Sovrin
Sovrin
ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ (32nd SEA Games) នឹងរំកិលចូលមកដល់ឆាប់ៗនេះ ដែលនឹងប្រព្រឹត្តឡើងនៅថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ នៅលើទឹកដីនៃព្រះរាជាណាចក្រកម្ពុជា ជាលើកដំបូង បន្ទាប់ពីបានទន្ទឹងរង់ចាំអស់រយៈពេល៦៤ឆ្នាំ។ សម្រាប់បេក្ខភាពដែលនឹងចូលរួមប្រកួតវិញ ឃើញថាមានការចូលរួមពីបណ្តាប្រទេសជាច្រើនដែលជាសមាជិកសហព័ន្ធកីឡាអាស៊ីអាគ្នេយ៍ ដោយមានការហ្វឹកហាត់ត្រៀមខ្លួនយ៉ាងស្វិតស្វាញទៅតាមវិញ្ញាសាផ្សេងៗពីគ្នា។ ជាមួយគ្នានេះ សូវរីន បានសម្ភាសន៍បេក្ខភាពដែលនឹងតំណាងឲ្យកម្ពុជាក្នុងវិញ្ញាសាកីឡាហែលទឹកមួយរូបអំពីជីវិតជាកីឡាការិនី ជាពិសេសការត្រៀមខ្លួនសម្រាប់ការប្រកួត SEA Games នាពេលខាងមុខនេះផងដែរ។
វាមិនមែនជារឿងងាយស្រួលនោះទេ សម្រាប់បេក្ខភាពគ្រប់រូបត្រៀមខ្លួនក្នុងការហ្វឹកហាត់ ក្នុងគោលបំណងដូចគ្នាដើម្បីសម្រេចគោលដៅរបស់ខ្លួន គឺទទួលបានជ័យជម្នះក្នុងការប្រកួត។ “SEA Games 2023 ជាគោលដៅធំបំផុតរបស់ខ្ញុំ ហើយគ្រប់គ្នាបានដាក់ក្តីសង្ឃឹមមកលើពួកយើងហើយ ដូច្នេះយើងមានតែអត់ធ្មត់ព្យាយាមហ្វឹកហាត់ឲ្យបានខ្លាំងបំផុត ហើយទោះបីជាលទ្ធផលយ៉ាងណាក៏ខ្ញុំព្រមទទួលដែរព្រោះខ្ញុំបានដាក់ចិត្តនិងកាយខំប្រឹងអស់ហើយ។” កីឡាការិនី កាំង មុយនីន បានលើកឡើងអំពីការតាំងចិត្តក្នុងគោលជំហរដ៏រឹងមាំ។ ងាកមកជជីកសួរអំពីការហ្វឹកហាត់វិញ ដើម្បីត្រៀមលក្ខណៈសម្រាប់ SEA Games នាពេលខាងមុខនេះ មុយនីន បានទៅចេញទៅហ្វឹកហាត់នៅប្រទេសវៀតណាម ដែលមានរយៈពេលរហូតដល់ទៅ៤ខែ និងត្រូវបានដឹកនាំដោយ លោកគ្រូ ហែម ថុនពន្លឺ។
Image Courtesy: PAEAYIM PHOTO
បើនិយាយអំពីការចាប់ផ្តើមបោះជំហានក្នុងវិស័យកីឡានេះ កីឡាការិនីវ័យ១៧ឆ្នាំរូបនេះបាន រំលឹកឡើងថា “ដំបូងឡើយកាលពីខ្ញុំនៅតូច ម្តាយខ្ញុំបានជួលគ្រូឲ្យបង្រៀនខ្ញុំចេះហែលទឹកដើម្បីអោយខ្ញុំមានអារម្មណ៍សុវត្ថិភាពពេលនៅកន្លែងមានទឹក។ អស់រយៈពេលប្រហែល2ខែក្រោយមក ខ្ញុំក៏ចាប់ផ្តើមចេះហែលហើយចូលចិត្តកីឡាមួយនេះ។ នៅឆ្នាំ២០១៩ខ្ញុំក៏បានជាប់ជាកីឡាការិនីជម្រើសជាតិ ក៏ជាពេលមួយដែលខ្ញុំពេញចិត្ត ហើយខ្ញុំក៏ប្តេជ្ញាចិត្តខិតខំហ្វឹកហាត់មកដល់សព្វថ្ងៃនេះ។” បន្ទាប់ពីបានបង្ហាញខ្លួនជាផ្លូវការក្នុងនាមជាកីឡាការិនីហែលទឹកជម្រើសជាតិ មុយនីន ក៏ធ្លាប់ចូលរួមការប្រកួតក្នុងស្រុក ហើយឈ្នះមេដាយជាច្រើនផងដែរ។ លើសពីនេះទៅទៀត ក៏ធ្លាប់ទទួលបានឱកាសចេញទៅប្រកួតថ្នាក់អន្តរជាតិជាច្រើនលើក។ “ពេលវេលាដែលខ្ញុំចងចាំមិនភ្លេចនោះគឺនៅខែ០៩ ឆ្នាំ២០២២ ខ្ញុំបានចូលរួមប្រកួតកីឡា Finswimming នៅប្រទេសថៃដោយទទួលបានមេដាយមាសចំនួន៣ និងមេដាយសំរឹទ្ធចំនួន១។
ទន្ទឹមនឹងទទួលបានជ័យជម្នះលើអាជីពដែលខ្លួនស្រលាញ់ពេញចិត្ត ក្នុងនាមជាមនុស្សស្រីស្រលាញ់សម្រស់ចូលប្រឡូកក្នុងវិស័យកីឡា មុយនីន បានលើកឡើងទាំងមិនរារែកថា “កីឡាហែលទឹកជាកីឡាទទួលបានសុខភាពល្អ និងរាងស្អាត ប៉ុន្តែនៅពេលយើងប្រើរយៈពេលយូរនៅក្នុងទឹកវាប្រាកដណាស់ដែលធ្វើអោយយើងខូចស្បែកខូចសម្រស់ តែបើយើងមានការប្តេជ្ញាចិត្តចង់ក្លាយជាកីឡាករល្អហើយទាំងនោះមិនមែនជាឧបសគ្គសម្រាប់ឆ្ពោះទៅរកភាពជោគជ័យនោះទេ។” ទោះយ៉ាងណា កត្តាដែលជំរុញឲ្យកញ្ញាឈានមកដល់ចំណុចនេះ ក្រៅពីទទួលបានសុខភាពល្អ រាងកាយរឹងមាំហើយ ដែលសំខាន់មួយទៀតនោះគឺ មានការជំរុញលើកទឹកចិត្តពីលោកគ្រូផ្ទាល់តែម្តង ហើយកញ្ញាក៏ចង់ផ្សព្វផ្សាយពីកីឡាមួយនេះឲ្យមហាជនចូលរួមគាំទ្រ និងយល់ពីកីឡាមួយប្រភេទនេះផងដែរ។
Image Courtesy: BTV
សម្រាប់ការដែលកម្ពុជាធ្វើជាម្ចាស់ផ្ទះការប្រកួត SEA Games 2023 នេះ តាមរយៈសូវរីន មុយនីន ក៏មានពាក្យពេចន៍ផ្តាំផ្ញើដែរថា “វាជាពេលមួយដែលយើងទាំងអស់គ្នាបានទន្ទឹងរង់ចាំយូរណាស់មកហើយ ខ្ញុំជឿជាក់ថា បងប្អូនកីឡាករកីឡាការិនីទាំងអស់គ្នានឹងព្យាយាមប្រឹងប្រែងប្រកួតអោយអស់ពីសមត្ថភាព។ ពេលខ្លះមានរឿងអវិជ្ជមានកើតឡើងច្រើន ប៉ុន្តែយើងគួរគិតនិងផ្តោតលើរឿងវិជ្ជមានបានហើយ ព្យាយាមអោយអស់ពីកម្លាំងកាយចិត្តទោះទទួលបានលទ្ធផលយ៉ាងណាក៏យើងសប្បាយចិត្ត។”
មកជ្រាបអំពីជីវប្រវត្តិរបស់កីឡាការិនីរូបនេះវិញ កាំង មុយនីន មានស្រុកកំណើតមកពីទីក្រុងភ្នំពេញ កើតក្នុងគ្រួសារដែលមានលោកឳពុកអ្នកម្តាយជាអាជីវករ ដែលកញ្ញាជាកូនពៅក្នុងចំណោមបងប្អូន៣នាក់។ សព្វថ្ងៃកញ្ញាកំពុងសិក្សាថ្នាក់ទី១១នៃវិទ្យាល័យបាក់ទូក៕
Article by SOUNG SOKSAN
