Sovrin
Sovrin
សាកល្បងចម្អិនឈុតមុខម្ហូបបែបប្រណីតសម្រាប់ត្រៀមជប់លៀងលក្ខណៈគ្រួសារ
TRAVEL & LIVING 4 months ago
ឈានមកដល់ខែធ្នូចុងឆ្នាំ ជាពេលវេលាដ៏រំភើបរីករាយដែលឱកាសពិសេសៗនាថ្ងៃឈប់សម្រាកនឹងរំកិលចូលមកដល់។ ស្របនឹងឱកាសបុណ្យណូអែល ឆ្លងឆ្នាំសកលក៏ឈានចូលមកដល់ដូចគ្នា។ នាឱកាសនេះដែរ ជឿជាក់ថាប្រិយមិត្តប្រាកដជាមានគម្រោងមានដំណើរកម្សាន្ត និងមានការជួបជុំគ្រួសារ ឬមនុស្សជាទីស្រលាញ់ ក៏ដូចជាមានគម្រោងត្រៀមកម្មវិធីជប់លៀងនៅផ្ទះជាដើម។ ដូច្នេះ សូវរីនបានសម្រិតសម្រាំងនាំយកនូវឈុតមុខម្ហូបបែបប្រណីត សម្រាប់ជាការអបអរព្រមគ្នា ដែលប្រិយមិត្តអាចសាកល្បងចម្អិនដើម្បីត្រៀមសម្រាប់ការជួបជុំបង្កើតអនុស្សាវរីយ៍ដ៏មានន័យផងដែរ។
១. ទ្រូងទាចៀនជាមួយទឹកជ្រលក់ទឹកឃ្មុំ(Grilled duck breast with honey sauce)
គ្រឿងផ្សំ៖ ទ្រូងទា៣០០ក្រាម, ទឹកឃ្មុំ១០ស្លាបព្រាបាយ, ម្សៅខ្ទឹមស២ស្លាបព្រាកាហ្វេ, ទឹកខ្មេះផ្លែប៉ោម១ស្លាបព្រាបាយ, អំបិលកន្លះស្លាបព្រាកាហ្វេ, ប្រេងខ្យង១ស្លាបព្រាបាយ, ម្រេចម៉ដ្តបន្តិច, ខ្ទឹមស២កំពឹស(ដំឱ្យបែក) និងប្រេងអូលីវបន្តិច(សម្រាប់ចៀនសាច់)។
វិធីធ្វើ៖ ជាដំបូងយើងត្រូវយកសាច់ទ្រូងទាមកប្រឡាក់ជាមួយអំបិល និងម្រេចម៉ដ្តឱ្យចូលជាតិជាមុនសិន។ បន្ទាប់មកត្រូវធ្វើទឹកជ្រលក់ដោយយកគ្រឿងផ្សំដូចជា ទឹកឃ្មុំ ម្រេច ប្រេងខ្យង ម្សៅខ្ទឹមស និងអំបិលមកកូរលាយបញ្ចូលគ្នាឱ្យសព្វ សឹមយកទៅដាក់កូរលើភ្លើងដោយប្រើកម្តៅល្មម។ បន្ទាប់មកដាក់ដាំខ្ទះឱ្យក្តៅដាក់ប្រេងអូលីវ និងខ្ទឹមសចូល រួចដាក់សាច់ទ្រូងទាដែលបានប្រឡាក់រួចមុននេះចូល ចៀនរហូតដល់ឆ្អិនល្អ(ទ្រូងទាអាចចម្អិនឱ្យឆ្អិន ឬឆ្អិន៧០ភាគរយតាមចំណូលចិត្ត)។ ចុងក្រោយរៀបចំសាច់ដាក់ចាន (អាចតុបតែងបន្ថែមជាមួយបន្លែតាមចំណូលចិត្ត)រួចជាការស្រេច។
២. ខ្យងស្កាឡប់ទឹកល្ពៅលាយគ្រឿង(Scallops with Pumpkin puree)
គ្រឿងផ្សំ៖ ខ្យងស្កាឡប់, ប្រេងអូលីវ២ស្លាបព្រាបាយ, អំបិលបន្តិច, ក្រូចឆ្មារ១ចំណិត, ម្រេចម៉ដ្តបន្តិច, ប៊័រ៥០ក្រាម, ល្ពៅ២០០ក្រាម, ទឹកដោះគោស្រស់១០០មីលីលីត្រ, ឆៃថាក្រហម(ឈូសស្តើងៗ) និងកូនឆៃថាបណ្តុះបន្តិច(សម្រាប់បន្លែអ្នកអាចជ្រើសរើសតាមចំណូលចិត្ត)។
វិធីធ្វើ៖ ដំបូងត្រូងយកល្ពៅទៅស្ងោរឱ្យឆ្អិនផុយល្អ សឹមយកល្ពៅ ប៊័រ ទឹកដោះគោ អំបិល និងម្រេចមកកិនបញ្ចូលគ្នាឱ្យម៉ដ្ត ហើយត្រូវយកល្បាយនោះទៅដាក់កូរលើភ្លើងរហូតដល់ពុះ រួចដាក់ចុះទុកមួយឡែក។ បន្ទាប់មកទៀតត្រូវយកខ្យងស្កាឡប់ មកប្រឡាក់ជាមួយអំបិល និងម្រេចម៉ដ្តទុកឱ្យចូលជាតិ រួចយកមកចៀនជាមួយប្រេងអូលីវប្រហែល១នាទី សឹមដាក់ប៊័រ និងច្របាច់ក្រូចឆ្មារត្រឡប់ចុះឡើងរហូតដល់ខ្យងស្កាឡប់ឆ្អិនជាការស្រេច។ ចុងក្រោយគ្រាន់តែរៀបចំដាក់ចាន និងបន្ថែមជាមួយបន្លែដែលអ្នកចូលចិត្តជាការស្រេច។
៣. ថ្លើមក្ងានចៀនបែបបារាំង(Fried foie gars)
គ្រឿងផ្សំ៖ ថ្លើមក្ងាន១ដុំ, ទឹកខ្មេះ Balsamic ៥ស្លាបព្រាបាយ, ទឹកឃ្មុំ១០ស្លាបព្រាបាយ, ម្សៅខ្ទឹមស២ស្លាបព្រាកាហ្វេ, ប្រេងខ្យង១ស្លាបព្រាបាយ, នំប៉័ង១បន្ទះ, អំបិល១ចឹប, ម្សៅម៉ូសាលីណាកន្លះស្លាបព្រាកាហ្វេ, ម្រេចម៉ដ្តបន្តិច, ប៊័រ៣០ក្រាម, និងផ្លែឈើដូចជា ទំពាំងបាយជូរ ស្វាយទុំ ស្រកានាគ និងក្រូច។
វិធីធ្វើ៖ ជំហានដំបូងយកថ្លើមក្ងានមកវះជាបន្ទះ រួចប្រឡាក់ជាមួយម្សៅម៉ូសាលីណា អំបិល និងម្រេចម៉ដ្ត រួចយកទៅចៀនជាមួយប៊័រឱ្យឆ្អិនល្អទុកមួយអន្លើ។ ជំហានបន្ទាប់ រៀបចំចិតផ្លែឈើដែលមានមកចិតជាចំណិតៗតូចល្មម(ដូចក្នុងរូប)។ ដោយឡែកចំពោះនំប៉័ងត្រូវយកទៅអាំងឱ្យឡើងក្រហមបន្តិចសិន។ បន្ទាប់មកត្រូវធ្វើទឹកជ្រលក់ដោយយកទឹកខ្មេះទៅរម្ងាស់ដោយប្រើកម្តៅខ្លាំងរយៈពេល៣០វិនាទី ទើបចាក់ទឹកឃ្មុំ ម្សៅខ្ទឹមស ប្រេងខ្យង និងអំបិលចូលកូរឱ្យសព្វរួចដាក់ចុះទុកឱ្យត្រជាក់។ ជំហានចុងក្រោយយកថ្លើមក្ងានដាក់លើបន្ទះនំប៉័ងស្រោចទឹកជ្រលក់(ដូចក្នុងរូប) ជាការស្រេច។ ទទួលទានជាមួយផ្លែឈើនឹងទទួលបានឱជារសកាន់តែឆ្ងាញ់ពិសា។
៤. ត្រីសាលម៉ុនជ្រលក់ទឹកមើមយ៉េន(Salmon with Beetroot puree)
គ្រឿងផ្សំ៖ ត្រីសាលម៉ុន៣០០ក្រាម, ប្រេងអូលីវ៥ស្លាបព្រាបាយ, អំបិលមួយចឹប, ម្សៅស៊ុប១ស្លាបព្រាកាហ្វេ,ម្រេចម៉ដ្តបន្តិច, មើមយ៉េន៣០០ក្រាម, ក្រសាំងទាប និងកូនឆៃថាវក្រហម(តាមចំណូលចិត្ត) និងទឹកធម្មតា២៥០មីលីលីត្រ។
វិធីធ្វើ៖ ជាដំបូងយើងត្រូវយកត្រីសាលម៉ុនមកប្រឡាក់ជាមួយអំបិល និងម្រេចរួចទុកមួយឡែកសិន។ បន្ទាប់មកយកដំឡូងឈាមមាន់ដាក់ក្នុងចានមួយ ដាក់ទឹក អំបិល និងប្រេងអូលីវ រួចយកទៅដាក់ដុតក្នុងអូវិនដោយប្រើកម្តៅ ២១០អង្សារយៈពេល២ម៉ោង។ ក្រោយមកយកដំឡូង និងទឹកដែលបានដុតមុននេះមកកិនឱ្យម៉ដ្តល្អ(អាចភ្លក់បន្ថែមបន្ថយយករសជាតិតាមចំណូលចិត្ត)។ ដាក់ដាំខ្ទះឱ្យក្តៅ ដាក់ប្រេងអូលីវចូល និងដាក់ត្រីសាលម៉ុនចៀនរហូតដល់ឆ្អិនល្អ។ ចុងក្រោយរៀបដាក់ក្នុងចានជាការស្រេច។
៥. នំខារ៉ាមែលរសជាតិម្នាស់(Pineapple Caramel Custard)
គ្រឿងផ្សំ៖ ម្នាស់ទុំ១ផ្លែ, ម្សៅវ៉ានីឡា១ស្លាបព្រាកាហ្វេ, ពងមាន់៣គ្រាប់, ស្ករស៩ស្លាបព្រាបាយ, ទឹកដោះគោស្រស់២០០មីលីលីត្រ, Whipping Cream តាមចំណូលចិត្ត, ផ្លែស្រ្តបឺរីស្រស់ និងទឹកធម្មតា៦០មីលីលីត្រ។
វិធីធ្វើ៖ ដំបូងយកផ្លែម្នាស់មកកាត់ជាពីរ រួចកោលយកសាច់ចេញ។ បន្ទាប់មកយកសាច់ម្នាស់ទៅកិន ហើយច្របាច់យកតែទឹកដើម្បីលាយជាមួយពងមាន់ ទឹកដោះគោស្រស់ ស្ករស ម្សៅវ៉ានីឡា កូរបញ្ចូលគ្នាឱ្យក្លាយជាល្បាយតែមួយ ហើយចាក់ចូលក្នុងម្នាស់ដេលបានកោសសាច់រួច។ បន្ទាប់មកយកទៅចំហុយទុករយៈពេល១៥ទៅ២០នាទី ឬរហូតឃើញថានំឆ្អិនល្អហើយចាំដាក់ចុះទុកឱ្យត្រជាក់។ លាយស្ករសជាមួយទឹករួចយកកូរលើភ្លើងឱ្យរលាយ និងឡើងពណ៌ក្រហមបន្តិច សឹមយកទៅចាក់លើនំដែលបានចំហុយនោះ។ ក្រោយមកយកនំដាក់ក្នុងទូទឹកកកទុកឱ្យត្រជាក់ សឹមបន្ថែម Whipping Cream និងបន្ថែមផ្លែឈើពីលើជាការស្រេច៕
Article by SOUNG SOKSAN
