កំពុងនឹកសំឡេងទឹករលកប្រដេញមាត់ឆ្នេរមែនទេ? ចង់ស្រូបខ្យល់អាកាសបរិសុទ្ធពីធម្មជាតិ តែមិនមានពេលទៅឆ្ងាយមែនទេ? ចង់អង្គុយលេងញ៉ាំមាន់ដុតក្នុងក្យូសប្រក់ស្បូវប្របមាត់ទឹកបែបកោះដាច់ តែខ្ជិលឆ្លងសាឡាងទៅមកយូរមែនទេ? សូវរីនកំពុងស្វែងរកទីតាំងតម្រូវចិត្តមិត្តយុវវ័យដែលមានតម្រូវការផ្នែកទេសចរណ៍កម្សាន្ត ហើយចង់ចំណេញទាំងពេលវេលា ថវិកា និងងាយស្រួលធ្វើដំណើរទៅដល់បានហើយ!
ស្ថិតនៅលាក់ខ្លួនក្រោយដីអ្នកភូមិ កំបាំងពីភ្នែកអ្នកដំណើរឆ្លងកាត់ផ្លូវជាតិលេខ៦អា រមណីយដ្ឋានធម្មជាតិមួយកន្លែងទើបបើកដំណើរការថ្មី «ឆ្នេរប្ញស្សីជ្រោយ» ក្នុងភូមិជ្រោយមេត្រីក្រោម ឃុំប្ញស្សីជ្រោយ ស្រុកមុខកំពូល ខេត្តកណ្តាលដែលមានចម្ងាយត្រឹមតែប្រមាណ២គីឡូម៉ែត្រប៉ុណ្ណោះខាងជើងគល់ស្ពានព្រែកតាមាក់ត្រើយខាងលិច។អ្នកទេសចរទាំងឡាយត្រូវជិះហួសគល់ស្ពានព្រែកតាមាក់ទៅមុខត្រង់ (មិនឆ្លងស្ពាន)ហើយងាកមើលខាងស្តាំដៃមានស្លាកសញ្ញាផ្សាយពាណិជ្ជកម្មជាប់ផ្លូវលំបេតុងបត់ចូលភូមិ។ ជិះចូលតាមផ្លូវនោះរហូតទៅដល់ផ្លូវលំជាប់មាត់ទន្លេ ទើបបត់ស្តាំបន្តិចដល់ឃើញច្រកចូល(គ្មានស្លាកសម្គាល់)ដែលជាផ្លូវដីតូចមួយនៅខាងស្តាំដៃឆ្ពោះតម្រង់ទៅឆ្នេរទន្លេតែម្តង។
កាលដើមឡើយ តំបន់ឆ្នេរប្ញស្សីជ្រោយនេះគ្រាន់តែជាកន្លែងងូតទឹកនិងនេសាទរបស់អ្នកភូមិនេះតែប៉ុណ្ណោះ មិនមែនជាគោលដៅរមណីយដ្ឋានទេសចរណ៍ឡើយ។ លុះមកដល់រយៈពេលពីរឆ្នាំមុន ទើបអ្នកស្រុកចាប់ផ្តើមនាំគ្នារៀបចំសាងសង់ក្យូសមាត់ទឹកទាក់ទាញទេសចរជិតឆ្ងាយឲ្យចូលមកកម្សាន្តអង្គុយលេងនិងទទួលទានអាហារបែបខ្មែរនៅថ្ងៃចុងសប្តាហ៍ឬថ្ងៃឈប់សម្រាកបុណ្យទាននានា។ បើនិយាយជារួមមក ទិដ្ឋភាពនៅរមណីយដ្ឋានឆ្នេរប្ញស្សីជ្រោយមានលក្ខណៈមិនខុសប៉ុន្មានពីបរិយាកាសនៅរមណីយដ្ឋានឆ្នេរកោះដាច់ឡើយ គ្រាន់តែឆ្នេរទើបល្បីក្រោយនេះមានចំនួនក្យូសតិចជាងនៅឆ្នេរកោះដាច់ (ខ្ទង់ជាង២០ក្យូស) ប៉ុន្តែមើលទៅរាងស្រឡះភ្នែកជាងឆ្នេរកោះដាច់ដែលមានអ្នកលក់-អ្នកទិញអ៊ូអរច្រើន។
សកម្មភាពទេសចរណ៍ដែលភ្ញៀវទាំងឡាយអាចកម្សាន្តសប្បាយនៅទីនោះបានមានជាអាទិ៍ អង្គុយសម្រាកលេងនៅក្នុងក្យូសមាត់ទន្លេ ទទួលទានអាហារជនបទស្រស់ៗថ្វីដៃចម្អិនរបស់អ្នកស្រុក (ត្រីទន្លេ មាន់ស្រែ ខ្ចៅ កង្កែប…) ដើរកម្សាន្តលើឆ្នេរខ្សាច់ ទស្សនាទូកនេសាទរបស់អ្នកភូមិ ទស្សនាសកម្មភាពរាវលៀស-ខ្ចៅទន្លេធម្មជាតិរបស់អ្នកស្រុក និង គយគន់ថ្ងៃរៀបលិចដ៏ស្រស់ត្រកាលលើផ្ទៃទន្លេមេគង្គមើលឃើញដល់ទេសភាពភូមិព្រះប្រសប់នៃស្រុកខ្សាច់កណ្តាល ដែលស្ថិតនៅត្រើយម្ខាងទល់មុខនោះ៕
Article by SRIN SOKMEAN