Sovrin
Sovrin
មុខម្ហូបខ្មែរដ៏ឆ្ងាញ់ពិសា ផ្សំឡើងពីផ្កា៦ប្រភេទជាគ្រឿងផ្សំគោល
TRAVEL & LIVING 7 months ago
រដូវបុណ្យភ្ជុំបិណ្ឌ ប្រជាជនខ្មែរតែងប្រកាន់ភ្ជាប់ប្រពៃណី ក៏ដូចជាមានការជួបជុំគ្រួសារ បងប្អូនជាដើម។ ជាការសាទរនាឱកាសនេះផងដែរ យើងសូមណែនាំមុខម្ហូបខ្មែរដែលសម្រាំងយកគ្រឿងផ្សំគោលពីផ្កា៦ប្រភេទមានដូចជា ផ្កាចេក ផ្កាឈូក ផ្កាមេអំបៅ ផ្ការំយោល ផ្កាកំប្លោក និងផ្កាស្នោ សុទ្ធសឹងជាផ្កាដែលងាយស្រួលរកនៅតាមស្រុកភូមិ។ ចង់ដឹងថាមានមុខម្ហូបអ្វីខ្លះ យើងទៅអានបន្តទាំងអស់គ្នា។
ខជើងជ្រូកផ្កាចេក
គ្រឿងផ្សំ៖ ជើងជ្រូក ៦០០ក្រាម, ផ្កាចេក ៥០ក្រាម, ផ្សិតខ្មៅក្រៀម ១០០ក្រាម, ម្រេច ១ស្លាបព្រាកាហ្វេ, ប្រេងខ្យង ១ស្លាបព្រាបាយ, ទឹកស៊ីអ៊ីវខាប់ ១ស្លាបព្រាបាយ, ម្សៅស៊ុប ២ស្លាបព្រាកាហ្វេ, ស្ករត្នោត ៣ស្លាបព្រាបាយ, ទឹកស្អាត ១លីត្រ, អំបិល កន្លះស្លាបព្រាកាហ្វេ, ទឹកត្រី ១ស្លាបព្រាកាហ្វេ, ខ្ទឹមសចិញ្រ្ជាំ ២ស្លាបព្រាបាយ, និងសណ្តែកដី ១០ក្រាម។
វិធីធ្វើ៖ ដំបូងយើងកាត់ជើងជ្រូកជាដុំៗ រួចមកយកប្រឡាក់ជាមួយទឹកស៊ីអ៊ីវខាប់ ប្រេងខ្យង ម្សៅស៊ុប ទឹកត្រី ខ្ទឹមស ម្រេច ស្ករត្នោត ប្រឡាក់ឱ្យសព្វល្អ។ យកផ្កាចេកមកកួចយកម៉ូត រីឯផ្សិតខ្មៅក្រៀមត្រូវត្រាំទឹកឱ្យរីកមួយឡែកសិន។ ចាប់ផ្តើមដាក់ខ្ទះឱ្យក្តៅរួចដាក់ស្ករត្នោតមកកូរឱ្យឡើងក្រហមសឹមដាក់ខ្ទឹមសកូរឱ្យឡើងឈ្ងុយ រួចដាក់ជើងជ្រូក ផ្កាចេក ផ្សិតខ្មៅ និងសណ្តែកដីចូលរម្ងាស់ដល់សាច់ឆ្អិន និងចូលជាតិបានល្អជាការស្រេច។
នំមាត់ឆ្នាំងស្នូលផ្អែម
គ្រឿងផ្សំ (ផ្នែកម្សៅ)៖ ផ្កាមេអំបៅ និងផ្ការំយោល (ដាក់ត្រាំទឹកដើម្បីយកពណ៌), ម្សៅអង្ករខ្សាយ ១០០ក្រាម, ម្សៅឆា ១០០ក្រាម, ទឹកស្ករ (ទឹក១០០ម.ល លាយជាមួយស្ករ៥០ក្រាម), ទឹកត្រជាក់ ១០០ម.ល, ទឹកក្តៅ ១០០ម.ល និងប្រេងឆា ៣ស្លាបព្រាបាយ។
គ្រឿងផ្សំ (ផ្នែកស្នូល)៖ សណ្តែកក្រហម ១០០ក្រាម, ស្ករស ៣ស្លាបព្រាបាយ, សាច់ដូង ៥០ក្រាម, អំបិលកន្លះស្លាបព្រាកាហ្វេ និងល្ងសម្រាប់រោយពីលើ។
វិធីធ្វើ (ស្នូលនំ)៖ ដំបូងត្រូវយកសណ្តែកត្រាំទឹក៣០នាទី រួចយកមកចំហុយឱ្យឆ្អិនបន្តិច។ បន្ទាប់មកត្រូវយកសាច់ដូង ស្ករស និងអំបិលមកច្របល់ចូលគ្នារួចយកទៅដាក់ចំហុយជាមួយសណ្តែកទុករហូតដល់ឆ្អិន។
វិធីធ្វើម្សៅនំ៖ យកម្សៅអង្ករខ្សាយលាយជាមួយម្សៅឆាឱ្យស្មើសាច់គ្នា ទើបយកទឹកស្ករ ទឹកត្រជាក់ និងទឹកក្តៅចូលកូរបញ្ចូលគ្នាឱ្យទៅជាល្បាយតែមួយ។ បន្ទាប់មកទៀតត្រូវរំលែកម្សៅនំដែលលាយរួចអម្បិញមិញជាបីចំណែកដើម្បីទុកលាយជាមួយនឹងទឹកផ្កាដែលបានត្រាំយកពណ៌មកលាយជាមួយម្សៅ។ បន្ទាប់មកត្រូវយកខ្ទះ (ប្រភេទខ្ទះដែលចៀនមិនជាប់) បើកភ្លើងតិចៗ រួចចាក់ប្រេងឆាបន្តិច សឹមចាក់ម្សៅចូលចំនួន១វែក ហើយគ្របទុកប្រហែល១៥វិនាទី។ ពេលម្សៅឆ្អិនឡើងថ្លាល្អហើយបិទភ្លើងទុកឱ្យត្រជាក់ទើបដាក់ស្នូលរួចមូរ និងរោយល្ងពីលើជាការស្រេច។
បាយក្តាំងណាតាំង
គ្រឿងផ្សំ៖ ផ្កាកំប្លោក, ផ្កាស្នោ, បាយក្តាំង, សាច់ជ្រូក ២០០ក្រាម, បង្គាស្រស់ ២០០ក្រាម, ខ្ទិះដូង ៥០ម.ល, ខ្ទឹមស ៥កំពឹស, ខ្ទឹមក្រហម ២មើម, គល់ជីរវ៉ាន់ស៊ុយ ៣គល់, ទឹកត្រី ១ស្លាបព្រាបាយ, ស្ករស ១ស្លាបព្រាបាយ, ម្សៅស៊ុប ២ស្លាបព្រាកាហ្វេ, ម្ទេសឆ្អើរ ២ស្លាបព្រាបាយ (ចិញ្រ្ជាំ), សណ្តែកដីបន្តិច, សន្លឹកខ្ទឹមហាន់ល្អិតៗ និងប្រេងឆា ៣ស្លាបព្រាបាយ។
វិធីធ្វើ៖ ចាប់ផ្តើមដោយការយកគល់ជីរវ៉ាន់ស៊ុយ ខ្ទឹមក្រហម និងខ្ទឹមសមកបុកបញ្ចូលគ្នាជាមុនសិន។ ដាក់ដាំខ្ទះឱ្យក្តៅចាក់ប្រេងឆាចូល រួចដាក់ម្ទេសឆ្អើរ និងខ្ទឹមដែលបុកមុននេះចូលរំលីងឱ្យឈ្ងុយ។ បន្ទាប់មកត្រូវសាច់ជ្រូក បង្គា ទឹកត្រី ម្សៅស៊ុប ស្ករស និងខ្ទិះដូងឆាបញ្ចូលគ្នារហូតដល់ឆ្អិនល្អ។ ចុងក្រោយរោយសណ្តែកដី និងស្លឹកខ្ទឹមពីលើជាការស្រេច។ រៀបចំដាក់ចាន និងទទួលទានផ្ទាប់ជាមួយផ្កាកំប្លោក ផ្កាស្នោ បាយក្តាំង ជ្រលក់ជាមួយទឹកខ្ទិះដែលបានឆាមុននេះ។
មៀងខាំ
គ្រឿងផ្សំ៖ កាពិ ១ស្លាបព្រាបាយ, សរសៃរដូងលីង ២ស្លាបព្រាបាយ, ខ្ញី ១កូនមើមតូច, បង្គាក្រៀម ១ស្លាបព្រាបាយ, ស្ករត្នោត ៥០ក្រាម, ខ្ទឹមស ៣កំពឹស, ទឹកត្រី ១ស្លាបព្រាបាយ និងទឹកធម្មតា ៦ស្លាបព្រាបាយ។
គ្រឿងសម្រាប់ញុំាផ្ទាប់៖ ស្រទាប់ផ្កាឈូក, សម្បកក្រូចឆ្មារ (ហាន់ជាសរសៃរ), ខ្ញី និងខ្ទឹមក្រហម (ហាន់ជាដុំតូច៤ជ្រុង), ម្ទេស (តាមចំណូលចិត្ត), បង្គាក្រៀម (ត្រាំទឹកក្តៅឱ្យរីក), សណ្តែកដីលីង, សរសៃរដូងលីង និងស្លឹកចាភ្លូ។
វិធីធ្វើ៖ ត្រូវយកសរសៃរដូងលីង ខ្ញី ខ្ទឹមស និងបង្គាក្រៀមមកបុកចូលគ្នាឱ្យបានម៉ដ្តល្អ រួចយកទៅលាយជាមួយកាពិ ស្ករត្នោត ទឹកត្រី ទឹក មកលាយបញ្ចូលគ្នា។ បន្ទាប់មកដាក់ដាំខ្ទះចាក់គ្រឿងដែលបានលាយរួចរម្ងាស់ឱ្យឆ្អិន និងឈ្ងុយជាការស្រេច។ បរិភោគដោយយកស្រទាប់ផ្កាឈូក ឬស្លឹកចាភ្លូមកខ្ចប់ជាមួយនឹងគ្រឿងដែលបានរៀបរាប់ខាងលើ និងជ្រលក់ជាមួយទឹកកាពិ៕
Article by SOUNG SOKSAN
