Sovrin
Sovrin
ស៊េរីគំនូរ «Let’s Eat» បង្ហាញពីទិដ្ឋភាពការរស់នៅប្រចាំថ្ងៃដ៏រស់រវើក
NEWS 21 hours ago
Michael Santiago ដែលភាគច្រើនស្គាល់សិល្បកររូបនេះថា Mike ជាអ្នកបង្កើតរឿងនិទានតាមរូបភាព នៃការផ្សាយពាណិជ្ជកម្មជាច្រើននៅក្នុងរាជធានីភ្នំពេញ។ មានដើមកំណើតនៅប្រទេសហ្វីលីពីន Mike បានចាប់ផ្តើមអាជីពរបស់ខ្លួននៅក្នុងប្រទេសកម្ពុជាក្នុងឆ្នាំ២០០៦ មកម៉្លេះ។ លោកបានចំណាយពេលជាច្រើនឆ្នាំជាអ្នកបង្កើតរូបភាព និងជាសិល្បករគំនូរមួយរូបនៅក្នុងក្រុមហ៊ុនឯកជនមួយផងដែរ។
ស្នាដៃស៊េរីថ្មីចុងក្រោយបំផុតរបស់ Mikey គឺមានឈ្មោះថា «Let’s Eat» គឺជាការបង្ហាញពី វប្បធម៌ម្ហូបដែលភាគច្រើននៅតាមដងផ្លូវនៅក្នុងទីក្រុងភ្នំពេញ។ ស៊េរីគំនូរ «Let’s Eat» គឺត្រូវបានដងស្រង់ចេញទម្លាប់ពេលព្រឹករបស់លោកផ្ទាល់តែម្តងដូចជា៖ ការទិញកាហ្វេ និងអាហាររៀងរាល់ព្រឹកពីតូបលក់មួយកន្លែងដែលនៅក្បែរ វិទ្យាល័យសន្ធរម៉ុក ក្នុងរាជធានីភ្នំពេញ។ ភាពរួសរាយ របស់អ្នកលក់អាហារទាំងនោះបានរំឭកលោកដល់ម្ដាយរបស់លោក ដែលធ្លាប់លក់នំប៉័ងនៅស្រុកកំណើតនៃប្រទេសហ្វីលីពីន។ ការលះបង់ និងភាពកក់ក្ដៅរបស់គ្រួសាររបស់ Mike បានជំរុញទឹកចិត្តឲ្យចាប់យករូបភាពទាំងនោះហើយបានបង្កើតជាស្នាដៃសិល្បៈមួយដ៏គួរឲ្យចាប់អារម្មណ៍ និងបង្ហាញពីការប្រកបរបស់ចិញ្ចឹមជីវិតរបស់ប្រជាជនខ្មែរថែមទៀត។
តើលោកគិតថាគំនូរដើរតួនាទីអ្វីខ្លះក្នុងការបង្ហាញអត្ថន័យតាមរយៈសិល្បៈរូបភាព?
ខ្ញុំតែងតែបង្ហាញពីស្នាដៃសិល្បៈភាគច្រើនពីទិដ្ឋភាពក្នុងផ្ទះរបស់ពួកគេ។ ជាធម្មតា យើងឃើញទេសភាព ឬរូបគំនូរមនុស្សនៅបន្ទប់ទទួលភ្ញៀវ គំនូរអរូបិយនៅកន្លែងជាក់លាក់មួយចំនួន ហើយគំនូរផ្កា ផ្លែឈើ ឬបន្លែនៅបន្ទប់ទទួលទានអាហារ ឬផ្ទះបាយ។ ទោះជាយ៉ាងណាក៏ដោយ ខ្ញុំចូលចិត្តឱ្យស្នាដៃរបស់ខ្ញុំត្រូវបានដាក់នៅបន្ទប់ទទួលទានអាហារ ឬផ្ទះបាយដែលជាទីកន្លែងដែលវាគួរស្ថិតនៅ។ ខ្ញុំសង្ឃឹមថាវានឹងជំរុញទឹកចិត្តមនុស្ស ជាពិសេស នៅពេលពួកគេកំពុងចម្អិនអាហារ ឬក្លាយជាប្រធានបទពិភាក្សានៅពេលទទួលទានអាហារនៅផ្ទះ។
តើម្ហូបតាមផ្លូវរបស់ខ្មែរមួយណាដែលលោកគិតថាសំខាន់ ឬពិបាកបំផុតក្នុងការចាប់យករូបភាពក្នុងសិល្បៈ?
ខ្ញុំគិតថា នំប៉័ងប៉ាតេ គឺលេចធ្លោជាងគេ។ ខ្ញុំតែងតែទិញនំប៉័ងខ្មែររបស់ខ្ញុំពី «មីង» ម្នាក់ ដែលគាត់រៀបចំលក់នៅតូបរបស់គាត់តាម មហាវិថីកម្ពុជាក្រោម។ ក្នុងអំឡុងពេលនៃការរីករាលដាលនៃជំងឺកូវីដ-១៩ នៅពេលដែលមនុស្សគ្រប់គ្នានៅផ្ទះ ហើយហាងភាគច្រើនត្រូវបានបិទ ខ្ញុំតែងតែឆ្ងល់ថាតើមានអ្វីកើតឡើងចំពោះគាត់ ជាពិសេសនៅពេលដែលខ្ញុំនឹកអាហារតាមផ្លូវ។
តើអ្នកគាំទ្ររបស់លោកផ្តល់មតិលើស្នាដៃរបស់លោកយ៉ាងដូចម្ដេចខ្លះ?
កាលពីឆ្នាំមុន នៅពេលដែលពិព័រណ៍ Let’s Eat របស់ខ្ញុំត្រូវបានប្រារព្ធឡើងនៅ Story Design Hub អ្នកទស្សនាភាគច្រើនគឺជាយុវជន។ មតិភាគច្រើនដែលខ្ញុំបានឮពីពួកគេគឺ “ខ្ញុំពិតជាចូលចិត្តវាណាស់ ព្រោះវាធ្វើឱ្យខ្ញុំនឹកដល់ម៉ាក់ខ្ញុំ' ហើយអ្នកផ្សេងទៀតបាននិយាយថា 'នេះជាអ្វីដែលខ្ញុំតែងតែឃើញនៅតាមផ្លូវពេលទៅសាលារៀន”។
តើលោកអាចចែករំលែកនូវអនុស្សាវរីយ៍មួយចំនួននៃពិព័រណ៍សិល្បៈរបស់លោកបានទេ?
ចាប់តាំងពីការដាក់បង្ហាញស៊េរី Let’s Eat នៅ Story Design Hub កាលពីចុងឆ្នាំមុន ស្នាដៃសិល្បៈរបស់ខ្ញុំត្រូវបានដាក់តាំងបង្ហាញនៅ Galyon Gallery x Cafe។ វិចិត្រសាលនេះត្រូវបានសហស្ថាបនាដោយ Patrick James Almera ដែលជាស្ថាបត្យករ និងអ្នករចនាជនជាតិហ្វីលីពីន ហើយចក្ខុវិស័យរបស់ Galyon គឺការបង្កើតនូវ គំនិតច្នៃប្រតិដ្ឋឆ្លងវប្បធម៌។ ពិព័រណ៍ដែលបានប្រារព្ធឡើងនៅថ្ងៃទី ១៨ ខែមិថុនា ឆ្នាំ២០២៥ ត្រូវបានចូលរួមដោយលោកស្រី Laarni Zorayda S Gandarosa ដែលជាលេខាទីមួយ និងកុងស៊ុលប្រចាំស្ថានទូតហ្វីលីពីននៅភ្នំពេញ។ វាបានបង្ហាញពីសិល្បៈ និងការរចនាបែបហ្វីលីពីនក្នុងបរិបទកម្ពុជា ដោយការរួមបញ្ចូលអត្តសញ្ញាណហ្វីលីពីន និងកម្ពុជា តាមរយៈគំនូរសិល្បៈ៕
