×

«​L​e​ ​V​in​ ​P​h​no​m​ ​P​e​n​h​»​ ​កន្លែង​ជួបជុំ​ និង​​គយគន់​ទេសភាព​សួនច្បារ​វិមានឯករាជ្យ

TRAVEL & LIVING 2 months ago
 
 

            ​តំបន់​វិមានឯករាជ្យ​ជាទី​ដើរ​លម្ហែ​កាយ​សម្រាប់​ភ្ញៀវ​ទេសចរ​ជាតិ​និង​អន្តរជាតិ​ទាំងឡាយ​ចាប់តាំង​ពីសម័យ​សង្គម​រា​ស្រ្ត​និយម​បន្ត​រហូតមកដល់​ពេល​បច្ចុប្បន្ន​។​ ​តំបន់​នេះ​កៀក​មាត់ទន្លេ​ហើយ​មិនសូវ​មាន​សំណង់​អគារ​ខ្ពស់​ៗ​បិទបាំង​ដូច​តំបន់​ជុំវិញ​ឡើយ​ ​ដែល​ជា​លក្ខណៈ​អំណោយផល​ល្អ​សម្រាប់​ការ​គយគន់​ ​ទេសភាព​នា​ពេល​សន្ធិប្រកាស​និង​ពេល​រាត្រី​ដ៏​សែន​មនោ​រម្យ​។​ ​ស្ថិតនៅ​តាម​បណ្តោយ​មហាវិថី​ព្រះ​សី​ហ​នុ ​ចម្ងាយ​ប្រមាណ​ត្រឹមតែ​២​០​០​ម៉ែត្រ​ពី​វិមានឯករាជ្យ​ដ៏​ល្បីល្បាញ​ជា​ប្រវត្តិ​សា​ស្រ្ត ​បារ​ស្រា​បារាំង​មួយ​កន្លែង​ឈ្មោះថា​ ​«​L​e​ ​V​in​ ​P​h​no​m​ ​P​e​n​h​»​ (ឡឺ​វា​ង់ ​ភ្នំពេញ​) ​បាន​បណ្តែត​ខ្លួន​នៅ​លើ​អគារ​ផ្ទះ​ជាន់​ទីមួយ​ ​នៅ​ចំ​ពីលើ​អតីត​អគារ​ ចា​វ៉ា​កាហ្វេ​ ​និង​ហ្គាឡឺ​រី​ ​ដែល​ជា​ទីតាំង​ងាយស្រួល​រក​ជាទីបំផុត​សម្រាប់​ទេសចរ​គ្រប់រូប​។​

            ​​L​e​ ​V​in​ ​P​h​no​m​ ​P​e​n​h​ ​ជា​បារ​បែប​បស្ចិមប្រទេស​ដ៏​ស៊ីវិល័យ​ថ្មីសន្លាង​បំផុត​ប្រចាំ​ក្រុងភ្នំពេញ​ដែល​ទើប​បើក​សាកល្បង​កាលពីដើម​ខែ​មេសា​កន្លងទៅ​ថ្មីៗ​នេះ​។​ ​ទោះបីជា​ទើប​តែ​បើក​ថ្មី​ក៏ដោយ​ ​ក៏​បារ​នេះ​នៅតែ​មាន​ប្រជាប្រិយភាព​ទាក់ទាញ​ភ្ញៀវ​ទាំង​ខ្មែរ​និង​បរទេស​យ៉ាង​ច្រើន​កុះករ​មិនសូវ​ដាច់​ជា​រៀងរាល់ថ្ងៃ​ ​ដោយសារតែ​ទីនេះ​មាន​រានហាល​សម​ល្មម​ដែល​អាចឲ្យ​ភ្ញៀវ​អង្គុយ​បណ្តែតអារម្មណ៍​គយគន់​ទេសភាព​ដ៏​ស្រស់​ស្អាត​នៃ​តំបន់​សួនច្បារ​វិមានឯករាជ្យ​ពោរពេញ​ដោយ​ភាព​បៃតង​ ​និង​ហ្វូង​មនុស្សម្នា​ដើរចុះ​ឡើង​ទៅ​ ​ក៏ដូចជា​យានយន្ត​គ្រប់​ប្រភេទ​បើកបរ​វិញ​ទៅមក​លើ​ដង​វិថី​ ​បង្ហាញ​ពី​បែប​ទ​រស់នៅ​នៃ​ប្រជាជន​ក្រុងភ្នំពេញ​ដ៏​រស់រវើក​។​ ​ស្ថិត​ក្នុង​រចនាបថ​អគារ​សម័យ​ទ​.​វ​.​ឆ្នាំ​១​៩​៦​០​បារ​នេះ​សម្បូរ​ដោយ​រន្ធ​ខ្យល់​ដែល​ធ្វើឲ្យ​មាន​បរិយាកាស​និង​ពន្លឺ​ភ្លឺស្រឡះ​ពី​ធម្មជាតិ​ ​សមនឹង​កម្រាលឥដ្ឋ​ការ៉ូ​ពី​ជំនាន់ដើម​ ​បង្កើត​បានជា​សោភ័ណ​ភាព​ស្ថាបត្យកម្ម​ដែល​ ​នរណា​ៗ​ក៏​ស្រមៃ​ចង់​ផ្តិត​យក​រូបភាព​និង​គន់មើល​មិន​ចេះ​ជិនណាយ​។​ ​នៅ​ផ្នែក​ខាងក្រៅ​នេះ​ ​ភ្ញៀវ​អាច​អង្គុយ​បាន​ ​៥​ ​តុ​ ​ឬ​ ​អង្គុយ​នៅ​កៅអី​ខ្ពស់​ជាប់​បង្កាន់ដៃ​ខាងមុខ​បានគ្នា​ប្រហែល​១​០​នាក់​។​ ​រានហាល​នេះ​ស័ក្តិសម​បំផុត​សម្រាប់​ភ្ញៀវ​ទាំងឡាយ​ណា​ដែល​ចង់បាន​ខ្យល់អាកាស​និង​ចង់​ទស្សនា​ថ្ងៃ​អស្តង្គត​ដ៏​សែន​រ៉ូ​មេន​ទិ​ក​។​

            ​​ដោយឡែក​ ​ផ្នែក​ខាងក្នុង​វិញ​ក៏មាន​បរិយាកាស​ពិសេស​មួយ​បែប​ដែរ​ ​មាន​ទិដ្ឋភាព​ស្រដៀង​បារ​ដែល​ជា​ផ្នែក​នៃ​សណ្ឋាគារ​ប៊ូ​ទិ​ក​បែប​បារាំង​ដែល​មាន​ពន្លឺភ្លើង​ស្រទន់​ ​និង​ ​ផ្តល់​ផាសុកភាព​ខ្ពស់​ចំពោះ​អតិថិជន​គ្រប់រូប​ ​អម​ដោយ​ការ​បម្រើ​សេវាកម្ម​យ៉ាង​រួសរាយ​រាក់ទាក់​ពី​បុគ្គលិក​ហាង​។​ ​ក្រៅពី​បរិយាកាស​គាប់ចិត្ត​គាប់​ភ្នែក​មិនគួរ​ឲ្យ​ចង់​ឃ្លាត​នេះ​ ​បារ​នេះ​មានការ​ដាក់​តាំង​បង្ហាញ​ផលិតផល​ស្រា​ម៉ាក​ល្បី​ៗ​ពី​បរទេស​យ៉ាង​ច្រើន​ត្រៀបត្រា​ចំកណ្តាល​ហាង​បែរមុខ​ទៅ​រក​ផ្លូវចូល​តែម្តង​។​ ​នៅ​លើ​ជញ្ជាំង​វិញ​ ​មាន​គំនូរ​និង​វត្ថុ​សិល្បៈ​ផ្សេងៗ​ត្រូវ​បាន​ដាក់​តាំង​យ៉ាង​មានសណ្តាប់ធ្នាប់​រៀបរយ​គួរឲ្យ​ចង់​រំពៃ​ភ្នែក​ក្រឡេកមើល​ខណៈ​ពេល​អង្គុយ​ទទួល​ ​ទាន​ភោជនាហារ​។​ ​មុខម្ហូប​របស់​បារ​ឡឺ​វា​ង់​ត្រូវ​បាន​បែងចែក​ជា​បី​ប្រភេទ​ ​រួម​មាន​ ​Ocean​ ​Fusion​ (​ម្ហូប​ច្នៃ​ពី​គ្រឿង​សមុទ្រ​), ​Khmer​ ​Fusion​ (​ម្ហូប​បែប​ខ្មែរ​), ​L​e​ ​V​in​ ​P​latter​ (​ឈុត​បន្ទះ​ជ្រុ​ញ​ប្រចាំ​ហាង​ឡឺ​វា​ង់) ​និង​ជម្រើស​ស្រា​ឈ្ងុយឆ្ងាញ់​ជា​ច្រើនមុខ​ដែល​អាច​បម្រើ​ជា​កែវ​ ​ឬ​ ​ដប​ ​តាម​ចំណង់ចំណូលចិត្ត​របស់​ភ្ញៀវ​៕​

Article by SRIN SOKMEAN


SUGGESTIONS