ស្ថិតនៅ​ចម្ងាយ​ ​២០គីឡូម៉ែត្រ​ភាគ​ខាងត្បូង​ពី​ទី​ក្រុងភ្នំពេញ​ ​អាកាសយានដ្ឋាន​អន្តរជាតិ​តេជោ​ត្រូវ​បាន​រចនា​ឡើង​ ​ដើម្បី​ធ្វើឲ្យ​ការធ្វើដំណើរ​ហោះហើរ​មកកាន់​ប្រទេស​កម្ពុជា​កាន់តែ​មាន​ភាព​ងាយស្រួល​ ​ហើយក៏​ជាគោល​ដៅ​ដ៏​សំខាន់​មួយ​ក្នុង​ការ​ទាក់ទាញ​ទេសចរណ៍​ ​ក៏ដូចជា​ការ​វិនិយោគ​ទុន​អាជីវកម្ម​អន្តរជាតិ​ផ្សេងៗ​ទៀត។​

          ការរចនា​របស់​អាកាសយានដ្ឋាន​អន្តរជាតិ​តេជោ (KTI) ​បាន​ចូលរួម​អភិវឌ្ឍ​ដោយ​ក្រុមហ៊ុន​ OCIC តាមរយៈ​ ​CAIC ​និង​រចនា​ដោយ​ក្រុមហ៊ុន​ ​Foster​ + ​Partner​s ​ដែល​បាន​បញ្ចូល​នូវ​បេតិកភណ្ឌ​វប្បធម៌​របស់​ខ្មែរ​ដែល​នឹង​ផ្តល់​បទពិសោធន៍​ថ្មី​អ្នកដំណើរ​គ្រប់​ជើង​ហោះហើរ​។​ ​ជាក់ស្តែង​ ​ការរចនា​ទាំងអស់​នៃ​អាកាសយានដ្ឋាន​ថ្មី​នេះ​ ​គឺ​ការ​បំ​ផុសគំនិត​ពី​ទម្រង់​ស្ថាបត្យកម្ម​ខ្មែរ​ដែល​មាន​លំហ​រ​ដ៏​ធំ​ទូលាយ​ ​ជាពិសេស​ ​ដំបូល​អាកាសយានដ្ឋាន​អន្តរជាតិ​តេជោ ​ត្រូវ​បាន​ច្នៃ​ចេញពី​រូបរាង​អង្រុត​ដែល​ជា​ឧបករណ៍​នេសាទ​របស់​ខ្មែរ។​

          ការ​សាងសង់​អាកាសយានដ្ឋាន​ដ៏​ប្រណីត​ ​និង​ធំបំផុត​ក្នុង​កម្ពុជា​ត្រូ​បាន​គិតគូរ​យ៉ាង​ហ្មត់ចត់​ពី​ស្ថាបត្យកម្ម​ ​និង​រចនាបថ​ខ្មែរ​ ​ទាំង​ការ​យកចិត្តទុកដាក់​បំផុត​ដោយ​គិតគូរ​ពី​អាកាសធាតុ​ត្រូពិ​ច​របស់​ប្រទេស​កម្ពុជា​ដែល​ធានា​បាន​ថា​ការ​ធ្វើ​ប្រតិបត្តិការ​ប្រកបដោយ​ប្រសិទ្ធ​។​ ​ផ្ទៃ​ខាងក្នុង​ធំ​ទូលាយ​ ​និង​មាន​ទេសភាព​បៃតង​ខ្ចី​ដែល​កាន់តែ​លើក​សម្រស់​ស្ថា​នី​យ៍​កាន់តែ​ស្រស់​ប្លែក​ដែល​មាន​ពន្លឺ​ធម្មជាតិ​ចេញ​ចូលក្នុង​ស្ថា​នី​យ៍​ដែល​ធ្វើឲ្យ​អ្នកដំណើរ​មាន​ភាព​ស្រស់ស្រាយ​ ​និង​បំបាត់​ភាព​នឿយហត់​ ​ក្រៅពី​ការ​បម្រើ​អ្នកដំណើរ​ ​អាកាសយានដ្ឋាន​ក៏​ត្រូវ​បាន​រចនា​ឡើង​ ​ដើម្បី​ផ្តល់​នូវ​ចំណាប់អារម្មណ៍​ដំបូង​ដែល​ជា​ការ​ចងចាំ​សម្រាប់​ភ្ញៀវ​ទេសចរ​នៅ​ពេល​បាន​ធ្វើដំណើរ​មកដល់​ទីនេះ​ថែមទៀត​។​

          ផែនការ​ចម្បង​សម្រាប់​អាកាសយានដ្ឋាន​ថ្មី​ ​រួម​នឹង​គំនិត​ស្ថាបត្យកម្ម​ត្រូវ​បាន​កំណត់​ ​និង​អនុវត្ត​ជា​បី​ដំណាក់កាល​ធំ​ៗ​គឺ​៖​ ​ដំណាក់កាល​ទី​ ​១​៖​ ​អាច​ផ្ទុក​អ្នកដំណើរ​បាន​រហូតដល់​ ​១​៣​ ​លាន​នាក់​ក្នុង​មួយ​ឆ្នាំ​ ​ដំណាក់កាល​ទី​ ​២​៖​ ​ពង្រីក​ដល់​ ​៣​០​ ​លាន​នាក់​ ​និង​ដំណាក់កាល​អភិវឌ្ឍន៍​ពេញលេញ​៖​ ​រហូតដល់​ ​៥​០​ ​លាន​នាក់​។​

          ខុស​ពី​ការធ្វើដំណើរ​ដូចសព្វដង​ ​អាកាសយានដ្ឋាន​អន្តរជាតិ​តេជោ (KTI) ​នឹង​មាន​ប្រព័ន្ធ​សម្រាប់​ដាក់​អីវ៉ាន់​ដោយខ្លួនឯង​ ​ប្រព័ន្ធ​ចុះឈ្មោះ​ចូល​ដោយស្វ័យប្រវត្តិ​ ​និង​បច្ចេកវិទ្យា​ផ្សេងទៀត​ដែល​ផ្តោត​លើ​អ្នកដំណើរ​ ​ដែល​មាន​គោលបំណង​កាត់បន្ថយ​ពេលវេលា​រង់ចាំ​ ​ហើយ​ចំណុច​នេះ​ដែរ​នឹង​ធ្វើឲ្យ​ការធ្វើដំណើរ​លឿន​ ​និង​មាន​ប្រសិទ្ធ​ភាពជា​ង​មុន​។​

          គួរ​បញ្ជាក់​ផង​ដែរ​ថា​ ​ប្រ​ព័ន្ធដំណើរ​ការ​នៃ​ការហោះហើរ​ដែល​ស្ថិតនៅ​អាកាសយានដ្ឋាន​អន្តរជាតិ​ភ្នំពេញ​នឹង​ផ្ទេរ​មក​អាកាសយានដ្ឋាន​អន្តរជាតិ​តេជោ (KTI) ​នៅ​យប់​ថ្ងៃ​ទី​០​៨​ ​ខែកញ្ញា​ ​ឈាន​ចូល​ថ្ងៃ​ទី​០​៩​ ​ខែកញ្ញា​ ​ដែល​ជា​ការប្រតិបត្តិ​ការសាកល្បង​ ​និង​សម្ពោធ​ជា​ផ្លូវការ​នៅ​ថ្ងៃ​ទី២​០​ ​ខែ​តុលា ឆ្នាំ២០២៥​៕​

Article by SIVLY PAN