SOVRIN Magazine

ជំនួបនឹង លោក សៅ សុភ័ក្ត្រ មេចុងភៅដ៏ប្រជាប្រិយភាពនៅក្នុងវិស័យបដិសណ្ឋារកិច្ច

NEWS 11 hours ago

ផ្តើមចេញពីចំណង់ចំណូលចិត្តនៃការចម្អិនអាហារ និងការថតរូប បានក្លាយជាកត្តាមួយដែលជំរុញឲ្យលោក សៅ សុភ័ក្ត្រ ចែករំលែកនូវបទពិសោធន៍ និងដំណើរនៃចាប់ផ្តើមក្នុងវិស័យបដិសណ្ឋារកិច្ចលើផ្នែកចម្អិនរហូតទទួលបានជ័យលាភីនៅតាមបណ្តាប្រទេសជាច្រើននៅក្នុងតំបន់អាស៊ីថែមទៀត។ ជាក់ស្តែង នៅក្នុងឆ្នាំ ២០២៤ ចុងភៅឆ្នើម សុភ័ក្ត្រ បានទទួលពានរង្វាន់ “Best Master Chef at The Best Awards, Singapore” និងថ្មីៗនេះ លោកក៏ត្រូវបានជ្រើសរើសជាទូតសុឆន្ទៈ “Chef Ambassador Sturia Caviar” ផងដែរ។ ខាងក្រោមនេះជាកិច្ចសន្ទនារវាងក្រុមការងាររបស់ សូវរីន និងមេចុងភៅ ដែលនឹងធ្វើឲ្យប្រិយមិត្តនឹងជ្រាបព័ត៌មានកាន់ច្បាស់អំពីដំណើរដើមទងដែលបានធ្វើឲ្យលោកមានប្រជាប្រិយភាព៖

តើអ្វីទៅជាប្រវត្តិធ្វើម្ហូបរបស់លោកនៅក្នុងវិស័យបដិសណ្ឋារកិច្ច?
ខ្ញុំបានចាប់ផ្ដើមអាជីពរបស់ខ្ញុំដោយធ្វើការជាមួយមេចុងភៅល្បីៗជាច្រើននៅក្នុងខេត្តសៀមរាប ដែលភាគច្រើនលើមុខម្ហូបបែបលោកខាងលិច។ បន្ទាប់មកខ្ញុំបានប្ដូរមកធ្វើមុខម្ហូប Modern និង Contemporary ដែលមានន័យថាពីររសជាតិរួមបញ្ចូលគ្នាតែមួយដែលក្នុងនោះ មានរសជាតិអាហារអ៊ីតាលី និងអាហារខ្មែរ។ ក្នុងនាមខ្ញុំជាប្រធានមេចុងភៅបេសកកម្មរបស់ខ្ញុំ គឺថែរក្សា និងលើកតម្កើងឫសគល់ដ៏ជ្រាលជ្រៅនៃម្ហូបទាំងនោះ ហើយបង្កើតវាឡើងវិញសម្រាប់មនុស្សជំនាន់ថ្មី ដោយរក្សាបាននូវស្មារតីនៃម្ហូបខ្មែរឱ្យនៅដដែល ខណៈពេលដែលមានការបន្ថែមបច្ចេកទេស និងភាពច្នៃប្រតិដ្ឋថ្មីៗ។ រាល់ចំណិតនៃអាហារ គឺការអបអរសាទរនៃម្ហូបខ្មែរ និងភាពរស់រវើកសម្រាប់អនាគត។

តើអ្វីដែលជំរុញទឹកចិត្តឱ្យលោកបង្កើតមុខម្ហូបនីមួយៗ?
ខ្ញុំគិតថាការប្រើប្រាស់គ្រឿងផ្សំគោលស្រស់ៗទៅតាមរដូវកាល។ ខ្ញុំមានចំណង់ចំណូលចិត្តខ្លាំងលើរសជាតិពិសេស និងបច្ចេកទេសធ្វើម្ហូបបែបខ្មែរតាំងពីដើមមក។ ចាប់ផ្តើមពីការចម្អិនការីដែលមានរសជាតិឈ្ងុយឆ្ងាញ់ រហូតដល់សាឡាដដែលមានរសជាតិស្រស់ស្រាយ ម្ហូបខ្មែរផ្តល់ជូននូវជម្រើសដ៏សម្បូរបែបនៃមុខម្ហូបដែលមានរសជាតិឆ្ងាញ់ និងមានជីវជាតិ។

តើគោលការណ៍ណែនាំអ្វីខ្លះដែលកំណត់ទិសដៅនៃវិធីសាស្រ្តក្នុងការធ្វើម្ហូប?
មុនពេលខ្ញុំចាប់ផ្ដើមបង្កើតមុខម្ហូបថ្មីមួយ ខ្ញុំតែងតែគិតពិចារណាឱ្យបានច្បាស់លាស់អំពីគ្រឿងផ្សំសំខាន់ៗដែលខ្ញុំប្រើប្រាស់ក្នុងមុខម្ហូបនោះ និងឱកាសដែលខ្ញុំត្រូវរៀបចំម្ហូបនោះ។ ទស្សនវិជ្ជារបស់ខ្ញុំបន្ទាប់មកគឺការគិតអំពីសីតុណ្ហភាព រសជាតិ និងរយៈពេលនៃការចម្អិនអាហារ។

តើលោកមើលឃើញពីអនាគតម្ហូបខ្មែរយ៉ាងដូចម្តេច?
ក្នុងនាមជាកូនខ្មែរម្នាក់ ខ្ញុំដឹងថាយ៉ាងហោចណាស់ជនបរទេសជាច្រើននៅតែមិនទាន់ស្គាល់ច្បាស់អំពីម្ហូបរបស់យើងនៅឡើយទេ។ នេះហើយជាមូលហេតុដែលខ្ញុំប្ដេជ្ញាចិត្តក្នុងការចូលរួមចំណែកជំរុញម្ហូបខ្មែរ និងចែករំលែកវាទៅកាន់ពិភពលោក។ មិនថាដោយការសរសេរអំពីមុខម្ហូបដែលខ្ញុំចូលចិត្ត ឬការដាក់បង្ហាញម្ហូបខ្មែរនៅលើផែនទីពិភពលោកនោះទេ។ គោលដៅរបស់ខ្ញុំមិនមែនត្រឹមតែការផ្សព្វផ្សាយអាហារនោះទេ ប៉ុន្តែវាគឺការបង្ហាញពីភាពស្រស់ស្អាត និងវប្បធម៌នៃប្រទេសកំណើតរបស់ខ្ញុំ៕

Image Courtesy : CHEF SOPHEAK

SUGGESTIONS