កាលពីល្ងាចថ្ងៃទី១០ ខែមករា កន្លងទៅស្ថិតនៅក្នុងវិចិត្រសាលសិល្បៈត្រជាក់ភ្នែកបានប្រារព្ធកម្មវិធីសម្ពោធការដាក់តាំងពិព័រណ៍គំនូរផ្លូវការចំនួន ២៤ ផ្ទាំងដែលជាស្នាដៃរបស់សិល្បករ លោក ប៉ែន រ៉ូប៊ីត។ ផ្ទាំងគំនូរចំនួន ២៤ ផ្ទាំងដែលមានឈ្មោះថា «សេរីភាពនៃថ្ងៃស្អែក» គឺជាការឆ្លុះបង្ហាញពីការធ្វើដំណើរនៃការគូរគំនូរដោយបែងចែកជាពីរទម្រង់ដូចជា៖ ផ្ទាំងគំនូរដែលមានរចនាបថ និងបែបផែនជាគំនូរអជីវចលដូច្នេះផងដែរ។ យ៉ាងណាមិញ ចំពោះស្នាដៃរបស់សិល្បករ លោក ប៉ែន រ៉ូប៊ីត គឺសុទ្ធសឹងតែជាការបង្កើតឡើងដោយការស្រមើស្រមៃគ្មានទីបញ្ចប់ឆ្លុះបង្ហាញពីតថភាពជាក់ស្តែងមួយចំនួន ជាពិសេស ការផ្តោតលើជីវភាពរស់នៅប្រចាំថ្ងៃ ក៏ដូចជាការបង្ហាញពីសេចក្តីឈឺចាប់ដែលតែងតែកើតឡើងលើស្ត្រីរូប។
គួរបញ្ជាក់ផងដែរថា ការតាំងពិព័រណ៍ផ្ទាំងគំនូរស្ថិតនៅក្នុងវិចិត្រសាលសិល្បៈត្រជាក់ភ្នែកបើកឲ្យមហាជនចូលរួមទស្សនាដោយសេរីរយៈពេលមួយខែចាប់ពីថ្ងៃទី១០ ខែមករា រហូតដល់ថ្ងៃទី១០ ខែកុម្ភៈ ជារៀងរាល់ថ្ងៃអង្គារ ដល់ថ្ងៃសៅរ៍ ចាប់ផ្តើមពីម៉ោង ១០ព្រឹក រហូតដល់ម៉ោង ៧ ល្ងាចផងដែរ៕
Article by PAN SIVLY