទ្រវែងជាងគេនៅក្នុងចំណោមខេត្តទាំងបួន(កែប, កំពត, កោះកុង និងព្រះសីហនុ) ដោយខេត្តនេះមានឆ្នេរសមុទ្រប្រវែង ១៧៥គីឡូម៉ែត្រ ធៀបទៅនឹងឆ្នេរសមុទ្រកម្ពុជាសរុបប្រវែងជាង៤៣០គីឡូម៉ែត្រ។ មហាជនភាគច្រើនបានស្គាល់យល់ដឹងត្រឹមតែឆ្នេរប៉ុន្មានកន្លែង ដែលងាយទៅកម្សាន្តដោយសារមានឆ្នេរខ្សាច់សល្អ មានទឹកខៀវស្រងាត់ងាយស្រួលចុះងូតកម្សាន្ត សម្បូរអ្នកលក់ម្ហូបអាហារហូបចុក និងស្ថិតនៅក្នុងក្រុងព្រះសីហនុតែម្តង ដូចជា ឆ្នេរអូរឈើទាល ឆ្នេរសុខា ឆ្នេរហាវ៉ៃ ឆ្នេរឯករាជ្យ ឬ ឆ្នេរអូតែល ៧ជាន់ និង ឆ្នេរអូរត្រេះ ជាដើម។ តាមពិតទៅ ខេត្តឯនាយសមុទ្រនេះលាក់កំបាំងនូវឆ្នេរល្អៗដ៏ស្រស់ត្រកាលពីធម្មជាតិដទៃទៀត រួមមានជាអាទិ៍ ឆ្នេរថ្មធំ, ឆ្នេរព្រែកត្រែង, ឆ្នេរព្រែកចាក និងមានឆ្នេរមួយចំនួនទៀតនៅតាមកោះជាច្រើនទៀតដែលមិនសូវមានអ្នកពីចម្ងាយទៅលេងប៉ុន្មាននោះឡើយ។
ការស្ថាបនាផ្លូវបេតុងសម្រាប់ខេត្តព្រះសីហនុឆភ្ជាប់ទៅកាន់តំបន់រាមក្នុងស្រុកព្រៃនប់កំពុងក្លាយជាការចាប់អារម្មណ៍ពីមហាជនជិតឆ្ងាយចង់បើកឆ្លងកាត់ ព្រោះតែតាមផ្លូវមួយចំនួនសង្ខាងផ្លូវមានលក្ខណៈបែបធម្មជាតិស្រស់បំព្រង រួមជា មួយនឹងទិសដៅស្របតាមឆ្នេរសមុទ្រដ៏ស្រស់ស្អាតថែមទៀត។ក្រៅពីឆ្លងកាត់គយគន់ធម្មជាតិតំបន់ឆ្នេរវែងអន្លាយ នៅមានចំណុចដែលចាប់អារម្មណ៍ខ្លាំងបំផុតពីសំណាក់មហាជន នោះគឺដើមឈើព្រៃមួយដើមដែលអជ្ញាធរបានរក្សាទុកធ្វើជារង្វង់មូលនៅកណ្តាលទ្រូងផ្លូវស្ថាបនាថ្មីជិតចុងឆ្នេរអូរត្រេះ ដែលកំពុងតែទាក់ទាញ ជាពិសេសនោះគឺការចាប់អារម្មណ៍ខ្លាំងពីមហាជនក្នុងបណ្តាញក្នុងសង្គមហ្វេសប៊ុក ដែលត្រូវបានរដ្ឋាភិបាលប្រកាសដាក់ឈ្មោះថា «ដើមឈើចាំស្នេហ៍» ។ ផ្លូវមួយខ្សែដែលមានដើមឈើនេះមានឈ្មោះថា “វិថីជំទាវម៉ៅ” គឺជាផ្លូវមួយក្នុងចំណោមផ្លូវក្រុងចំនួន ៣៤ ខ្សែនៅខេត្តព្រះសីហនុ ប្រវែងសរុប ៨២,១៤៥ គីឡូម៉ែត្រដែលត្រូវបានស្ថាបនាឡើងថ្មីចុងក្រោយគេ ហើយក៏កំពុងក្លាយជាចំណុចទាក់ទាញទេសចរប្រុសស្រីជាតិនិងអន្តរជាតិដែលឆ្លងកាត់ខេត្តព្រះសីហនុផងដែរ។
“ដើមឈើចាំស្នេហ៍” ជាប្រភេទដើមជ្រៃត្រាងមានកម្ពស់ ១៥ ម៉ែត្រដែលមានអាយុកាលយូរឆ្នាំមកហើយ ហើយសិលាចាំស្នេហ៍ជាផ្ទាំងថ្មធម្មជាតិដ៏ធំថែមទៀតផង។ មូលហេតុដែលមិនសម្រេចកាប់ដើមឈើ និង ទម្លុះផ្ទាំងថ្មដែលស្ថិតនៅពាក់កណ្តាលផ្លូវនេះក៏ដោយសារចង់រក្សាទុករបស់ដែលមានពីធម្មជាតិ ដើម្បីជាគ្រឿងលម្អសម្រាប់ទាក់ទាញដល់ភ្ញៀវទេសចរឲ្យទៅកម្សាន្តលេងនៅក្នុងខេត្តព្រះសីហនុ។ ជារៀងរាល់ថ្ងៃ តែងតែមានប្រជាពលរដ្ឋជិតឆ្ងាយជិះមកដល់កន្លែងនេះ ហើយពួកគាត់តែងតែឈប់ដើម្បីថតរូបជាមួយនឹងដើមឈើ ដើម្បីជាអនុស្សាវរីយ៍គ្រាន់នឹងបង្អួតបងប្អូនសាច់ញាតិឲ្យពួកគេមានអារម្មណ៍ចង់មកទីនេះដែរ។ ដើមឈើនេះត្រូវបានគេចាត់ទុកជានិមិត្តរូបសំខាន់មួយនៃតំបន់ឆ្នេរជំទាវម៉ៅ។
គោលដៅសំខាន់របស់ក្រុមការងារសម្រាប់ដំណើរកម្សាន្តលើកនេះគឺភូមិសាស្រ្តខណ្ឌព្រៃនប់។ ដូចនេះ យើងមិនអាចរំលងចោលនូវតំបន់ឧទ្យានជាតិរាមដែលជាសក្តានុពលទេសចរណ៍ធំបំផុតប្រចាំតំបន់នេះឡើយ។ ប៉ុន្តែយើងព្យាយាមរុករកតំបន់កម្សាន្តផ្សេងទៀតដែលយើងមិនធ្លាប់ទៅដល់ក្រៅពីឆ្នេរសមុទ្ររាម កោះរាជបុត្រ ឬកោះសំពោច និង ឆ្នេរមាសឆ្នេរប្រាក់ ដែលអ្នកទេសចរភាគច្រើនបានស្គាល់រួចមកហើយ។ នៅតំបន់នេះ យើងបានធ្វើដំណើរផ្សងព្រេងទៅកាន់រមណីយដ្ឋានភ្នំធម្មជាតិក្បែរឆ្នេរសមុទ្រមួយកន្លែងនោះគឺ ភ្នំព្រែកត្របែក ដែលសព្វថ្ងៃអ្នកវិនិយោគជនជាតិចិនបានប្រែក្លាយឈ្មោះទៅជា “ភ្នំលិង្គ” ដើម្បីឲ្យកាន់តែទាក់ទាញចំណាប់អារម្មណ៍របស់អ្នកទេសចរពីគ្រប់ទិសទី ដោយសារតែនៅលើភ្នំនេះ មានថ្មដុះធម្មជាតិបីផ្ទាំងធំៗដែលមានសណ្ឋានខ្ពស់ត្រដែតស្ថិតនៅទន្ទឹមគ្នាដូចគេតម្រៀបបញ្ឈរប្រៀបបានទៅនឹងចម្លាក់លិង្គព្រះឥសូរដែលធម្មជាតិប្រទានជានិមិត្តរូបប្រចាំតំបន់ដ៏មហស្ចារ្យកម្រមាននៅកន្លែងណាផ្សេងទៀត។
យើងត្រូវធ្វើដំណើរពត់ពែនបត់បែនតាមកាំជណ្តើរឈើក្នុងរយៈកម្ពស់ប្រមាណ៥០-៦០ម៉ែត្រដែលត្រូវបានសង់កាត់តាមជម្រាលផ្ទាំងថ្មធំៗនិងព្រៃព្រឹក្សាខៀវស្រងាត់ស្ងប់ស្ងាត់គ្មានការរំខានពីមនុស្សជំនួសដោយសំឡេងបក្សាបក្សី ។ លើសពីនេះ នៅពេលយើងបានទៅដល់កំពូលភ្នំនេះ យើងអាចឈរអែបនឹងបង្កាន់ដៃឈើសម្លឹងគយគន់ឃើញផ្ទៃសមុទ្រលាតសន្ធឹងដាច់កន្ទុយភ្នែក មានកោះតូចធំកណ្តាលផ្ទៃសមុទ្រ ព្រមទាំងទូកនេសាទបែប្រពៃណីរបស់ប្រជាពលរដ្ឋដែលរស់នៅតំបន់ជិតខាងនោះបណ្តែតខ្លួនកាត់តាមផ្ទៃទឹកដ៏ធំល្វឹងល្វើយជ្រែកទឹករលកគ្រាំៗ សត្វរំពេរសមុទ្រហិចហើរសំកាំងរកចំណីកៀងគូរកៀកកើយ បង្កើតបានជាផ្ទាំងទស្សនីយភាពយ៉ាងរស់រវើក។
បន្ទាប់ពីសម្រេចគោលដៅទាំងនេះហើយ យើងបានបន្តដំណើរឆ្ពោះទៅកាន់តំបន់រមណីយដ្ឋានថ្មីចំនួនពីរទៀតស្ថិតនៅចន្លោះតំបន់អភិវឌ្ឍន៍កែវផុសនិងវាលរេញ គឺ រមណីយដ្ឋានទឹកធ្លាក់ព្រៃនប់ និង រមណីយដ្ឋានធម្មជាតិ-កែច្នៃបន្ទាយទ័ព។ ទឹកធ្លាក់ព្រៃនប់ មានទីតាំងស្ថិតនៅភូមិបត់សិរ មាន់ ឃុំព្រៃនប់ ស្រុកព្រៃនប់ ខេត្តព្រះសីហនុ និងមានចម្ងាយប្រមាណ៤០គីឡូម៉ែត្រពីទីរួមខេត្តព្រះសីហនុ។ បើយើងធ្វើដំណើរតាមផ្លូវជាតិលេខ៤ មកដល់ទីតាំងចំការឧកញ៉ា លូ គឹមឈុន តាមផ្ផូវក្រាលគ្រោះក្រហមមួយខ្សែប្រហែលជា៣គ.ម ដោយចំណាយរយៈពេលត្រឹមតែ១៥នាទី យើងនឹងទៅដល់រមយណីដ្ឋានកែច្នៃទឹកធ្លាក់ព្រៃនប់ជាក់ជាមិនខាន។ វាមានទីតាំងជាប់នឹងជើងភ្នំដែលមានខ្សែទឹកហូរចុះពីលើភ្នំគូរឲ្យចង់គយគន់។ នៅទីនោះភ្ញៀវអាចងូតទឹកលេង ដើរកម្សាន្តគយគន់ទេសភាពក្នុងតំបន់ព្រៃភ្នំជិតៗនោះ និងទទួលទានអាហារលក្ខណៈពិកនិកជួបជុំក្រុមគ្រួសារឬមិត្តភក្តិ។ សម្រាប់កន្លែងអង្គុយវិញ រមណីយដ្ឋានទឹកធ្លាក់ព្រៃនប់មានក្យុសអង្គុយលេងជាច្រើនសម្រាប់ភ្ញៀវទេសចរ ហើយក៏មានចំណតយានយន្តធំទូលាយអំណោយផលល្អសម្រាប់ការចតរថយន្តតូចធំគ្រប់ប្រភេទ។
ទន្ទឹមនឹងរមណីយដ្ឋានទឹកធ្លាក់ខាងលើ មិនឆ្ងាយប៉ុន្មានពីទីនោះ មានរមណីយដ្ឋានដែលទើបនឹងផ្ទុះល្បីចុងក្រោយគេបង្អស់ក្នុងទឹកដីខេត្តព្រះសីហនុ ដែលជារមណីយដ្ឋានឯកជនស្ថិតនៅភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្ដព្រះសីហនុ ដែលបានយកឈ្មោះតាមលំនាំប្រាសាទបុរាណខ្មែរមួយនៅខេត្តបន្ទាយមានជ័យ គឺប្រាសាទបន្ទាយទ័ព។ លក្ខណៈពិសេសបំផុតនៃទីតាំងនេះគឺរមណីយដ្ឋានកែច្នៃថ្មីនេះបង្កើតឡើងដោយក្រុមហ៊ុនឯកជនរចនាឡើងដោយមានរូបចម្លាក់ថ្មីច្រើនប្រភេទដែលឆ្លាក់ចេញពីផ្ទាំងថ្មនៅនឹងកន្លែងខ្លះ និងនាំយកមកពីខាងក្រៅខ្លះបង្កើតបានជាទស្សនីយភាពបែបធម្មជាតិនិងសិល្បៈទាក់ទាញការចាប់អារម្មណ៍ច្រើនពីមហាជនដោយសារតែការរៀបចំរចនាមើលទៅស្រដៀងទៅនឹងទីតាំងប្រាសាទបុរាណបង្កប់ក្នុងល្អាងជ្រោះភ្នំ។ប៉ុន្តែគួរកត់ចំណាំថា រមណីយដ្ឋាននេះពុំមានសំណង់ប្រាសាទដែលជាបុរាណដ្ឋានប្រវត្តិសាស្ត្រជាតិនោះឡើយ អ្វីៗសុទ្ធតែជាការច្នៃបង្កើតថ្មីទាំងអស់។ ក្រោយពីបានអានព័ត៌មានអំពីគោលដៅទេសចរណ៍ថ្មីៗដែលកំពុងរះឡើងក្នុងទឹកដីព្រៃនប់នេះហើយ តើលោកអ្នកពេញចិត្តនិងប្រាថ្នាចង់ទៅទស្សនារមណីយដ្ឋានណាមួយក្នុងចំណោមនោះជាងគេ?
Article by SRIN SOKMEAN
