Sovrin
Sovrin
លោក «ហេង លីហ៊ាង» ម្ចាស់ជ័យលាភីលេខ១ក្នុងការប្រកួតធ្វើស្រាក្រឡុក
NEWS 4 months ago
ស្របពេលដែលប្រទេសកម្ពុជាកំពុងរីកចម្រើនក្នុងវិស័យអាជីវកម្មភោជនីយដ្ឋាន និងបារស្ទើរទូទាំងប្រទេសនោះ កម្មវិធីប្រកួតប្រជែងធ្វើស្រាក្រឡុក «Mapping The Mekong 2023» ត្រូវបានបង្កើតឡើងដោយក្រុមហ៊ុន Seekers Spirits ក្នុងគោលបំណងចង់ឱ្យអ្នកលាយស្រា (Bartender) ខ្មែរបានបញ្ចេញសមត្ថភាពក្នុងការច្នៃប្រតិដ្ឋស្រាក្រឡុក (Cocktail) ដែលប្រើប្រាស់នូវគ្រឿងផ្សំក្នុងស្រុក លាយជាមួយស្រាពីក្រុមហ៊ុន Seekers Spirit ហើយក៏ចង់បង្ហាញទៅកាន់ពិភពលោកថា កម្ពុជាយើងក៏អាចធ្វើស្រាក្រឡុកឈានទៅកម្រិតអន្តរជាតិបានផងដែរ។ ជាមួយគ្នានេះ លទ្ធផលប្រកួតប្រជែងខាងលើនេះក៏បានរកឃើញម្ចាស់ជ័យលាភីដែលបានទៅលើលោក ហេង លីហ៊ាង។ តើលោកជានរណា? ហើយមានបទពិសោធន៍យ៉ាងដូចម្តេចខ្លះទើបឈានមកដណ្តើមបានពានដ៏អស្ចារ្យនេះ?
លោក ហេង លីហ៊ាង មានវ័យ២៩ឆ្នាំ មានស្រុកកំណើតមកពីខេត្តកំពង់ចាម។ លោកបានបញ្ចប់ការសិក្សាផ្នែកបដិសណ្ឋារកិច្ច និងទេសចរណ៍នៅវិទ្យាស្ថានអង្គការដើម្បីភាពញញឹមនៃកុមារ ឬហៅកាត់ថា PSE ។ លោកបានបង្ហើបពីអារម្មណ៍រំភើបក្រោយទទួលបានជ័យលាភីលេខ១ថា “ខ្ញុំពិតជាមានអារម្មណ៍រំភើប និងសប្បាយចិត្តខ្លាំង ព្រោះបានសម្រេចក្តីស្រមៃ និងបានបង្ហាញនៅអ្វីដែរខ្មែរមាន ជាមួយនឹងការខិតខំកន្លងមក ហើយជ័យជម្នះមួយនេះមិនមែនសម្រាប់តែខ្ញុំម្នាក់ឯងនោះទេ តែសម្រាប់ប្រទេសកម្ពុជាតែម្តង។” លោកបានបន្តថា មូលហេតុដែលលោកសម្រេចចិត្តចូលរួមប្រកួតក្នុងកម្មវិធីនេះ ក៏ព្រោះតែលោកធ្លាប់មានក្តីស្រមៃចង់បង្ហាញនូវ Signature Cocktail ដែលបង្ហាញអំពីការប្រើប្រាស់ផលិតផលខ្មែរ ព្រោះខ្មែរយើងមានគ្រឿងផ្សំច្រើនណាស់ ដែលអាចឱ្យយើងយកទៅច្នៃដើម្បីបន្ថែមក្លិន បន្ថែមរសជាតិ សោភណភាពឱ្យមើលទៅមានភាពច្នៃប្រតិដ្ឋ វាគ្រាន់តែទាមទារឱ្យយើងចំណាយពេលក្នុងការសិក្សា ភ្លក្ស និងសាកល្បងធ្វើតែប៉ុណ្ណោះ។
លោក ហេង លីហ៊ាង
យ៉ាងណាមិញ មុនឈានដល់ការចូលរួមប្រកួតក្នុងកម្មវិធីនេះ លោកក៏ធ្លាប់បានចូលរួមវគ្គសិក្សា Cocktail Master Class , Spirit Training, ធ្លាប់បម្រើការងារនៅសណ្ឋាគារ និងភោជនីយដ្ឋានលំដាប់អន្តរជាតិ ក៏ដូចជាការរៀនសូត្រស្រាវជ្រាវបន្ថែមដោយខ្លួនឯងតាមរយៈការអានសៀវភៅ និងការសិក្សាតាមបណ្តាមសង្គមផ្សេងៗដូចជា Facebook, Instagram ជាដើម។ ជាការពិត ទម្រាំទទួលបានជ័យលាភីលេខ១វាមិនមែនជារឿងងាយស្រួលនោះទេ វាទាមទារឱ្យមានបទពិសោធន៍ និងការមានជំនាញច្បាស់លាស់។ រីឯចំណុចខ្លាំងរបស់លោកដែលនាំឱ្យទទួលបានជ័យលាភីលេខ១នោះគឺ ការតាំងចិត្ត ភាពរហ័សរហួន អនាម័យ ការចេះលាយស្រាតាមលំដាប់ ការផ្តោតអារម្មណ៍ ការមានភាពច្នៃប្រតិដ្ឋ ការពន្យល់ពីប្រវត្តិនៃស្រា អ្វីដែលសំខាន់គឺការជឿជាក់លើខ្លួនឯង និងស្នាមញញឹមដ៏រួសរាយផងដែរ។
ម្ចាស់ជ័យលាភីលេខ១រូបនេះក៏បានបង្ហើបអំពីគោលបំណងរបស់ខ្លួនក្នុងវិស័យនេះថា “ខ្ញុំចង់បើកអាជីវកម្ម Cocktail Bar មួយតូចល្មម ហើយលោកនឹងប្រើប្រាស់គ្រឿងផ្សំដែលជារបស់ខ្មែរយើងមកធ្វើជាស្រាក្រឡុកបង្ហាញទៅកាន់ភ្ញៀវជាតិ និងអន្តរជាតិ។ ខ្ញុំគិតថាវាជារឿងល្អមួយប្រសិនបើខ្ញុំអាចធ្វើសម្រាប់ប្រទេសខ្ញុំ ព្រោះទាំងនេះវាក៏ជារឿងមួយដែល Cocktail Bar មួយចំនួនធំលើពិភពលោកកំពុងតែធ្វើ។ ខ្ញុំក៏សង្ឃឹមថានឹងមានមានការកែតម្រូវ ការចូលរួមគាំទ្រ ក៏ដូចជាការលើកទឹកចិត្តពីសំណាក់ប្រជាជនយើងផ្ទាល់ផងដែរ ព្រោះវាក៏ជាផ្លូវមួយដែលអាចឱ្យពិភពលោកស្គាល់ប្រទេសកម្ពុជាយើងកាន់តែច្រើន និងដើម្បីជំរុញវិស័យនេះឱ្យមានធនធានមនុស្សដូចទៅនឹងប្រទេសដទៃដែរ។” តាមរយៈសូវរីន លោក ក៏មានពាក្យពេចន៍ផ្តាំផ្ញើទៅអ្នកដែលស្រលាញ់ និងចង់ប្រឡូកក្នុងវិស័យនេះដែរថា សូមឱ្យពួកគាត់ចំណាយពេលរៀនឱ្យបានច្រើនលើអ្វីដែរគាត់គិតថាមិនទាន់ចេះច្បាស់ និងស្រាយជ្រាវបន្ថែមនៅអ្វីដែរយើងយកមកប្រើប្រាស់ ហើយប្រសិនបើមានពេលគួរដើរលេងក្រៅប្រទេស ឬសិក្សាពីបារបរទេសមួយចំនួនដែលមានក្នុងប្រទេសយើងឱ្យបានច្រើន ព្រោះបើក្រឡេកមើលពីកម្រិតបាររបស់បរទេសវិញគឺពួកគេមានអ្វីថ្មីសឹងតែរាល់ថ្ងៃ ដើម្បីផ្តល់បទពិសោធន៍ដល់ភ្ញៀវរបស់គេ ទាំងនេះសុទ្ធតែជាអ្វីដែលយើងអាចរៀនសូត្របាន៕”
Article by SOUNG SOKSAN
