Sovrin
Sovrin
វិចិត្រករ ម៉ន ជា បង្កើតស្នាដៃគំនូរបង្កប់អត្ថន័យពោរពេញដោយការច្នៃប្រតិដ្ឋ
NEWS 3 months ago
បើនិយាយពីវិចិត្រករ ម៉ន ជា ប្រហែលប្រិយមិត្តមួយចំនួនដែលស្រលាញ់វិស័យគំនូរច្បាស់ជាបានស្គាល់លោករួចមកហើយ ដែលស្នាដៃរបស់លោកតែងតែលេចវត្តមានឡើងក្នុងពិព័រណ៍គំនូរផ្សេងៗ ក៏ដូចជាក្នុងកម្មវិធីប្រកួតសិល្បៈគំនូរមួយចំនួន។ លោកមានជំនាញលើការគូសគំនូរក្នុងទម្រង់ illustration គំនូរព្រាង គំនូរទឹក គំនូរសខ្មៅ និងគំនូរប្រេង។ ប៉ុន្តែបច្ចុប្បន្ន លោកបានចាប់យកអាជីពជំនាញលើប្រភេទគំនូរបែបសខ្មៅ ឬហៅថាការបោះពុម្ពប្លុក។
ក្នុងវ័យ៣៤ឆ្នាំ លោក ម៉ន ជា ជាវិចិត្រករដ៏មានទេពកោសល្យមួយរូបដែលមានស្រុកកំណើតមកពីខេត្តកំពត ហើយបច្ចុប្បន្នលោកកំពុងរស់នៅក្នុងខេត្តសៀមរាប។ បើនិយាយពីដំណើរដើមទងដែលលោកចូលប្រឡូកក្នុងវិស័យនេះវិញ លោកបានរំលឹកថា នៅឆ្នាំ២០១០ លោកបានជួបឧបទ្ទវហេតុ ជាអកុសនាំឱ្យលោកបានបាត់បង់ដៃទាំងពីររបស់លោក។ ប៉ុន្តែទោះបីជាយ៉ាងនេះក្តី ក៏មិនបានបញ្ឈប់លោកពីអាជីពសិល្បៈឡើយ តែវាបែរជាបំផុសគំនិតថ្មីៗដល់រូបលោកទៅវិញ។ “នៅអំឡុងឆ្នាំ២០១៥ ខ្ញុំចាប់ផ្តើមចូលរៀននៅអង្គការ Epic Arts ហើយនៅឆ្នាំ២០១៧ ខ្ញុំក៏បានក្លាយជាបុគ្គលិកប្រចាំនៅអង្គការនេះ ហើយក៏ជាអ្នកចម្រៀង និងអ្នករាំរបាំសហសម័យមួយរូបផងដែរ។” លោកបានលើកឡើង និងបន្តទៀតថា នៅចុងឆ្នាំ២០១៨ ដោយសារមានបញ្ហាសុខភាពលោកក៏បានឈប់ពីការសម្តែង និងងាកមកចាប់យកអាជីពជាវិចិត្រកររហូតមកដល់បច្ចុប្បន្ននេះ។
វិចិត្រករដ៏មានភាពប៉ិនប្រសប់រូបនេះបានបញ្ជាក់ថា “មូលហេតុដែលខ្ញុំស្រឡាញ់សិល្បៈ ដោយសារតែខ្ញុំមានពិការភាពហើយមានរឿងជាច្រើនដែលខ្ញុំចង់និយាយទៅប្រាប់មនុស្សជុំវិញខ្លួន ប៉ុន្តែគេមិនសូវយកចិត្តទុកដាក់ និងស្ដាប់នូវអ្វីដែលខ្ញុំនិយាយនោះទេ ហេតុនេះហើយ ទើបខ្ញុំបង្កើតសិល្បៈគំនូរដែលបញ្ចូលពីអត្ថន័យអ្វីដែលខ្ញុំចង់និយាយទៅក្នុងនោះ ទើបពួកគេស្ដាប់ និងអាចយល់នូវអ្វីដែលខ្ញុំចង់និយាយ អ្វីដែលខ្ញុំជួបប្រទះប្រចាំថ្ងៃ។” មិនតែប៉ុណ្ណោះ គ្រប់ស្នាដៃគំនូររបស់លោកនីមួយៗ តែងមានអត្ថន័យ និងសាច់រឿងបង្កប់នៅក្នុងនោះផ្សេងៗពីគ្នា។ ប្រភេទគំនូរខ្លះឆ្លុះបញ្ចាំងពីសង្គមបច្ចុប្បន្ន គំនូរខ្លះទៀតក៏បានលើកយកសាច់រឿងពីបរមបុរាណ ប្រភេទគំនូរខ្លះក៏និយាយអំពីរឿងល្អនៅក្នុងសង្គម គំនូរខ្លះក៏មានអត្ថន័យចង់កែប្រែពីអ្វីដែលអាក្រក់មកល្អជាដើម។ ដោយសារតែមានរឿងខ្លះលោកមិនអាចបញ្ចេញបានតាមរយៈការនិយាយ តែលោកក៏អាចបង្ហាញបានតាមរយៈគំនូរ ដើម្បីឱ្យអ្នកបានឃើញគំនូរនោះបានយល់ពីអត្ថន័យផងដែរ។ កន្លងមក លោក ម៉ន ជា ក៏ធ្លាប់បានយកស្នាដៃរបស់ខ្លួនដាក់តាំងបង្ហាញក្នុងពិព័រណ៍មិនតិចជាង១០ដងនោះទេ ទាំងក្នុង និងក្រៅប្រទេស ដូចជា នៅក្រុងភ្នំពេញ ខេត្តសៀមរាប សហរដ្ឋអាមេរិក និងប្រទេសបារាំងជាដើម។ ជាមួយគ្នានេះ លោកក៏ជាម្ចាស់ជ័យលាភីលេខ១ ទទួលបានពានរង្វាន់មាស (Gold Prize) ក្នុងកម្មវិធី White Canvas Cambodia 2021 ផងដែរ។
លោក ម៉ន ជា ក៏បានបង្ហើបអំពីគោលបំណងទៅថ្ងៃអនាគតដែរថា “ប្រសិនបើខ្ញុំជោគជ័យក្នុងវិស័យសិល្បៈមួយនេះ ខ្ញុំនឹងបើកកន្លែងមួយដើម្បីបង្រៀនក្មេងជំនាន់ក្រោយដែលពួកគាត់ស្រឡាញ់សិល្បៈ និងមានគំនិតច្នៃប្រតិដ្ឋផ្សេងៗ។ ឆ្លៀតឱកាសនេះខ្ញុំ ក៏មានជាសារជួយលើកទឹកចិត្តដល់បងប្អូនដែលស្រឡាញ់សិល្បៈ និងការច្នៃប្រតិដ្ឋក្នុងទម្រង់សិល្បៈផ្សេងៗ សូមកុំបោះបង់នូវអ្វីដែលខ្លួនឯងស្រឡាញ់ សូមបន្តអ្វីដែលយើងចង់ធ្វើ ជាពិសេសសូមលើកទឹកចិត្តដល់បងប្អូនដែលមានពិការភាព មិនថាពិការពីកំណើត ឬក៏ជួបគ្រោះថ្នាក់អ្វីក៏ដោយសូមកុំបោះបង់ភាពរឹងមាំ និងក្ដីសង្ឃឹម ហើយរុករកអ្វីដែលយើងគិតថាខ្លួនយើងអាចធ្វើបាន”៕
Article by SOUNG SOKSAN
